ގަތަރުގެ މައްސަލައަށް މަތިންބައިން ޖެހިގެން ވަނުމުން ރާއްޖޭގެ ނަން ހުތުރު ވަނީ!

މިހާރު އެންމެ ބާރަށް ދެކެވުމުންދާ ވާހަކައަކީ އަރަބި ބައެއް ގައުމުތަކުން ގަތަރާ އޮތް ގުޅުން ކަނޑާލުމުގެ ވާހަކައެވެ. ގަތަރާ އޮތް ގުޅުން ސައުދި އަރަބިއްޔާ ފަދަ ގައުމުތަކުން ކަނޑާލާފައިވަނީ އެކި އެކި ތުހުމަތުތައް ކުރުމަށްފަހު އެވެ. އެއާއެކު ޔުނައިޓެޑް އަރަބް އެމިރޭޓްސް، ބަހުރޭން، އިޖިޕްޓް އަދި ޔަމަންއިން ވަނީ ގަތަރާ ގުޅުން ކަނޑާލާފައެވެ. އޭގެ އިތުރަށް މިކަންތަކާ ނުވެސް ބެހޭ ކުޑަކުޑަ ރާއްޖެއިން ވެސް ވަނީ ސައުދީގެ ނިންމުމާއެކު ކަހަލަގޮތަކަށް ގަތަރާ ގުޅުން ކަނޑާލާފައެވެ.

ރާއްޖެއާއެކު ޖުމްލަ ހަ ގައުމުން މިވީތަނަށް ގަތަރާ އޮތް ގުޅުން ކަނޑާލާފައި ވާއިރު، ބައިނަލްއަގުވާމީ އެހެން ގައުމުތަކުން ތިބީ މިކަންތަކާ ބަސްނުބުނެ ދުރުގައި ކުޅިބަލާށެވެ. އެގޮތުން ރާއްޖެ ފަދަ ކުޑަ ގައުމަކުން ކުއްލިއަކަށް ގަތަރާ ގުޅުން ކަނޑާލުމުން ވެސް އެތައްބަޔަކަށްވީ ޖޯކަކަށެވެ. އެހެންނަމަވެސް ދިމާވެގެން މިއުޅޭ މައްސަލަ ވަރަށް ސީރިއަސްއެވެ. ހައްދުފަހަނަ އަޅާފައިވާ ޖަމާއައްތަކަށް ހަރަދުކޮށް އެ ޖަމާއަތްތަކަށް އެއްބާރުލުންދޭކަމުގެ އިނގިލިތައް ގަތަރަށް އަމާޒުވުމެވެ. މީގެ އިތުރުން ގަތަރުން އިރާނާ ގުޅުން ބަދަހިކުރާކަމަށް ވެސް ތުހުމަތުތަކެއް ވަނީ ކުރެވިފައެވެ. މިކަންތައްތައް އެގައުމުން ދޮގުކުރެއެވެ. އެގޮތުން އެގައުމުން ބުނީ އެފަދަ އެއްވެސް ކަމެއް ކޮށްފައިނުވާ ކަމަށާއި، އެއި ހަގީގަތެއް ނެތް ދޮގު ވާހަކަތަކެއް ކަމަށެވެ.

ރާއްޖެއަށް ބަލާއިރު، ހައްދުފަހަނައަޅާފައިވާ ޖަމާއަތްތަކާ ގުޅުމަށް ދިވެހިން އަމިއްލަ ފަސްގަނޑު ދޫކޮށްލުމަށްފަހު ދެއެވެ. މިކަމަށްވެސް ފަންޑުކުރަނީ ހަމަ ރާއްޖޭ މީހުންކަމަށް ބައެއް ފަރާތްތަކުން ބުނެއެވެ. އެގޮތުން އެ ފަރާތްތައް ހޯދުމަށް ސަރުކާރުން އަންނަނީ މަސައްކަތްވެސް ކުރަމުންނެވެ. އެހެންނަމަވެސް މައްސަލައަކީ ފުރަތަމަ ރާއްޖޭގައި އުޅޭ ހައްދުފަހަނައަޅާފައިވާ ޖަމާއަތްތަކަށް ހަރަދުކުރާ މީހުން ނުހޯދާ އެކަމަށް ހަރަދުކުރާ ގައުމުތަކާ ގުޅުން ކަނޑާލުމެވެ. ހަމަ އެހެން ގައުމުތަކުންވެސް ރާއްޖެއިން ޓެރެރިސްޓް ޖަމާއަތްތަކަށް ހަރަދުކުރެއޭ ކިޔާފައި ގުޅުން ކަނޑާލެވިދާނެއެވެ. ރާއްޖޭގައި ޓެރެރިސްޓުން ގިނަވަމުންދާކަމަށް ބުނެވިދާނެއެވެ.

