ރާއްޖެއަށް އޭއެފްސީ ކަޕްގެ ޖާގަ ގެއްލުމުގެ ޒިންމާ ނަގަންޖެހޭނީ އެފްއޭއެމް!

އޭއެފްސީ ކަޕަކީ 2004 ވަނަ އަހަރުން ފެށިގެން މެދުނުކެނޑި ރާއްޖޭގެ ކްލަބްތައް ބައިވެރިވަމުން އައި މުބާރާތެކެވެ. އާންމު ގޮތެއްގައި މި މުބާރާތުގައި ރާއްޖެއަށް ދެ ޖާގަ ލިބޭއިރު، މެދު ނުކެނޑި އެއް ޖާގަ ކޮންމެ ފަހަރަކުވެސް ލިބެއެވެ. އެހެންނަމަވެސް އަންނަ އަހަރުގެ މުބާރާތުން ރާއްޖެއަށް ޖާގައެއް ނުދިނުމަށް އޭއެފްސީން ވަނީ ނިންމާފައެވެ. މިކަމާ ގުޅިގެން ގިނަ ބަޔެއްގެ ނުރުހުމާއި، ފާޑުކިޔުން ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އަންނަނީ އަމާޒުވަމުންނެވެ. އަދި މިކަމުގެ ޒިންމާ އެފްއޭއެމުން ނަގަންޖެހޭނެ ކަމަށްވެސް ގިނަ ބަޔަކު އަންނަނީ ބުނަމުންނެވެ. ސަބަބުތައް ބައިވަރެވެ.

މުބާރާތުން ރާއްޖެއަށް ޖާގަ ގެއްލުނީ އޭއެފްސީން ދިން މުއްދަތުގައި، އޭއެފްސީގެ ކްލަބް ލައިސަންސިންގ އެޑްމިނިސްޓްރޭޝަން ސިސްޓަމުގައި ރާއްޖޭގެ ކްލަބްތަކަށް ލައިސަންސް ލިބޭ ވަރަށް ލިޔެކިޔުން ހަމަނުކުރެވުމުންނެވެ. ލިޔެކިޔުންތައް ފުރިހަމަނުކުރެވުމުގައި ބައެއް ކްލަބްތަކުގެ އިހުމާލުވެސް އެބަ އޮތެވެ.

އެފްއޭއެމްގެ އެކްސޯ ބައްދަލުވުމުގެ ތެރެއިން - ފޮޓޯ: އެފްއޭއެމް

މައުލޫމާތު ލިބިފައިވާ ގޮތުގައި ކްލަބް ލައިސަންސިންގ ކަންތައް އެންމެ ރަނގަޅަށް ފުރިހަމަކޮށްފައިވަނީ މާޒިޔާ ސްޕޯޓްސް އެންޑް ރެކްރިއޭޝަންއެވެ. މިކަމަށް އެފްއޭއެމްވެސް ހެކިވެއެވެ. އެހެންނަމަވެސް އެ ކްލަބަށް ޖާގަ ގެއްލުނީ އެކްލަބުން އެޕްރޫވް ކުރަން ހުށަހެޅި ބައެއް ލިޔެކިޔުންތައް އެފްއޭއެމުން އެޕްރޫވް ނުކޮށް، އެ ލިޔުންތައް އޭއެފްސީ އަށް ހުށަހެޅުން ދިގުލައިގެން ގޮސްގެން ކަމަށް މައުލޫމާތު ލިބެއެވެ. އަދި އެ ލިޔެކިޔުންތައް އޭއެފްސީން ދިން މުއްދަތު ތެރޭގައި އެޕްރޫވްކޮށްފައި ނުވާ ކަމުގެ މައުލޫމާތުވެސް ވަނީ ލިބިފައެވެ.

އެފްއޭއެމްގައި ކްލަބް ލައިސަންސިންގ ކަންތަކަށް ހާއްސަ ޑިޕާޓްމެންޓެއް އޮވެއެވެ. ރާއްޖެއެމްވީ އަށް މައުލޫމާތު ލިބޭ ގޮތުގައި އެ ޑިޕާޓްމެންޓްގެ އެންމެ އިސްކޮށް އުޅޭ މުވައްޒަފަށް 18،000 ރުފިޔާގެ މުސާރައެއް ދޭއިރު، އެ މުވައްޒަފުގެ ދަށުން އިތުރު ތިން މުވައްޒަފުން ތިބޭ ކަމަށްވެސް މައުލޫމާތު ލިބެއެވެ.

