މިދިޔަ ހަފްތާގެ ބުދަ ދުވަހުން ފެށިގެން ގެއްލިގެން ހޯދަމުންދާ އާޖެންޓިނާގެ ކަނޑުގެ ސިފައިންގެ ސަބްމެރިން ގެއްލުނު ކަމަށް ބެލެވޭ ހިސާބުން ބާރުގަދަ ގޮވުމެއް ގޮވައިފިކަމުގެ ރިޕޯޓްތަކާ އެކު ސަބްމެރިން ފެންނާނެކަމުގެ އުއްމީދު ގެއްލިއްޖެއެވެ.

ދެކުނު އެޓްލާންޓިކްގެ ކަނޑުގެ އަޑިން ބާރުގަދަ ގޮވުމެއް ގޮވާފައިވާކަން އާޖެންޓީނާގެ ކަނޑުގެ ސިފައިންނަށް އަންގާފައި ވަނީ ދުނިޔޭގެ ޤައުމުތަކުން ނިއުކްލިއަރ ޓެސްޓްތައް ކުރޭތޯ ބަލައި މޮނިޓަރކުރާ އޮސްޓްރިއާގެ އޮސްޓްރިއާގެ ޖަމްއިއްޔާއަކުންނެވެ. ވިއެނާގައި ޤާއިމްވެފައިވާ ކޮމްޕްރިހެންސިވް ނިއުކްލިއަރ ޓެސްޓް ބޭން ޓްރީޓީ އޯގަނައިޒޭޝަނުން ބުނީ އެޖަމާޢަތުން ކަނޑު އަޑީގެ އަޑުތައް އެހުމަށް ބޭނުންކުރާ ދެ އެކޫސްޓިކް ސްޓޭޝަނަކަށް އެޓްލާންޓިކް ކަނޑުގެ ދެކުނު ސަރަހައްދުން ބާރުގަދަ އަޑެއް އިވިފައިވާ ކަމަށާއި، އެއީ ބާރުގަދަ ގޮވުމެއް ކަމަށް ބެލެވޭ ކަމަށެވެ. އެހެން ނަމަވެސް އެއީ ނިއުކްލިއަރ ޓެސްޓެއްގެ ސަބަބުން ގޮވި ގޮވުމެއް ނޫންކަން ކަށަވަރު ކަމަށް ވެސް އެޖަމާޢަތުން ބުނެއެވެ.

މީގެ އިތުރުން އެމެރިކާގެ ކަނޑުގެ ސިފައިން ވެސް ވަނީ އެސަރަހައްދުން އާދަޔާ ޚިލާފު އަޑެއް އިވިފައިވާ ކަމަށް ބުނެފައެވެ.

އާޖެންޓީނާގެ ކަނޑުގެ ސިފައިން ބުނީ މި ދެ ރިޕޯޓުގައި ވެސް ގޮވުމެއް ގޮވާފައިވާ ކަމަށް ބުނެފައި ވަނީ އެސަރަހައްދެއްގައި ކަމަށާއި، އެއީ ސަބްމެރިން ގެއްލުނު ސަރަހައްދު ކަމަށެވެ.

ގެއްލުނު އޭއާރްއޭ ސަން ހުއާން ސަބްމެރިންގައި 44 ފަޅުވެރިން ދަތުރުކުރަމުންދިޔައެވެ. ސަބްމެރިން ގެއްލުމާ ގުޅިގެން އެމެރިކާ، އިނގިރޭސިވިލާތް، ޗިލޭ، ބްރެޒިލް އަދި ރަޝިޔާގެ އިތުރުން އެހެން ބައެއް ޤައުމުތަކުން ވެސް ސަބްމެރިން ފެނޭތޯ ބެލުމަށް މެދުނުކެނޑި ދަނީ މަސައްކަތްކުރަމުންނެވެ. ވައިގެ މަގުން ކަނޑުގެ ސަރަހައްދު މޮނިޓަރ ކުރުމަށް ޚާއްސަ 4 މަތިންދާބޯޓު އާޖެންޓީނާގައި އޮތް ނަމަވެސް، އެ މަތިންދާބޯޓުތައް މަރާމާތުކުރުމަށް ގްރައުންޑްކޮށްފައި ވާތީ އޭގެ ބޭނުމެއް ނުހިފެއެވެ.

ސަބްމެރިންގައި ތިބި ސިފައިން ދިރިތިއްބާ ފެނިދާނެކަމުގެ އުއްމީދު ކުޑަވެފައިވާއިރު، އެމީހުންގެ އާއިލާތަކުން ގެންދަނީ ސަރުކާރުން އާއިލާތަކަށް މައުލޫމާތު ފޯރުކޮށްދިނުން ލަސްވުމުގެ ސަބަބުންނާއި މައުލޫމާތު ފޯރުކޮށްދިނުމަށް ލަސްވަމުންދާތީ އެކަމާއި ކަންބޮޑުވުން ފާޅުކުރަމުންނެވެ. އަދި އާޖެންޓީނާގެ ކަނޑުގެ ސިފައިންގެ ލަޝްކަރުގައި ހިމެނޭ ސަބްމެރިންތަކަކީ ވަރަށް ބާވެފައިވާ ތަކެތި ކަމުން، އެސަބްމެރިންތަކުގައި ސިފައިން ކަނޑުގެ އަޑިއަށް ފޮނުވުމުގެ ސަބަބުން ލިބޭ ގެއްލުމުގެ ޒިންމާ އާޖެންޓީނާ ސަރުކާރުން އުފުލަން ޖެހޭނެ ކަމަށް ވެސް އާއިލާތަކުން ބުނެއެވެ. ސަބްމެރިން ހޯދުމުގެ މަސައްކަތް އާޖެންޓީނާގެ އަސްކަރިއްޔާ އާއި އެހެން ޤައުމުތަކުން ހުއްޓާ ނުލި ނަމަވެސް އޭގައި ތިބި ފަޅުވެރިންގެ އާއިލާތަކުން ވަނީ އުއްމީދު ކަނޑާލާފައެވެ.

އޭއާރްއޭ ސަން ހުއާންއަކީ 1983ވަނަ އަހަރު ޖަރުމަންވިލާތުގައި އުފެއްދި ސަބްމެރިންއެކެވެ.