3333 މެމްބަރުން ހަމަކޮށް އެމްޓީޑީ ރަޖިސްޓްރީ ކުރަން އީސީއަށް ހުށައަޅައިފި
18 ޑިސެމްބަރު 2018 | އަންގާރަ 07:14އެޕާޓިއަށް އެންމެ ފުރަތަމަ ސޮއިކުރެއްވީ ކުރީގެ ނައިބް ރައީސް އަހްމަދު އަދީބު
3333 މެމްބަރުން ހަމަކޮށް އެމްޓީޑީ ރަޖިސްޓްރީ ކުރަން އީސީއަށް ހުށައަޅަނީ
މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ) އުފެއްދުމަށް ދީފައިވާ ހުއްދައިގެ ދަށުން 3333 މެމްބަރުން ހަމަކޮށް އިލެކްޝަންސް ކަމިޝަން (އީސީ)އަށް ހުށައަޅައިފިއެވެ.
އެމްޓީޑީގެ ނަމުގައި ސިޔާސީ ޕާރޓީއެއް އުފެއްދުމަށްޓަކައި ކުރަންޖެހޭ ކަންކަން ކުރުމުގެ ހުއްދަ އިލެކްޝަންސް ކޮމިޝަނުން ދީފައި ވަނީ ނޮވެމްބަރު މަހުގެ 29 ވަނަ ދުވަހުއެވެ.
ސިޔާސީ ޕާޓީއެއް އުފެއްދުމަށްޓަކައި ތިންމަސް ދުވަހުގެ ތެރޭގައި ތިންހާސް މީހުން ހަމަކުރަންޖެހެއެވެ. އަދި ސަރުކާރުން ސިޔާސީ ޕާޓީތަކަށް ދޫކުރާ ފައިސާ ލިބޭނީ 10000 މެންބަރުން ހަމަވާ ޕާޓީތަކަށް އެކަންޏެވެ.
ރާއްޖޭގައި މި ވަގުތު ރަޖިސްޓްރީ ކޮށްފައި އޮތީ ހަ ސިޔާސީ ޕާޓީއެކެވެ. އެއީ ޕީޕީއެމާއި އެމްޑީޕީގެ އިތުރުން ޖުމްހޫރީ ޕާޓީ އާއި އަދާލަތު ޕާޓީ އާއި ޑީއާރުޕީ އަދި އެމްޑީއޭއެވެ. އިލެކްޝަނަށް ތިން ހާސް މެމްބަރުން ހަމަކޮށް ހުށަހެޅުމުން އިލެކަޝްނުން ޕާޓީ ރަޖިސްޓްރީ ކުރުމަށްޓަކައި ބާއްވަން ޖެހޭ ޖަލްސާ ބޭއްވުމުގެ ހުއްދައެއް ދޭން ޖެހޭނެއެވެ. އިލެކްޝަނުން މޮނީޓާ ކުރާ މި ޖަލްސާގައި ޕާޓީގެ އަސާސީ ގަވާއިދާއި ބައެއް މުހިއްމު އަސާސްތައް ފާސްކުރަން ޖެހޭނެއެވެ.
އެމްޓީޑީ ރެޖިސްޓަރ ކުރުމަށް ހުށަހަޅާފައިވާއިރު، އެ ޕާޓީއަށް އެންމެ ފުރަތަމަ ސޮއިކުރެއްވި ބޭފުޅަކީ ކުރީގެ ނައިބް ރައީސް އަހުމަދު އަދީބެވެ. އެމްޓީޑީ ރަޖިސްޓްރީ ކުރުމަށް ފޯމު ހުށައަޅާފައިވާއިރު ޕީޕީއެމްގެ ބާރުތައް ކުރީގެ ރައީސް އަބްދުﷲ ޔާމީންގެ އަތްޕުޅުން ގެއްލިދާނެ ކަމުގެ ބިރަށް އެމަނިކުފާނު އިސްވެ ހުންނަވައިގެން އާ ސިޔާސީ ޕާޓީއެއް އުފެއްދުމުގެ މަސައްކަތް ވަނީ ފައްޓަވާފައެވެ. އެ ޕާޓީ އުފެއްދުމަށް ސޮއި ހަމަކުރުމުގެ މަސައްކަތް ކުރުމުގެ ހުއްދަ އިލެކްޝަން ކޮމިޝަނުން އަދި ދީފައި ނުވާއިރު، ގައުމީ ވިންދުގެ ނަމުގައި ޕާޓީއެއް އުފެއްދުމުގެ ހުއްދަ އިލެކްޝަން ކޮމިޝަނުން ދާދި ފަހުން ވަނީ ދީފައެވެ. އަދި އުފެއްދުމަށް ހުއްދަ ދީފައިވާ މޯލްޑިވްސް ލޭބާ އެންޑް ސޯޝަލް ޖަސްޓިސް ޕާޓީ(ލޭބާ ޕާޓީ)އިން ވަނީ ޕާޓީ ރެޖިސްޓަރ ކުރުމަށް ބޭނުންވާ 3000 ސޮއި ހަމަކޮށް އިލެކްޝަން ކޮމިޝަނަށް ހުށަހަޅާފައެވެ.
