ވޯލްޑް ސްކޯލަރސް ކަޕްގައި ބައިވެރިވެ ގިޔާސުއްދީން ސުކޫލުން ރަން ވަނަތަކެއް ހާސިލުކޮށްފި
ގިޔާސުއްދީން ސުކޫލަށް މިއަހަރު ޖުމުލަ 60 މެޑަލް ލިބިފައިވޭ
ގިޔާސުއްދީން ސުކޫލު ދަރިވަރުން
ބައިނަލްއަޤުވާމީ ދިރާސީ މުބާރާތެއް ކަމަށްވާ ވޯލްޑް ސްކޯލަރސް ކަޕްގެ ޓޯރނަމެންޓް އޮފް ޗެމްޕިއަންސްގައި ބައިވެރިވެ ގިޔާސުއްދީން ސުކޫލުން ރަން ވަނަތަކެއް ހާސިލުކޮށްފިއެވެ.
މީގެ ކުރިންވެސް މި މުބާރާތުގައި ވާދަކޮށްފައިވާ ގިޔާސުއްދީން ސުކޫލަށް މިއަހަރު ޖުމުލަ 60 މެޑަލް ލިބިފައިވެއެވެ. އޭގެ ތެރޭގައި 47 ގޯލްޑް މެޑަލް އަދި 13 ސިލްވަރ މެޑަލް ހިމެނެއެވެ. މީގެ އިތުރުން ގިޔާސުއްދީން ސުކޫލަށް ސައުތު އޭޝިޔާއިން 4 ވަނަ ލިބިފައިވެއެވެ.
ރާއްޖެއެމްވީއަށް މައުލޫމާތު ދެއްވަމުން ގިޔާސުއްދީން ސުކޫލުގެ ޕްރިންސިޕަލް ތޯހާ ސަލީމް ވިދާޅުވީ މިއީ ސުކޫލަށް ލިބުނު ވަރަށް ބޮޑު ކާމިޔާބީއެއް ކަމަށާއި، ސުކޫލުގެ ފަރާތުން މިކަމުގައި އުޅުއްވި ފަރާތްތަކަށާއި، ސްޕޮންސަރ ދެއްވި ކުންފުނި ތަކުގެ ވެރިންނަށް ޝުކުރު އަދާކުރާ ކަމަށެވެ. މީގެ އިތުރުން ތޯހާ ވިދާޅުވީ މިފަދަ މުބާރާތް ތަކުގައި ބައިވެރިވުމަކީ ބައިނަލްއަޤުވާމީ ގޮތުން ހިނގަމުންދާ ގިނަ ކަންތައްތަކަށް ކުދިންގެ ލޯ ހުޅުވި އެކުދިންގެ އިލްމީ ފެންވަރު ރަނގަޅުވާ ކަމެއް ކަމުގައެވެ.
"ގާތްގަނޑަކަށް 2300 އެއްހާ ކުދިން މުޅި ކޮމްޕެޓިޝަންގައި ބައިވެރިވި. ބައިވެރިވެގެން ސައުތު އޭޝިޔާއިންވެސް އަޅުގަނޑުމެންނަށް އެއް ޓީމަށް ހަތަރު ވަނަ ލިބުނު. އެއީ ދެން ހަމަ ސައުތު އޭޝިޔާގެ ބޮޑެތި ޤައުމުތަކުގެ ބައިވަރު ޓީމުތަކުން ބައިވެރިވެގެން." ތޯހާ ސަލީމް ވިދާޅުވިއެވެ.
ގިޔާސުއްދީން ސުކޫލު 2010 ވަނަ އަހަރު އިންޓަނޭޝަނަލް ސްކޫލަކަށް ބަދަލުކުރި ފަހުން އެސްކޫލުން އަންނަނީ ބައިނަލްއަޤުވާމީ ފެންވަރުގެ އެކި މުބާރާތްތަކުގައި ބައިވެރިވެ ރާއްޖެއަށް ރީތިނަން ހޯދައިދެމުންނެވެ.
