އިންތިހާބާ ބެހޭ ގައުމީ ލަފާދޭ ކޮމެޓީގެ ކުއްލި ބައްދަލުވުމެއް މިރޭ ބާއްވާނީ
ބައްދަލުވުން ބޭއްވުމަށް ހަމަޖެހިފައި ވަނީ މިރޭ 08:00 ގައި
އިލެކްޝަން ކޮމިޝަން
ކުރިއަށް އޮތް ލޯކަލް ކައުންސިލް އިންތިހާބަށް އެކުލަވާލާފައިވާ ގައުމީ ލަފާދޭ ކޮމެޓީގެ ކުއްލި ބައްދަލުވުމެއް މިރޭ ބާއްވަން ނިންމައިފިއެވެ.
ކައުންސިލް އިންތިހާބުގެ ކަންކަން ކުރިއަށް ގެންދާނެ ގޮތްތަކާ މެދު މަޝްވަރާ ކުރުމަށް އެކުލަވާލާފައިވާ އެ ކޮމެޓީގެ ބައްދަލުވުން ބޭއްވުމަށް ހަމަޖެހިފައި ވަނީ މިރޭ 08:00 ގައި އިލެކްޝަން ކޮމިޝަނުގައެވެ.
މި ކޮމެޓީގައި ހިމެނިވަޑައިގަންނަވާ ސިޔާސީ ޕާޓީތަކުގެ މަންދޫބުންނާއި މިނިވަން މުއައްސަސާތަކުގެ މަންދޫބުން ވަނީ އިލެކްޝަން ކޮމިޝަނުން ވަނީ މިރޭގެ ބައްދަލުވުމަށް ދައުވަތު ދީފައެވެ.
އެހެންނަމަސް މިއީ ކޮންކަމަކާ ގުޅިގެން ބާއްވާ މަޝްވަރާ ބައްދަލުވުމެއް ކަމެއް ނޭނގެއެވެ. ޖެނުއަރީ މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ ކައުންސިލް އިންތިޚާބު ފަސްކުރުމަށް ސިވިލް ކޯޓުން އަމުރުކުރުމާ ގުޅިގެން އޭޕްރީލް 8 ވަނަ ދުވަހު އިންތިޚާބު ބޭއްވުމަށް ނިންމާފައި ވަނީ ގައުމީ ލަފާދޭ ކޮމެޓީގައި މަޝްވަރާކުރުމަށް ފަހުއެވެ. އެއަށް ފަހު ކައުންސިލް އިންތިހާބުގެ ދެ ވަނަ ފަހަރަށް ފަސްކޮށްފައި ވަނީ އޭޕްރީލް 15 ގައެވެ.
ގައުމީ ލަފާ ދޭ ކޮމިޓީގެ ކުއްލި ބައްދަލުވުމެއް ބާއްވާ އިރު ރާއްޖޭގައި މިހާރު ފެތުރެމުންދާ އެޗްވަންއެންވަން ރޯގާއާ ގުޅިގެން އިންތިޚާބު އަނެއްކާ ވެސް ފަސްކުރަން އުޅޭކަމުގެ ވާހަކަތަކެއް ވަނީ ފެތުރިފައެވެ.
