ޗެކް ރިޕަބްލިކްގެ މައިނެއްގައި ގޮވުމެއް ހިނގައި 13 މަރު

ޗެކް ރިޕަބްލިކުގެ މައިނެއްގައި މީތޭން ގޮވުމެއް ހިނގައި، 13 މީހަކު މަރުވެއްޖެއެވެ.

މައިން ހިންގާ އޯކޭޑީ ކުންފުނިން ބުނެފައި ވަނީ ގޮވުމުގެ ހާދިސާ ހިނގީ 800 މީޓަރު އަޑީގައި ކަމަށެވެ. އަދި މަރުވި މީހުންގެ ތެރޭގައި ހިމެނެނީ އެ ގައުމުގެ ދެ މީހުންނާއި ޕޮލެންޑުގެ އެގާރަ މީހެއް ކަމަށް ކުންފުނީގެ ތަރުޖަމާނު އިވޯ ކެލެޗޯވްސްކީ ވަނީ ބުނެފައެވެ.

ޗެކް ސަރުކާރުގެ ހިއްސާ އޮންނާ އޯކޭޑީއިން ހާމަކޮށްފައިވާ ގޮތުގައި ގިނައިން މި ހާދިސާގައި މަރުވީ ޕޮލެންޑު މީހުންނަކީ، އެހެން ކުންފުންޏަކުން މަސައްކަތެއް ކުރުމަށް އައިސް ތިބި ބައެކެވެ.

އޯކޭޑީއިން ބުނެފައި ވަނީ މީހުން ސަލާމަތްކުރަން ކުރާ މަސައްކަތަށް، ޝާފްޓް ތެރޭގެ ރައްކާތެރިކަން ކުޑަވުމުގެ ސަބަބުން ހުއްޓުމެއް އައިސްފައިވާ ކަމަށެވެ. އެ ކުންފުނިން ބުނެފައިވަނީ ރޯވެފައިވާ އަލިފާންގަނޑުގެ ސަބަބުންނާއި، ޝާފްޓް ތެރޭގައި އެއްވެސް ތަނެއް ނުފެންނާތީއްވެ މަސައްކަތް ހުއްޓާލަން މަޖުބޫރުވީ ކަމަށެވެ.

މިއީ 1990 ވަނަ އަހަރު ޗެކް ރިޕަބްލިކްގެ މައިނެއްގައި ހިނގި ހާދިސާއެއްގައި 30 މީހުންގެ ފުރާނަ ދިޔަ ފަހުން އެ ގައުމުގައި ހިނގި އެއްމެ ނުރައްކާތެރި މައިނިންގެ ހާދިސާއެވެ.