މާލިއްޔަތު ކޮމެޓީގެ މުޤައްރިރަކަށް ނާޝިދު ކަނޑައަޅައިފި
ނާޝިދު ހަމަޖެއްސީ ކޮމެޓީގެ އަޣްލަބިއްޔަތުން
ކޮމަންޑޫ ދާއިރާގެ މެމްބަރު އަހުމަދު ނާޝިދު
ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު ކަމަށް އެމްޑީޕީއަށް ނިސްބަތްވާ ކޮމަންޑޫ ދާއިރާގެ މެމްބަރު އަހުމަދު ނާޝިދު އަދި ކޮމެޓީގެ ނައިބު މުޤައްރިރަކަށް ކުޑަހުވަދޫ ދާއިރާގެ މެމްބަރު އަހުމަދު އާމިރު ކަނޑައަޅައިފިއެވެ.
މިގޮތައް ކަނޑައަޅާފައި މިވަނީ މަޖިލީހުގައި މެމްބަރުން ތަމްސީލް ކުރައްވަމުން ގެންދެވި ޕާޓީ، ބައެއް މެންބަރުން ބަދަލުކުރެއްވުމާ ގުޅިގެން އެ ބަދަލާއެކު މަޖިލީހުގެ ކޮމިޓީތައްވެސް އަލުން އެކުލަވާލުމާ ގުޅިގެންނެވެ.
ހޯމަ ދުވަހު ބޭއްވި މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި އެކޮމިޓީގެ މުގަރިރަކަށް އެމްޑީޕީގެ ކޮމަންޑޫ ދާއިރާގެ މެންބަރު އަހްމަދު ނާޝިދު (އޭޑީކޭ ނާޝިދު) ހަމަޖެއްސުމަށް ފާސްވީ ކޮމިޓީގައި އެވަގުތު ތިއްބެވި 13 މެންބަރުންގެ ތެރެއިން ވޯޓުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ.
މާލިއްޔަތު ކޮމިޓީގެ ނައިބް މުގައްރިރަކަށް އެމްޑީއޭގެ ކުޑަހުވަދޫ ދާއިރާގެ މެންބަރު އަހްމަދު އާމިރު ކަނޑައެޅުމަށް ފާސްވީ ހަތް މެމްބަރުންގެ އަޣްލަބިއްޔަތުންނެވެ. އޭނާ އަކީ މީގެކުރިންވެސް މާލިއްޔަތު ކޮމިޓީގައި ނައިބް މުގައްރިރުކަން ކުރައްވާފައިވާ ބޭފުޅެކެވެ.
މަޖިލީހުގެ މާލިއްޔަތު ކޮމިޓީ އަލުން އެކުލަވާލިއިރު މާލިއްޔަތު ކޮމިޓީގައި މިހާރު ތިއްބެވީ ޕީޕީއެމްގެ ފަސް މެމްބަރުންނާއި އެމްޑީއޭގެ މެމްބަރަކާއި ވެރިކަން ކުރާ ކޯލިޝަންގެ ހަތް މެމްބަރުންނެވެ.
މާލިއްޔަތު ކޮމިޓީގެ މައިގަނޑު މަސްއޫލިއްޔަތަކީ ދައުލަތުގެ މާލިއްޔަތާއި ގުޅުންހުރި ކަންކަން ބެލުމާއި، ކަމާގުޅުންހުރި ފަރާތްތައް ޖަވާބުދާރީކުރުވުމާއި، ދައުލަތުގެ ބައެއް މަގާމުތަކުގެ މުސާރަތައް ބަލައި މުރާޖައާކޮށް ގޮތްތަކެއް ނިންމުމެވެ.
