ޕެޑް ޓެކްސް ބަހުސުން ހުތުރު މަންޒަރެއް: ހީ ސަމާސާކޮށް، މަލާމާތް ވެސް ކުރި!

ޕެޑުން ޓެކްސް ނެގުން ހުއްޓާލުމަކީ ރައީސް އިބްރާހިމް މުހައްމަދު ސޯލިހުގެ 100 ދުވަހުގެ ވައުދުގެ ތެރޭގައި ހިމެނޭ ކަމެކެވެ. ޕެޑުން ޓެކްސް ނަގަމުންދާތީ އެކަމާ ދެކޮޅަށް އެންމެ ފުރަތަމަ ކެމްޕެއިން ފަށާފައިވަނީ 2016 ވަނަ އަހަރުއެވެ. ޕެޑުން ޓެކްސް ނެގުން ހުއްޓާލުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލު ހުށަހެޅުއްވީ ބުދަ ދުވަހުގެ ހެނދުނު ކުރެންދޫ ދާއިރާގެ މެމްބަރު އަބްދުލް ބާރީ އަބްދުﷲ އެވެ.

ބުދަ ދުވަހުގެ ރޭ މި ބިލަށް މަޖިލީސް މެމްބަރުން ބަހުސް ކުރަމުން ދިޔައިރު ބައެއް މަޖިލީސް މެމްބަރުންގެ ފަރާތުން ފެނިގެން ދިޔައީ ވަރަށް ލަދުކުޑަ އަމަލެކެވެ. ބައެއް މަޖިލީސް މެމްބަރުން މި ބިލަށް ބަހުސް ކުރަމުން ދިޔައިރު އަނެއްބައި މަޖިލީސް މެމްބަރުން އެ މެމްބަރުން ޕެޑުގެ ވާހަކަ ދެއްކެވުމުން މާލާމަތުގެ ރާގަށް ހީ ހަދާފައިވެއެވެ. މިކަމުގެ ސަބަބުން ވާހަކަ ދައްކަވަމުންދިޔަ މަޖިލީސް މެމްބަރުންނަށް ވަނީ ވާހަކަ ދައްކަން ވެސް އުނދަގޫވެފައެވެ.

ސަރުކާރުގެ ފަރާތުން އެ ބިލު މަޖިލީހަށް ހުށަހަޅުއްވަމުން މެމްބަރު ބާރީއަށް ވާހަކަފުޅު ދައްކަވަން ދަތިތަކާ ކުރިމަތިވީ މެމްބަރުން ހީ ސަމާސަ ކުރުމުގެ ސަބަބުންނެވެ.

އޭގެ އިތުރުން، އެ ބިލު ކޮމެޓީން ފާސްކޮށް، ތަޅުމަށް ހުށަހެޅުމުން ވެސް ބައެއް މެމްބަރުންގެ ފަރާތުން ފެނުނީ އެފަދަ ހިތާމަވެރި މަންޒަރެވެ. ކޮމެޓީން މަޖިލީހަށް ހުށަހެޅި ރިޕޯޓަށް އޭދަފުށީ ދާއިރާގެ އަހުމަދު ސަލީމް (ރެޑްވޭވް ސަލީމް) ވާހަކަފުޅު ދައްކަވަމުން ގެންދެވި ވަގުތު ބައެއް މެމްބަރުން ވަނީ މަލާމާތުގެ ރާގަށް ތަޅުމުގައި އަޑުން އަޑު ނަގައި ހީ ސަމާސާ ކޮށްފައެވެ.

ސަލީމް ވިދާޅުވީ އެއީ ހޭން ޖެހޭ ވަރުގެ ކަމެއް ނޫން ކަމަށާއި އެއީ ދައްކަން މުހިންމު ވާހަކައެއް ކަމަށެވެ.

ރައްޔިތުންގެ މަޖިލީހުގެ މެމްބަރުންނަކީ ރައްޔިތުން ތަމްސީލް ކުރުމަށްޓަކައި މަޖިލީހުގައި ތިބޭ މެމްބަރުންތަކެކެވެ. ރައްޔިތުންގެ މަންދޫބުންނަކީ މަޖިލީސް މެމްބަރުންނެވެ. ގާނޫނީ ނިޒާމާއި އިޖުތިމާއީ ފޭރާމާއި އިގްތިސާދީ އޮނިގަނޑު ބައްޓަން ކުރަން ތިބީ އެ މެމްބަރުންނެވެ. ގާނޫނު ހަދާ މެމްބަރުން ގާނޫނުގެ ކުރިމަތީގައި ނަމޫނާ ދައްކަން ޖެހެއެވެ. މަޖިލީސް ތަޅުމުގައި އެގޮތަށް ހީ ސަމާސާކޮށް، މަލާމާތްކޮށްފައިވާ މެމްބަރުންނަކީ ކޮބައިކަމެއް ނޭނގެއެވެ.

އަންހެނުންގެ ޒަރޫރީ ބޭނުމަކާ ގުޅިފައިވާ އެފަދަ އެއްޗަކުން ޓެކްސް ނެގުން ހުއްޓާލުމަށް ސަރުކާރުން ހުށަހެޅި ބިލަށް ތާއިދުކޮށް، ވޯޓު ދިން ގޮތަށް "އަމަލުން" ވެސް އެކަން ސާބިތު ކޮށްދޭން ޖެހެއެވެ.