އެމެރިކާގެ ރައީސް ޑޮނަލްޑް ޓްރަމްޕުގެ ގެކޮޅުކަމަށްވާ ޓްރަމްޕް ޓަވަރުގައި އަލިފާނުގެ ހާދިސާއެއް ހިނގައިފިއެވެ.
އަލިފާނުގެ ހާދިސާ ހިނގި ވަގުތު ޓްރަމްޕް އުޅުއްވީ ވޮޝިންގްޓަންގައި ކަމަށް ރޮއިޓާސްއިން ވަނީ ރިޕޯޓުކޮށްފައެވެ.
މީޑިއާތަކާ ހަވާލާދީ ރޮއިޓާސްއިން ބުނެފައިވަނީ މިހާދިސާގައި އަނިޔާވީ ދެމީހަކަށް ކަމަށާއި އޭގެން އެކަކު ވަރަށް ބޮޑަށް ސީރިއަސް ހާލަތަކަށް ގޮސްފައިވާ ކަމަށެވެ.އަދި އެމީހާއަށް ފަރުވާދެމުން ދިޔަ ނަމަވެސް އަނިޔާވި ދެވަނަ މީހާގެ ހާލު ރަނގަޅުކަމަށް ވަނީ ބުނެފައެވެ.
ޓްރަމްޕްގެ ދަރިކަލެއް ކަމަށްވާ އެރިކް ޓްރަމްޕް ކުރައްވާފައިވާ ޓްވީޓެއްގައި ވިދާޅުވީ އަލިފާނުގެ ހާދިސާ ހިނގަން މެދުވެރިވީ ކަރަންޓުގެ މައްސަލައެއްގެ ސަބަބުން ކަމަށާއި އަލިފާން ރޯވީ ޓަވަރުގެ ފުރާޅުގައި ކަމަށެވެ.
ނިއުޔޯކްގެ ފަޔާ ޑިޕާޓްމަންޓުން އެހާދިސާ ހިނގުމާއެކު އެތަނަށް ގޮސް އަލިފާން ނިއްވާލާފައިވާ ކަމަށާއި އެމީހުން ކުރި މަސައްކަތަށް ޝުކުރު އަދާކުރައްވާ ކަމަށް އެރިކްގެ ޓްވީޓުގައި ވަނީ ވިދާޅުވެފައެވެ.
އަލިފާން ނިއްވުމުގައި އެމެރިކާގެ ފަޔާ ޑިޕާޓްމެންޓުގެ 84 އަލިފާން ނިއްވާ މީހުން ވަނީ ހަރަކާތްތެރިވެފައެވެ.
ނިއުޔޯކްގައި ހުންނަ ޓްރަމްޕް ޓަވަރަކީ 68 ބުރީގެ އިމާރާތެކެވެ. އެ ޓަވަރު އިމާރާތް ކޮށްފައިވަނީ 1983 ވަނަ އަހަރުގައެވެ.
