ދިރާސީ އާ އަހަރު ރާއްޖޭގެ ސްކޫލްތަކުގެ ކުދިން ފަށާފައިވަނީ މުޅިން އާ ކަމަކާ އެކުގައެވެ. ދަރިވަރުންނަށް ނާސްތާ ފޯރުކޮށްދޭން ފެށުމެވެ. ފުރަތަމަ ޓާމްގައި މި ޕްރޮގްރާމް ކުރިއަށް ގެންދިއުމަށް ރާވާފައި ވަނީ 25 ސްކޫލެއްގެ 14،720 ކުދިންނަށެވެ. މި ސްކޫލްތަކުން އާދީއްތަ ދުވަހުގެ ހެނދުނު ފެނިގެން ދިޔައީ މުޅިން ތަފާތު މަންޒަރެކެވެ. ކުރިން ގެއިން ނާސްތާ ނަގައިގެން އަންނައިރު، އާދީއްތަ ދުވަހު ފެނިގެން ދިޔައީ ސްކޫލްގެ އެއްތަނެއްގައި ތިބެ ހެނދުނު ސައި ބުއިތަނެވެ. ދަރިވަރުން މިކަން ފާހަގަކޮށްފައިވަނީ ވަރަށް ރަނގަޅު ކަމެއް ގޮތުގައެވެ.
ސިއްހަތަށް ފާއިދާހުރި ނާސްތާއެއް ނެގުމަކީ ކުދިންގެ ހެދި ބޮޑުވުމަށް މުހިންމު ކަމެކެވެ. ނާސްތާ ދިނުމަށް ސަރުކާރުން މި ފެށި 50 މިލިއަން ރުފިޔާގެ ޕްރޮގްރާމަކީ ދަރިވަރުން ވަރަށް ބޮޑަށް ބޭނުންވެފައިވާ ކަމެއް ކަން އެނގެނީ އެ ކުދިންގެ އިހްސާސްތައް ހާމަކުރުމުންނެވެ.
"މިއީ ވަރަށް ރަނގަޅު ކަމެއް ކަމަށް. ކުރިއަށް މިކަން ގެންގޮސްފިއްޔާ ވަރަށް އުފާވާނެ،" އަމީނިއްޔާ ސްކޫލްގެ ދަރިވަރަކު ބުންޏެވެ.
ހެނދުނު ބައެއް ކުދިން ސްކޫލަށް ދަނީ ފުރިހަމަ ނާސްތާއެއް ނުނަގަ އެވެ. މިއީ އެ ކުދިންގެ ހެދިބޮޑުވުމަށާއި އުނގެނުމަށް ވެސް ގެއްލުން ހުރި ކަމެކެވެ. އިންސާނީ ވަސީލަތްތައް ތަރައްގީ ކުރުމަކީ މި ސަރުކާރުގެ އެންމެ މުހިންމު އަމާޒުކަމަށްވާއިރު، މުސްތަގުބަލުގެ ލީޑަރުންނަށް މިހާރު ސަރުކާރުން މިކުރާ އިންވެސްޓްމެންޓަކީ އަގުހުރި ކަމަކަށް ވާނެ އެވެ. ހެނދުނުގެ ނާސްތާ ދިނުމަކީ އެފަދަ އިންވެސްޓްމެންޓެކެވެ. އެކަން ދަރިވަރުން ވެސް ބަލައިގަތީ އުފަލުންނެވެ.
"ވަރަށް އެންޖޯއި ކޮށްފިން. މިއީ އަސްލު ވަރަށް ރަނގަޅު ކަމެއް. ގިނަ ކުދިން ހެނދުނުގެ ނާސްތާ ނުކޮށް ސްކޫލަށް އަންނައިރު، އެ ކުދިންނަށް ނާސްތާ ލިބިގެން ދިއުމަކީ ވަރަށް ރަނގަޅު ކަމެއް" ދަރިވަރު ބުންޏެވެ.
މާލޭގެ ކުލި ބޮޑުވުމާއި ތަކެތީގެ އަގު ބޮޑުވުމަކީ ރަނގަޅު ނާސްތާއެއް ފޯރުކޮށް ނުދެވޭ އެއް ސަބަބެވެ. ނަމަވެސް ސަރުކާރުން މި ފެށި ޕްރޮގްރާމުގެ ސަބަބުން މައިންބަފައިން ކުރާ ހަރަދު ކުޑަވެ، ޖީބަށް ލުއިވެ އެވެ.
"އިންޓަރވަލް ގަންނަން ނުޖެހޭ. ވަގުތު ސަލާމަތްވޭ. ވަރަށް ރަނގަޅު ކަމެއް. އެންމެނަށްވެސް ވަރަށް ރަނގަޅު ކަމެއް."
ރަނގަޅު މާރކްސް ހޯދުމަށާއި، ކްލާހުގައި ނަގައިދޭ ފިލާވަޅު ހަނދާނުގައި ހަރުލެއްވުމަށް ދަރިވަރުންނަށް ރަނގަޅު ނާސްތާއެއް ފޯރުކޮށްދިނުމަކީ މުހިންމު ކަމެއް ކަމަށް ޖަޕާން އަދި އެމެރިކާގައި ހެދި ދިރާސާތަކުންވަނީ ދައްކާފައެވެ. އަދި މި ކަމަކީ ދުނިޔޭގެ ގައުމުތަކުގައި މިހާރުވެސް ކުރަމުން އަންނަ ކަމެކެވެ. ރާއްޖޭގައި އަލަށް މިކަން ފެށިއިރު،ފުރަތަމަ ދުވަހާއި ބަލާފައި ރަނގަޅު ކަމަށް ދަރިވަރުންވަނީ ބުނެފައެވެ. ކުރިމަގުގައި މި އަށްވުރެ ރަނގަޅު ވާނެ ކަމަށް އުއްމީދު ކުރާ ކަމަށް ދަރިވަރަކުވަނީ ބުނެފައެވެ.
ދަރިވަރުން ވަނީ ސަރުކާރުގެ ހެނދުނުގެ ނާސްތާ ޕްރޮގްރާމް ވަރަށް ބޮޑަށް ބަލައިގެންފައެވެ. ދަރިވަރުންގެ އުއްމީދަކީ ދިމާވާ ގޮންޖެހުންތަކުން އަރައިގަނެ ސަރުކާރުން މިކަން ދެމެހެއްޓެނިވި ގޮތަކަށް ކުރިއަށް ގެންދިއުމެވެ. ސްކޫލްތަކުގެ ދަރިވަރުންނާއި ބެލެނިވެރިންގެ ހިޔާލާއި މަޝްވަރާ އާއި އެކުގައި ސަރުކާރުން މިކަން ކުރިއަށް ގެންގޮސްފިނަމަ މިއީ ދަރިވަރުންނާއި ބެލެނިވެރިން ބަލައިގަންނަ ކާމިޔާބު މަސައްކަތަކަށް ވެގެންދާނެ ކަމީ ޝައްކެއް އޮތް ކަމެއް ނޫނެވެ.
