މަދު މަސްތަކެއްގެ ތެރޭގައި އެމެރިކާ އަށް ހަމަލާ ދެވޭ ފަދަ މިސައިލްތަކެއް އުތުުރު ކޮރެއާ އަށް ލިބިގެން ހިނގައިދާނެތީ އެކަމާ ވަރަށް ކަންބޮޑުވަން: މައިކް ޕޮމްޕޭއޯ

"ކުރިއަށް އޮތް މަދު މަސްތަކެއްގެ ތެރޭގައި" އެމެރިކާ އަށް ހަމަލާ ދެވޭ ފަދަ މިސައިލްތަކެއް އުތުުރު ކޮރެއާ އަށް ލިބިގެން ހިނގައިދާނެތީ އެކަމާ ވަރަށް ކަންބޮޑުވެވަޑައިގަންނަވާ ކަމަށް އެމެރިކާގެ ސެންޓްރަލް އިންޓެލިޖެންސް އެޖެންސީ (ސީއައިއޭ) ގެ ޑައިރެކްޓާ މައިކް ޕޮމްޕޭއޯ ވިދާޅުވެއްޖެއެވެ.

ބީބީސީ ނިއުސް އަށް ދެއްވި އިންޓަވިއުއެއްގައި ޕޮމްޕޭއޯ ވިދާޅުވީ އުތުރު ކޮރެއާގެ ސަބަބުން އެމެރިކާ އަށް އޮތް ނުރައްކާތަކާ ބެހޭ ގޮތުން، އެމެރިކާގެ އިންޓެލިޖެންސް އެޖެންސީ ކަމަށްވާ ސީއައިއޭ އިން އަބަދުވެސް މަޝްވަރާކޮށް ހަދާ ކަމަށެވެ. ވާޖީނިއާގައި ހުންނަ ސީއައިއޭގެ ހެޑްކުއާޓަރުގައި ހުންނަވައި ޕޮމްޕޭއޯ ވިދާޅުވީ އެމަނިކުފާނުގެ އިންޓެލިޖެންސް އިދާރާގެ ޒިންމާއަކީ އެމެރިކާގެ ރައީސް އަށް އިންޓެލިޖެންސް މައުލޫމާތު ފޯރުކޮށްދިނުން ކަމަށާއި އެކަމުގެ ބޭނުމަކީ ޑިޕްލޮމެޓިކް ނޫން ގޮތްގޮތުން, އުތުރު ކޮރެއާ އިން އެމެރިކާ އަށް ކުރިމަތިކުރާ ރިސްކާ ދެކޮޅަށް މަސައްކަތް ކުރުން ކަމަށެވެ.

ޕޮމްޕޭއޯ އިތުރަށް ވިދާޅުވީ އުތުރު ކޮރެއާގެ އަމަލުތަކާ ދެކޮޅަށް އެމެރިކާ އިން ބާރުގެ ބޭނުން ކުރުމަކީ އުތުރު ކޮރެއާ ހިމެނޭ ސަރަހައްދުގައި ވަރަށް ގިނަ އަދަދެއްގެ ބައެއްގެ ފުރާނަ ގެއްލުމަށް މެދުވެރިވާނެ ކަމެއް ކަމަށެވެ.

ބައިނަލްއަގްވާމީ ދުނިޔެ އިން ތަކުރާރުކޮށް އުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އުތުރު ކޮރެއާގެ އަމަލުތަކަކަށް ބަދަލެއް ނާދެއެވެ.

އުތުރު ކޮރެއާ އިން ވަނީ 2017 ވަނަ އަހަރު އެކަނި ވެސް 20 ބެލިސްޓިކް މިސައިލް ޓެސްޓްކޮށްފައެވެ. އޭގެ ތެރޭގައި ތިން އިންޓަކޮންޓިނެންޓަލް ބެލިސްޓިކް މިސައިލް ޓެސްޓް ހިމެނެއެވެ.

އެންމެ ފަހުން އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އެޅީ މިދިޔަ ބުދަ ދުވަހުއެވެ. ބުދަ ދުވަހު އެމެރިކާ ދަތިކުރުމުގެ ފިޔަވަޅު އަޅާފައި ވަނީ ނުވަ މުއައްސަސާއަކަށާއި، 16 މީހަކަށާއި، އަދި އުތުރު ކޮރެއާގެ ހަ ބޯޓަކާ ދެކޮޅަށެވެ.