ޖޮއިންޓް ކޮމިޝަންގައި ބައިވެރިވެވަޑައިގަތުމަށް ލަންކާގެ ފޮރިން މިނިސްޓަރު ރާއްޖެ އަށް

ރާއްޖެއާއި ސްރީލަންކާ ގުޅިގެން އުފައްދާފައިވާ، "ޖޮއިންޓް ކޮމިޝަން"ގެ ބައްދަލުވުމެއްގައި ބައިވެރިވެވަޑައިގަތުމަށް ސްރީ ލަންކާގެ ފޮރިން މިނިސްޓަރު މަންގަލާ ސަމަރަވީރަ ބުދަ ދުވަހު ރާއްޖެ ވަޑައިގަންނަވާ ގޮތަށް ހަމަޖައްސައިފި އެވެ.

ސްރީ ލަންކާގެ ފޮރިން މިނިސްޓްރީ އިން ނެރުނު ބަޔާނެއްގައި ބުނީ ޖޮއިންޓް ކޮމިޝަންގެ ބައްދަލުވުމުގައި ބައިވެރިވެވަޑައިގަންނަވާ އެގައުމުގެ މަތީ ފެންވަރުގެ ވަފްދުގެ ވެރިއަކަށް ހުންނަވާނީ ފޮރިން މިނިސްޓަރު ސަމަރަވީރާ ކަމަށެވެ.

ލަންކާގެ ފޮރިން މިނިސްޓަރުގެ މި ދަތުރުފުޅުގައި ޖޮއިންޓް ކޮމިޝަނުގެ ބައްދަލުވުމުގައި ބައިވެރިވެވަޑައިގަތުމުގެ އިތުރުން ރައީސް އަބްދުﷲ ޔާމީނާ ބައްދަލުކުރައްވާނެ އެވެ.

ބުދަ ދުވަހާއި ބުރާސްފަތި ދުވަހު ފޮރިން މިނިސްޓްރީ ގައި ބާއްވާ ބައްދަލުވުމުގައި ދިވެހި ސަރުކާރުގެ ފަރާތުން އެންމެ އިސްބޭފުޅެއްގެ ގޮތުގައި ބައިވެރިވެވަޑައިގަންނަވާނީ ފޮރިން މިނިސްޓަރު ޑރ. މުހައްމަދު އާސިމް ކަމަށް ފޮރިން މިނިސްޓްރީ އިން ބުނެ އެވެ.

ލަންކާގެ ފޮރިން މިނިސްޓްރީ އިން ބުނީ، ބައްދަލުވުމުގައި މަޝްވަރާކުރަން ހަމަޖެހިފައިވަނީ އިގްތިސާދީ ގުޅުން ވަރުގަދަ ކުރުމާއި، ފަތުރުވެރިކަމާއި، މަސްވެރިކަމާއި، ތައުލީމީ ދާއިރާއާއި، ސިއްޚީ ދާއިރާއާއި، ކުޅިވަރުގެ ދާއިރާއިން މީހުން ތަމްރީނުކުރުމާއި، ވަޒީފާގެ ފުރުސަތުތަކުގެ އިތުރުން ސަގާފީ ގުޅުންތައް ވަރުގަދަކުރުމަށް ކަމަށެވެ.

ރާއްޖެއާއި ސްރީ ލަންކާއިން އުފައްދާފައިވާ ޖޮއިންޓް ކޮމިޝަނަކީ، ދެގައުމުގެ ދެމެދުގައި އިގްތިސާދީ އަދި ޓެކްނިކަލް ގުޅުން ބަދަހި ކުރުމުގެ ގޮތުން 1984 ވަނަ އަހަރު އުފައްދާފައިވާ ކޮމިޝަނެކެވެ. މިހާތަނަށް މި ކޮމިޝަންގެ ތިން ބައްދަލުވުމެއް ބާއްވާފައިވާ އިރު އެންމެ ފަހުން ކޮމިޝަންގެ ބައްދަލުވުމެއް ބޭއްވުނީ 2014 ވަނަ އަހަރުގެ ސެޕްޓެމްބަރުގައި ލަންކާގަ އެވެ. އޭގެ ކުރިން 2006 ވަނަ އަހަރުގެ އޭޕްރިލް މަހުގެ ތެރޭގައި ވެސް ބައްދަލުވުމެއް ބާއްވާފައިވެ އެވެ.