ޗައިނާގެ ބެލްޓް އެންޑް ރޯޑް ފޯރަމްގައި މިނިސްޓަރ ސައީދު ބައިވެރިވެއްޖެ
ބެލްޓް އެންޑް ރޯޑް ފޯރަމް ކުރިއަށްދަނީ ދެ ދުވަހަށް
މިނިސްޓަރ ސައީދު ބެލްޓް އެންޑް ރޯޑް ފޯރަމްގައި
ޗައިނާއިން އިންތިޒާމުކުރާ ބެލްޓް އެންޑް ރޯޑް ފޯރަމްގައި ރާއްޖޭގެ އިކޮނޮމިކް މިނިސްޓަރ މުހައްމަދު ސައީދު ބައިވެރިވެއްޖެ އެވެ.
އިކޮނޮމިކް މިނިސްޓްރީން ބުނީ، މިނިސްޓަރ ސައީދު ޗައިނާގެ ބެއިޖިން އަށް ކުރައްވާ މިދަތުރަކީ ތިން ދުވަހުގެ ދަތުރެއް ކަމަށެވެ.
މިނިސްޓަރ ސައީދުގެ މި ދަތުރުގައި ހަންގޭރީގެ އިކޮނޮމިކް މިނިސްޓަރާއި ބައްދަލުކުރައްވާއި ދެ ގައުމުގެ ދެމެދުގައި އިގްތިސާދީ ގުޅުން ގާއިމް ކުރުމާއި ގުޅޭ ގޮތުން ވަނީ ވާހަކަދައްކާފަ އެވެ. މީގެ އިތުރުންވެސް މި ފޯރަމްގެ ސައިޑްލައިނުގައި ދުނިޔޭގެ ގައުމުތަކުގެ އިސްވެރިންނާއި ބައްދަލުކުރުމަށް ހަމަޖެހިފައިވާ ކަމަށް އިކޮނޮމިކް މިނިސްޓްރީން ބުނެ އެވެ.
ޗައިނާގެ ބެލްޓް އެންޑް ރޯޑް ފޯރަމް ފެށިގެން ކުރިއަށްދާ އިރު މި ފޯރަމް ކުރިއަށްގެންދިއުމަށް ހަމަޖެހިފައިވަނީ މެއި 14 އިން މެއި 15 އަށެވެ. މި ފޯރަމް ބެއިޖިންގައި ބާއްވާ އިރު 28 ގައުމެއްގެ 130 މަންދޫބުން މި ފޯރަމްގައި ބައިވެރިވެ އެވެ.
މީގެ އިތުރުން 70 އިންޓަރނޭޝަނަލް އޮގަނައިޒޭޝަނުން މި ފޯރަމްގައި ބައިވެރިވެ އެވެ. އެގޮތުން އދ އާއި ވޯލްޑް ބޭންކްގެ އިތުރުން އިންޓަރނޭޝަނަލް މޮނިޓަރީ އޮތޯރިޓީންވެސް ވަނީ މި ފޯރަމްގައި ބައިވެރިވެފަ އެވެ.
މި ފޯރަމްގެ ބޭނުމަކީ، ގައުމުތަކާއި އޮންނަ ގުޅުން ބަދަހިކޮށް، ތަފާތު ވިޔަފާރިތަކުގައި ކުރިއަށްދާނެ މަގު ތަނަވަސް ކުރުމުގެ ހުރި ފުރުސަތުތައް ދެނެގަތުމެވެ.
