ބޮޑުވަޒީރު ރަނިލްއަށް ނަމަލް ރާޖަޕަކްސަ މަރުހަބާ ވިދާޅުވެއްޖެ
17 ޑިސެމްބަރު 2018 | ހޯމަ 05:39ބޮޑުވަޒީރުކަމުގެ މަގާމުން ރަނިލް ވަކިކުރެއްވީ އޮކްޓޯބަރމަހު
ސްރީ ލަންކާގެ ބޮޑުވަޒީރު ރަނިލް | އިންޑިއަން އެކްސްޕްރެސް
ސްރީ ލަންކާގެ ބޮޑުވަޒީރުކަމުގެ މަގާމަށް ރަނިލް ވިކްރަމަ ސިންހަ އަލުން އައްޔަން ކުރެއްވުމުން، ގާނޫނުހަދާ މަޖިލީހުގެ މެމްބަރު ނަމަލް ރާޖަޕަކްސަ އެ މަނިކުފާނަށް މަރުހަބާ ވިދާޅުވެއްޖެއެވެ.
މިދިޔަ އޮކްޓޯބަރުމަހުގެ 26 ވަނަ ދުވަހު ބޮޑުވަޒީރުކަމުން ރަނިލް ވަކިކޮށް އެ މަގާމަށް ރައީސް މައިތިރިޕާލާ ސިރިސޭނާ އައްޔަން ކުރެއްވީ ނަަމަލްގެ ބައްޕާފުޅު އަދި ކުރީގެ ރައީސް މަހިންދަ ރާޖަޕަކްސަައެވެ.
ބޮޑުވަޒީރުކަމުގެ މަގާމުން ރާޖަޕަކްސަ އިސްތިއުފާ ދެއްވީ ހޮނިހިރު ދުވަހުއެވެ.
މަގާމުން އިސްތިއުފާ ދެއްވީ ރައީސް ސިރިސޭނާއަށް އާ ސަރުކާރެއް އެކުލަވައިލެއްވުމުގެ މަގު ފަހިކޮށްދެއްވަން ކަމަށާއި އަދި އެ މަގާމާ ހަވާލުވީ ވަގުތީ ގޮތުން ކަމަށް ވެސް ރާޖަޕަކްސަ ވިދާޅުވިއިރު މިދިޔަ ހަފްތާގައި އެ ގައުމުގެ ކޯޓް އޮފް އެޕީލްސްއިން ވަނީ އޭނާ އަށް ބޮޑުވަޒީރުކަމުގެ މަގާމުގެ މައްސޫލިއްޔަތު އަދާކުރުން މަނާކޮށް ކޯޓު އަމުރެއް ނެރެފައެވެ.
ރަނިލް އަލުން މަގާމަށް އައްޔަން ކުރެއްވުމުން މަރުހަބާ ވިދާޅުވެ ނަމަލް ކުރެއްވި ޓްވީޓެއްގައި ވިދާޅުވީ ސިޔާސީ ކަންކަން އެއްފަރާތްކުރުމަށްފަހު ރަނިލްއަށް މަރުހަބާ ވިދާޅުވާކަމަށެވެ. އަދި އެންމެ ކުޑަމިނުން މިހާރު ގައުމުގެ އިސްތިގުލާލު ކަށަވަރުކުރުމަށް އެމަނިކުފާނު މަސައްކަތްކުރައްވާނެކަމަށާއި، ހުޅަނގުގެ މަސްލަހަތަށްވުރެ ރައްޔިތުންނަށް ދިމާވެފައިވާ މައްސަލަތަކަށް އިސްކަން ދެއްވާނެކަމަށް އުއްމީދު ކުރައްވާކަމަށް ނަމަލް ވިދާޅުވެފައިވެއެވެ.
ރަނިލް ބޮޑުވަޒީރު ކަމުގެ ހުވާކުރައްވާފައި ވަނީ އާދީއްތަ ދުވަހު ހެނދުނު ވަގުތެއްގައި ރައީސް މައިތިރިޕާލާ ސިރިސޭނާގެ ކުރިފުޅުމަތީގައެވެ.
