އެމެރިކާގެ ރައީސް ޑޮނަލްޑް ޓްރަމްޕްގެ އަމިއްލަފުޅު ބިލްޑިންގއެއް ކަމަށްވާ ނިއުޔޯކްގައި ހުންނަ ޓްރަމްޕް ޓަވަރުގައި އަލިފާނުގެ ޙާދިސާއެއް ހިނގައިފިއެވެ.
އަލިފާނުގެ ޙާދިސާގައި އެކަކު ވަނީ މަރުވެފައެވެ. އެމީހާ މަރުވީ ފަރުވާ ދިނުމަށް ހޮސްޕިޓަލަށް ގެންދިޔަ ފަހުން ކަމަށް އޮފިޝަލުން މައުލޫމާތު ދެއެވެ. އެމީހަކީ އެބިލްޑިންގގައި ދިރިއުޅެމުންދިޔަ މީހެކެވެ.
އަލިފާން ރޯވީ އުސްކޮށް ހަދާފައިވާ އެއިމާރާތުގެ 50ވަނަ ފަންގިފިލާގައެވެ.
އެއިމާރާތަކީ ވެރިކަމަށް ވަޑައިގަތުމަށްފަހު ވެސް ޓްރަމްޕް ބޭނުން ކުރައްވާ އެޕާޓްމަންޓް ހުންނަ ބިލްޑިންގއެވެ. އަދި އަނބިކަނލުން މެލާނިއާ ޓްރަމްޕްއާއި ހަނގު ދަރިކަލުން ބެރޮންވެސް ބޭނުންކުރައްވަނީ އެއިމާރާތުގެ އެންމެ މަތީގައި ހުންނަ އެޕާޓްމަންޓެވެ. އެހެން ނަމަވެސް މިޙާދިސާ ހިނގި ވަގުތު އެއިމާރާތުގައި ޓްރަމްޕް އާއިލާގެ ބޭފުޅަކު ނޫޅުއްވައެވެ.
އަލިފާނުގެ ޙާދިސާ ހިނގުމާއިއެކު ޓްރަމްޕް ވަނީ އަލިފާން ނިވިއްޖެ ކަމަށާއި، އެއިމާރާތަކީ ވަރަށް ރަނގަޅަށް އިމާރާތްކޮށްފައިވާ ތަނެއް ކަމަށް ވިދާޅުވެ ޓްވީޓް ކުރައްވާފައެވެ. އެހެން ނަމަވެސް އޭގެ އިރުކޮޅެއް ފަހުން ނިއުޔޯކްގެ ފަޔަރ ޑިޕާޓްމަންޓުގެ ވެރިޔާ ޑެނިއަލް ނިގްރީ ވިދާޅުވީ އަލިފާން ކޮންޓްރޯލްވި ކަމަށް ޓްރަމްޕް ވިދާޅުވި ނަމަވެސް އިމާރާތުން ބޯކޮށް ކަޅުދުން އަރަމުން ދިޔަ ކަމަށާއި، އެހެންކަމުން މުޅިން ކޮންޓްރޯލް ކުރެވިއްޖެއޭ ނުބުނޭވެނެ ކަމަށެވެ. އަދި އެއިމާރާތުގައި އަލިފާން ނިއްވަން ބޭނުންކުރާ ސްޕްރިންކްލަރސް ހަރުކޮށްފައިނުވާކަން އޭނާ ފާހަގަކުރެއްވިއެވެ.
މިހާރު އިމާރާތް ކުރާ އިމާރާތްތަކުގައި ސްޕްރިންކްލަރސް ހަރުކުރުން މަޖުބޫރު ނަމަވެސް، ޓްރަމްޕް ޓަވަރ އިމާރާތްކުރި އިރު އެއީ މަޖުބޫރުކަމެއް ނޫނެވެ.
މިއަލިފާން ނިއްވާލުމަށް އެސަރަހައްދަށް 200 ވަރަކަށް ފަޔަރމަނުން ފޮނުވަން ޖެހުނު ކަމަށް ނިއުޔޯކް ފަޔަރ ޑިޕާޓްމަންޓުން ބުންޏެވެ. މި އަލިފާންގަނޑު މިހާރު ވަނީ އެއްކޮށް ކޮންޓްރޯލް ކޮށްފައެވެ.
