ޕީޕީއެމްގެ ބައެއް މެމްބަރުންނަށް ޕްރައިމަރީއަކާ ނުލާ ޓިކެޓް ދެނީ
28 ނޮވެމްބަރު 2018 | ބުދަ 06:23ރޭގެ ބައްދަލުވުމުގައި ކުރީގެ ރައީސް ޔާމީން ބައިވެރިވެވަޑައިގެންނެވި
އަހްމަދު ނިހާން ހުސައިން މަނިކު
ރައްޔިތުންގެ މަޖިލީހުގައި ތިއްބެވި ޕީޕީއެމްއަށް ނިސްބަތްވާ ބައެއް މެމްބަރުންނަށް ޕްރައިމަރީއަކާ ނުލާ ޕާޓީގެ ޓިކެޓް ދޭން ހަމަޖެހިފައިވާ ކަމަށް އެ ޕާޓީގެ ޕީޖީ ލީޑަރު އަހްމަދު ނިހާން ހުސައިން މަނިކު ވިދާޅުވެއްޖެއެވެ.
ނިހާނު އެކަމަށް އިޝާރާތް ކުރައްވާ ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ އިންތިޚާބާއި ބެހޭ މުހިއްމު ބައްދަލުވުމެއް އަންގާރަ ދުވަހުގެ ރޭ ބާއްވާފައިވާ ކަމަށެވެ. އަދި އެ ބައްދަލުވުމުގައި ކުރީގެ ރައީސް ޔާމީން އަބްދުލްގައްޔޫމް ބައިވެރިވެވަޑައިގެންފައިވާކަމަށް ވިދާޅުވިއެވެ. ނިހާނުގެ ޓްވީޓުގައި ވިދާޅުވީ މިހާރު ތިއްބެވި ޕީޕީއެމްގެ ބައެއް މެމްބަރުންނަށް ބުދަދުވަހު ޕްރައިމަރީއަކާ ނުލާ ޓިކެޓް ލިބިދާނެ ކަމަށެވެ.
ޕްރައިމަރީ އަކާ ނުލާ ޕީޕީއެމްގައި މިހާރު ތިއްބެވި ބައެއް މަޖިލިސް މެމްބަރުންނަށް ޓިކެޓް ލިބިދާނެކަމަށް ނިހާން ވިދާޅުވިއިރު އެޕާޓީއަށް ނިސްބަތްވާ ބައެއް މެމްބަރުން ވަނީ ޖުމްހޫރީ ޕާޓީއަށާއި އެމްޑީޕީއަށް ސޮއި ކުރައްވާފައެވެ.
ރައްޔިތުންގެ މަޖިލީހުގެ އިންތިޚާބު ބާއްވަން ތައްޔާރު ވަމުން ދަނީ 2019 ވަނަ އަހަރުގެ މާޗް މަހުތެރޭގައެވެ.
