ޗެކް ރިޕަބްލިކްގެ ރިޔާސީ އިންތިޚާބުގެ ދެވަނަ ބުރުގައި ވާދަވެރި ކެނޑިޑޭޓް އިޒީ ދްރައޯޝްގެ މައްޗަށް ހަނި އަޣުލަބިއްޔަތަކުން ކުރި ހޯއްދަވައި ރައީސް މިލޯޝް ޒީމަން ދެވަނަ ދައުރަކަށް އިންތިޚާބުވެވެޑައިގެންފިއެވެ.
އެ ގައުމަށް ރެފިއުޖީން އެތެރެވުމާ ދެކޮޅު އަދި އީޔޫ އިން ރަޝިއާ އަށް ދަތިކުރުމުގެ ފިޔަވަޅު އެޅުމަށް ދެކޮޅު ހެއްދެވި ޒީމަން އަށް އިންތިޚާބުގައި 52 އިންސައްތަ ލިބިވަޑައިގެންފައިވެއެވެ.
އީޔޫއަށް ތާއީދު ކުރައްވައި ދްރައޯޝްއަކީ އިލްމީ ބޭފުޅެއް ނަމަވެސް ސިޔާސީ ތަޖުރިބާ ހުންނެވި ބޭފުޅެއް ނޫނެވެ.
ހޮނިހިރު ދުވަހު ނެގި ވޯޓުގައި ވޯޓުލުމުގެ ހައްގު ލިބިފައިވާ މީހުންގެ 66 އިންސައްތަ މީހުން ވޯޓްލާފައިވެއެވެ.
ޗެކް ރިޕަބްލިކްގެ ރައީސްގެ މަޤާމަކީ ނުފޫޒު ގަދަ މަގާމަކަށް ވާއިރު ޒީމަން އަށް ބޮޑުވަޒީރުގެ މަގާމަށް ބޭފުޅަކު އައްޔަން ކުރެއްވުމުގެ ބާރު ލިބިވަޑައިގަންނަވާނެއެވެ. އަދި ގާނޫނުހަދާ މަޖިލީހުން ފާސްކުރާ ބިލްތައް ތަސްދީގު ކުރައްވާނީ ވެސް ރައީސްއެވެ.
ޒީމަން ވަނީ ބިލިއަނަރ އަންދްރެޖް ބަބިޝް ބޮޑުވަޒީރު ކަމަށް އައްޔަން ކުރައްވާނެކަމަށް ވައުދުވެވަޑައިގެންފައެވެ.
ޒީމަންގެ ވެރިކަމުގެ މިހާރު ހިނގަމުންދާ ދައުރު މާޗް މަހުގެ ނިޔަލަށް ދެމިގެންދާއިރު ބޮޑުވަޒީރު ކަމަށް ބަބިޝް އަންނަ މަހު އައްޔަން ކުރެއްވުމަށް ގެންދަވަނީ މަސައްކަތް ކުރައްވަމުންނެވެ.
މީގެ އިތުރުން ސެންޓްރަލް ބޭންކްގެ ބޯޑް މެމްބަރުންނާއި ފަނޑިޔާރުން އައްޔަން ކުރެއްވުމުގެ ބާރު ވެސް ޒީމަން އަށް ލިބިވަޑައިގަންނަވާނެއެވެ.
