އެތައް އަހަރަކަށް ފަހު މާލިއްޔަތު ކޮމެޓީން ރިޔާޒް ރަޝީދު ވަކިކޮށްފި
17 ވަނަ ރައްޔިތުންގެ މަޖިލީހުގައި ވެސް މާލިއްޔަތު ކޮމެޓީގެ މެންބަރެއް
ވިލުފުށީ ދާއިރާގެ މެންބަރު ރިޔާޒް ރަޝީދު
އެތައް އަހަރަކަށް ފަހު ރައްޔިތުންގެ މަޖިލީހުގެ މާލިއްޔަތު ކޮމެޓީއިން، ވިލުފުށީ ދާއިރާގެ މެންބަރު ރިޔާޒް ރަޝީދު ވަކިކޮށްފި އެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލިސް ރައީސް އަބްދުﷲ މަސީހު ވަނީ މާލިއްޔަތު ކޮމެޓީން ރިޔާޒް ވަކިކޮށް، އެ ކޮމެޓީއަށް ފޭދޫ ދާއިރާގެ މެންބަރު އިބްރާހިމް ދީދީ ހަމަޖައްސާފައިވާކަން އިއުލާނުކޮށްފައެވެ.
ރިޔާޒުއަކީ މާލިއްޔަތު ކޮމެޓީގެ މެންބަރު ކަމުގައި ހުންނަވާތާ އެންމެ ގިނަ ދުވަސްވީ އެއް މެންބަރެވެ. އެގޮތުން މާލިއްޔަތު ކޮމެޓީއަށް ފުރަތަމަ ރިޔާޒް ހަމަޖެއްސީ 17 ވަނަ ރައްޔިތުންގެ މަޖިލީހުގައެވެ. އެއިރު ރިޔާޒް ހުންނެވީ، މިހާރު އުވިފައިވާ ގައުމީ ޕާޓީގައެވެ.
އޭގެ ފަހުން މިހިނގާ ރައްޔިތުންގެ މަޖިލީހުގެ 18 ވަނަ ދައުރަށް އިންތިޚާބުވެ ވަޑައިގެންނެވި ފަހުން ވެސް މާލިއްޔަތު ކޮމެޓީގެ މެންބަރު ކަމަށް ރިޔާޒް ވަނީ ހަމަޖައްސާފަ އެވެ.
މާލިއްޔަތު ކޮމެޓީން ރިޔާޒް ވަކިކުރި ވަކި ސަބަބެއް ޕީޕީއެމް ޕާލިމެންޓްރީ ގްރޫޕުން ހާމައެއް ނުކުރެ އެވެ. މިކަމާ ގުޅޭ ގޮތުން ރިޔާޒުގެ ބަހެއް ހޯދަން ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.