މައްސަލައެއް ނެތެވެ. ރާއްޖެއިން އެއޮތީ ކޮންމެއަކަސް ގަތަރާ އޮތް ގުޅުން ކަނޑާލާފަ އެވެ. ދިވެހި ސަރުކާރުން ބުނެފައިވަނީ ގަތަރާ ގުޅުން ކަނޑާލާފައިވަނީ ހަމައެކަނި ސިޔާސީ ގުޅުން ކަމަށެވެ. އެހެންނަމަވެސް ސީއެންއެންފަދަ ބޮޑެތި ނިއުސް އެޖެންސީތަކުން ބުނަމުން އަންނަނީ ރާއްޖެއިން ގަތަރާ އޮތް ހުރިހާ ގުޅުމެއް ކަނޑާލި ކަމަށެވެ. ރާއްޖެއަށް ގަތަރުގެ ރައްޔަތުންނަށްވެސް ނާދެވޭ ކަމަށެވެ. މިއީ ރާއްޖެއަށް ވަރަށް ނޭދެވޭ އަސަރުކުރާނެ ކަމެކެވެ. ނަމަވެސް މި ވާހަކަތައް ރާއްޖެއިން ދޮގުކުރެ އެވެ. ރާއްޖެއިން ބުނަނީ ހަމައެކަނި ކަނޑާލީ "ސިޔާސީ ގުޅުން" ކަމަށާއި އެހެން ހުރިހާ ގުޅުމެއް އެބަ އޮތް ކަމަށެވެ.

ފޮރިން މިނިސްޓްރީން ބުނީ ރާއްޖެއަށް ގަތަރު ރައްޔަތުންނަށް އާދެވޭނެ ކަމަށާއި، ރާއްޖޭގައި ދިރިވެސް އުޅެވިދާނެ ކަމަށެވެ. މީގެއިތުރުން އާންމު ފަރުދުންނާ މުއާމަލާތްކުރެވޭނެ ކަމަށްވެސް އެ މިނިސްޓްރީން ވަނީ ބުނެފައެވެ. އަދި ވިޔަފާރީގެ އެއްވެސް ގުޅުމެއް ކަނޑާލާފައިނުވާނެ ކަމަށާއި، ވިޔަފާރީގެ ގުޅުން ބަދަހިކުރާނެ ކަމަށްވެސް ފޮރިން މިނިސްޓްރީން ބުނެއެވެ.

ސަރުކާރުގެ ވާހަކަ މިހެން ހުރި ނަމަވެސް ގަތަރަކީ އަމިއްލަ ފައިމައްޗަށް ތެދުވެ، ދުނިޔޭގެ އެންމެ ކުރިއަރާފައިވާ އެއް ގައުމަށް ވާއިރު، ގަތަރާ ގުޅުން ކަނޑާލުމަކީ ދިވެހިރައްޔިތުންނަށް ކޮޅުން ނުލާވަރުގެ ގެއްލުމެކެވެ. ގަތަރަކީ ރާއްޖޭގެ އުމްރާނީ ތަރައްގީގެ ބައިވެރިއެކެވެ. އެގޮތުން ބެލެވޭ ގޮތުގައި ގަތަރުން ރާއްޖެއަށް ދޭން އެއްބަސްވެފައިވާ އެތައް އެހީތަކެއް ކަނޑާލާނެ ކަމަށްބެލެވެއެވެ. އެ އެހީތައް ލިބޭނެކަމާމެދު މިހާރު ސަރުކާރުވެސް ޝައްކެވެ.