އިންޑޮނޭޝިއާ އަށް އެރި ސުނާމީގައި މަރުވި މީހުންގެ އަދަދު 370 އަށް އަރައިފި
25 ޑިސެމްބަރު 2018 | އަންގާރަ 08:27ޒަޚަމްވި މީހުންގެ އަދަދު 1459 އަށް އަރާ
އިންޑޮނޭޝިއާ އަށް އެރި ސުނާމީ ހަލާކުވެފައިވާ މިސްކިތެއް
އިންޑޮނީޝިއާގެ ސުންޑަ ސްޓްރެއިޓް ސަރަހައްދަށް އެރި ސުނާމީއެއްގައި މަރުވި މީހުންގެ އަދަދު 370 އަށް ވުރެ އިތުރުވެ ޒަޚަމްވި މީހުންގެ އަދަދު 1459 އަށް އަރައިފި ކަމަށް އެ ގައުމުގެ ނެޝަނަލް ޑިޒާސްޓަރ އެޖެންސީން ބުނެފިއެވެ.
އެ ހާދިސާގައި ގެއްލިފައިވާ މީހުންގެ އަދަދު 100 އަށް ވުރެ އިތުރު ވެފައިވާއިރު، ރައްކާތެރި ސަރަހައްދުތަކަށް މީހުން ބަދަލުކޮށް ގެއްލިފައިވާ މީހުން ހޯދުމުގެ މަސައްކަތް އަދިވެސް ކުރަމުންދާ ކަމަށް އެ ޤައުމުގެ ރިޕޯރޓްތައް ބުނެއެވެ.
ހޮނިހިރުދުވަހުގެ ރޭ ސުނާމީ އަރާފައި ވަނީ ރޭގަނޑު އެ ގައުމުގެ ގަޑިން 21:30 ހާއިރުއެވެ.
ފަތުރުވެރިންގެ މެދުގައި މަގުބޫލު މަންޒިލްތަކަށް ވެސް ސުނާމީގެ އަސަރުކޮށްފައިވާއިރު އޭގެ ތެރޭގައި ހުޅަނގު ޖާވާގެ ޓަންޖުންގ ލެސުންގ ރިޒޯޓް ވެސް ހިމެނެއެވެ. ޑިޒާސްޓަރ މެނޭޖްމަންޓުން ބުނީ ބުރުހަމަ ހަނދެއްގެ ދުވަސްވަރު ހަނދުއަރައި އަދި ބޮޑުދިޔައިގެ ވަގުތަށް ވުމަކީ ރާޅުތަކުގެ ބާރު ގަދަވި ސަބަބެއް ކަމުގައި ވެދާނެ ކަމަށެވެ.
އިންޑޮނޭޝިޔާގެ މީޓިއޮރޮލޮޖީ އެންޑް ޖިއޯފިޒިކްސް އެޖެންސީއިން ބުނެފައި ވަނީ ސުނާމީ އަރަން މެދުވެރިވީ، އަލިފާން ފަރުބަދަ އަނަކް ކްރަކަޓާއޫ ގޮވުމުގެ ސަބަބުން ބިންގަނޑު ކަނޑައިގެން ދިޔުމާ ގުޅިގެން ކަމަށް ލަފާކުރެވޭ ކަމަށެވެ.