ލިޔެކިޔުންތައް ހުށަހެޅުމުގެ މުއްދަތު އިތުރުކޮށްދޭން އެފްއޭއެމުން އޭއެފްސީގައި އެދުމުން، އެކަންތައް ކޮށްދެވެން ނެތް ކަމަށް އޭއެފްސީން ބުނެފައިވާ ސިޓީއެއް ސޯޝަލް މީޑިއާގައި ދައުރުވިއެވެ. އެގޮތުން އޭއެފްސީން ރާއްޖެއަށް ޖާގަ ގެއްލިފައިވާކަން މީޑިއާތަކުން ކަށަވަރުކޮށް، ރިޕޯޓްކުރަން ފެށުމާއެކު އެފްއޭއެމުން ވަނީ ބަޔާނެއް ނެރެފައެވެ. އެ ބަޔާނުގައި އެފްއޭއެމުން ވަނީ ޖާގަ ގެއްލުމުގެ ކަންތައް ކްލަބްތަކުގެ ބޮލަށް ޖެހުމަށްފަހު، އަމިއްލަ ސަލާމަތް ހޯދަން މަސައްކަތް ކޮށްފައެވެ.

މާޒިޔާ އަދި ބެންގަލޫރު ބައްދަލުކުރާ މެޗުގެ ތެރެއިން - ފޮޓޯ: މުހައްމަދު ޝަރުހާން

ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެފްއޭއެމް އާއި އޭއެފްސީއާ ދެމެދު ދާދި ފަހުން ވަނީ މައްސަލަތަކެއް ޖެހިފައެވެ. އެ މައްސަލަތައް އުފެދުނީ އޭއެފްސީގެ ރައީސް ޝައިހް ސަލްމާން ބިން އިބްރާހިމް އަލް ހަލީފާއާ ދެކޮޅަށް އުފެއްދި ކަމަށް ބެލެވޭ ސައުތު ވެސްޓް އޭޝިއަން ފުޓްބޯލް ފެޑެރޭޝަން (ސްވާފް( ގައި ރާއްޖެއިން ބައިވެރިވުމުންނެވެ.

މި ސަރަހައްދުގެ ހުރިހާ ގައުމެއް ސްވާފް އުފެދުނު އިރު ހިމެނުނެވެ. އެހެންނަމަވެސް ވަކި ހިސާބަކުން ރާއްޖެ ފިޔަވައި ހުރިހާ ގައުމެއް ވަނީ ސްވާފުން ވަކިވެފައެވެ. އެގޮތުން ބެލެވޭ ގޮތުގައި ލިޔެކިޔުންތައް ހުށަހެޅުމުގެ މުއްދަތު އިތުރު ކުރުމަށް ރާއްޖެ އަށް ފުރުސަތު ނުދިނީ ސްވާފުން ވަކިނުވެ އޮތުމުންނެވެ.

ސްވާފްގެ އެކްސްކޯ މެމްބަރުން - ފޮޓޯ: ސޯޝަލް މީޑިއާ

އޭއެފްސީ ކަޕްގެ ގުރު މިހާރު ނަގާފައިވާއިރު، މި ސަރަހައްދުން ރާއްޖެ އާއި ޕާކިސްތާން ފިޔަވާ ހުރިހާ ގައުމަކަށް އޭއެފްސީ ކަޕުން ޖާގަ ލިބުނެވެ. އޭއެފްސީ ކަޕްގެ ގްރޫޕް ސްޓޭޖުން މި ފަހަރު ރާއްޖެ އަށް އޮތް ޖާގަ ނޭޕާލަށް ދިން އިރު، ރާއްޖެ 2020 ގެ މުބާރާތުގައި ވާދަކުރާއިރު ދެ ޖާގައިގެ ބަދަލުގައި އެންމެ ޖާގައެއް ލިބުމުގެ ފުރުސަތު ވެސް އެބައޮތެވެ.

އޭއެފްސީ ކަޕުގެ ޖާގަ ރާއްޖެއަށް ގެއްލުމަކީ ދިވެހި ފުޓުބޯޅަ ކުރިއަރުވަން ދިމާވި ބޮޑު ގޮންޖެހުމެކެވެ. މިކަމުގެ ސަބަބުން އަންނަ އަހަރު ރާއްޖޭގެ ކްލަބްތަކަށް ބައިނަލްއަގުވާމީ ތަޖުރިބާ ލިބުމުގެ މަގު ބަންދުވެފައިވާއިރު، މިއީ ރާއްޖޭގެ ކުޅުންތެރިންނަށްވެސް ލިބޭނެ ބޮޑު ގެއްލުމެކެވެ. މިކަހަލަ ބޮޑެތި ކަންކަން ތަކުރާރުވަމުން އަންނައިރު، އެއްވެސް ކަމެއް އެފްއޭއެމް އަށް ހައްލުކުރެވޭތަނެއް ނުފެނެއެވެ. އަދި ބޮޑެތި ކަންކަން ކުދި ކުދި ކަންކަމަށް ހަދައި، އޮޅުވާލުމަށްވެސް ވަނީ މަސައްކަތް ކޮށްފައެވެ.