ނިހާނު ހާޒިރު ނުވުމުން މާލިއްޔަތު ކޮމެޓީގެ ބައްދަލުވުން ކެންސަލް ކޮށްފި
ކޮމެޓީގެ އެޖެންޑާ: ކުޑަ ކޮމެޓީން ނިންމާފައިވާ ނިންމުތަކަށް މަަޝްވަރާކޮށް، ގޮތެއް ނިންމުން
ނިހާން: މާލިއްޔަތު ކޮމެޓީގެ މުގައްރިރަކީ ނިހާނު --
ރައްޔިތުންގެ މަޖިލީހުގެ މާލިއްޔަތު ކޮމެޓީގެ މުގައްރިރު އަދި މަޖިލީހުގެ މެޖޯރިޓީ ލީޑަރު، ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިންމަނިކު ކޮމެޓީއަށް ވަޑައިއިނުގެންނެވުމުގެ ސަބަބުން ކޮމެޓިގެ ބައްދަލުވުން ކެންސަލް ކޮށްފި އެވެ.
މާލިއްޔަތު ކޮމެޓީގެ މެމްބަރު ކުޅުދުއްފުށި އުތުރު ދާއިރާގެ މެމްބަރު އަބްދުލްގަފޫރު މޫސާ "ރާއްޖެއެމްވީ"އަށް ވިދާޅުވީ އަންގާރަ ދުވަހުގެ ބައްދަލުވުމަށް ނިހާނު ވަޑައިނުގެންނެވުމުގެ ސަބަބުން ކެންސަލް ކޮށްފައިވާ ކަމަށެވެ. ގަފޫރު އެގޮތަށް ވިދާޅުވީ އެމެޓީގެ ބައްދަލުވުން ކެންސަލް ކުރުމުން ކޮމެޓީން ނިކުމެވަޑައިގެން މައުލޫމާތު ދެއްވަމުންނެވެ.
ގަފޫރު ވިދާޅުވީ މާލިއްޔަތު ކޮމެޓީގައި ސަރުކާރުންގެ އެކި އިދާރާތަކުގެ އޮޑިޓް ރިޕޯޓްތަށް ހުށަހެޅި ދިރާސާކުރަމުންދާއިރު، ކޮމެޓީގެ މުގައްރިރު ވަޑައި ނުގެންނެވުމުގެ ސަބަބުން ކޮމެޓީ ކެންސަލް ކުރުމަކީ ކަންބޮޑުވާ ކަމެއް ކަމަށެވެ. އަދި މިއީ މިސަރުކާރުން ހިންގާ ޖަރީމާތައް ފޮރުވުމަށް ކުރަމުންދާ ކަމެއް ކަމަށް ވެސް ގަފޫރު ވިދާޅުވި އެވެ.
އަންގާރަ ދުވަހު ބޭއްވުމަށް ނިންމާފައިވާ މާއްލިއްޔަތު ކޮމެޓީގެ އެޖެންޑާގައި އޮތީ އޮޑިޓް ރިޕޯޓްތައް ދިރާސާ ކުރުމަށް ހޮވި ކުޑަ ކޮމެޓީން އޮޑިޓް ރިޕޯޓްތަކާމެދު ނިންމާފައިވާ ނިންމުންތަކާމެދު މާލިއްޔަތު ކޮމެޓީން މަޝްވަރާކޮށް ގޮތެއް ނިންމުމަށެވެ.
މާލިއްޔަތު ކޮމެޓީއަކީ ދައުލަތުގެ ފައިސާއާބެހޭ މައްސަލަތައްބަލާ، މަޖިލީހުގެ އެންމެ މުހިއްމު އެއްކޮމެޓީ އެވެ. އެ ކޮމެޓީގެ ސާފު މެޖޯރިޓީ އޮތީވެސް ސަރުކާރު ކޯލިޝަންގަ އެވެ. ކޮމެޓީގެ މުގައްރިރަކަށް ނިހާނު ހުންނަވާއިރު، ނާއިބު މުގައްރިރަކީވެސް ސަރުކާރު ކޯލިޝަން އެމްޑީއޭގެ މެމްބަރު އަހުމަދު އާމިރު އެވެ.
