ސަލްޓަން ޕާކަށް ބޮޑެތި ބަދަލުތަކެއް ގެނެސް، ރަސްރަނި ބަގީޗާގެ ނަމުގައި ހުޅުވީ 2017 ވަނަ އަހަރުގެ އޯގަސްޓް 21 ވަނަ ދުވަހުގެ ރޭ އެވެ. ރަސްރަނި ބަގީޗާ ހުޅުވުމަށް ބޭއްވި ރަސްމިއްޔާތުގައި ރައީސް ޔާމީން ވިދާޅުވީ 2017 ވަނަ އަހަރުގެ ޑިސެމްބަރުގައި ރާއްޖެއަށް ވެސް ފިނި މޫސުން އަންނާނެ ކަމަށެވެ.

"އިރާދަކުރެއްވިއްޔާ މި އަހަރު ރާއްޖެ އަށް ފިނި މޫސުން އަންނާނެ. އަންނަ ޑިސެމްބަރު މަހުގެ ތެރޭގައި ޔޫރަޕަށް ފިނި މޫސުން އަންނަ ގޮތަށް ދިވެހި ކުޑަކުދިންނަށް ވެސް [ފިނި މޫސުން] އަންނާނެ،" ރައީސް ޔާމީން ވިދާޅުވެފައިވެއެވެ.

ރަސްރަނި ބަގީޗާގައި ވިންޓާ ކޯނާއެއް ހަދައި އެތަނުން ސްނޯގެ އިހުސާސް ކުރެވި، ކުޑަކުދިންނަށް އައިސް ސްކޭޓް ކުރެވޭނެ ގޮތް ހަދާނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެފައިވެއެވެ. 2016 ވަނަ އަހަރުގެ ޖެނުއަރީ 25 ވަނަ ދުވަހު މުއިއްޒު ވިދާޅުވީ ރަސްރަނި ބަގީޗާ ތަރައްގީކޮށް ނިމޭއިރު، "ފިނިކަން އިހްސާސްކުރެވި ސްނޯ ވެސް ފައިބާނެ" ކަމަށެވެ.

"މިތަނުގަ ހެދިގެންދާނެ ވިންޓާ ކޯނާއެއް. ވިންޓާ ކޯނާއަށް ވަނީމަ ހަމަ ފިނި ގައުމެއްގައި ވިންޓާގައި އުޅޭއިރު ކުރެވޭއިހުސާސްކުރެވޭނެ .ފިނިވާނެ، ސްނޯވެސް ފައިބާނެ، ހަމަ އެ ހުރިހާކަމެއް ވެގެންދާނެ،" މިނިސްޓަރު މުއިއްޒު ވިދާޅުވި އެވެ.

އެއަށްފަހު، 2017 ވަނަ އަހަރުގެ ޑިސެމްބަރު މަހު ހައުސިންގ މިނިިސްޓްރީއިން ބުނީ ސްނޯގެ އިހުސާސް ކުރެވޭ ގޮތަށް ހަދާ، ވިންޓަ ކޯނާ ޑިސެމްބަރު މަހުގެ ތެރޭގައި ނިންމޭތޯ މަސައްކަތް ކުރަމުންދާ ކަމަށެވެ. 

ދެހާސްސަތާރަ ވަނަ އަހަރުގެ ޑިސެމްބަރުގައި ރާއްޖެއަށް ފިނި މޫސުން އަންނާނެ ކަމުގެ ޔަގީންކަން ރައީސް ޔާމީނާއި ހައުސިންގ މިނިސްޓަރު ދެއްވުމުން ގިނަ ބަޔަކު އެކަމަށް ތައްޔާރުވިއެވެ. އެއްބަޔަކު ފިނީގައި ލާ ކޯޓުތަކާއި ބޫޓުތަކާއި އަންގިއަށް ދާންދެން ގަނެ، ފިނި މޫސުމަށް ތައްޔާރުވާން ބޭނުންވި އެވެ.  ކުޑަކުދިން ވެސް ވަރަށް ފޯރީގައި ތައްޔާރުވަމުން ދިޔައީ އައިސް ސްކޭޓް ކުރާށެވެ. އިރުވައި މޫސުމުގެ ގަދަ ހޫނުގެ ތެރޭގައި، ރަސްރަނި ބަގީޗާއަށް ވަދެ ފިނި މޫސުން އިހުސާސް ކޮށްލާށެވެ.

ފިނި މޫސުން އިހުސާސް ކޮށްލަން، ރަސްރަނި ބަގީޗާއަށް ދިއުމުން މުޅިން ފެނުނީ އެހެން މަންޒަރެކެވެ. ހައިމާކަކާއި ސިމެންތި ގަށާ މެޝިނަކާއި ދަގަނޑުތަކާއި، ސިމެންތި ގާ ނޫން އެއްޗެއް ވިންޓަ ކޯނާގައި ނެތެވެ. ވަށައިގެން ހުރީ ކަޅުދާ ޖަހާފަ އެވެ. ނަމަވެސް، ޔޫރަޕަށް އަންނަ ކަހަލަ ފިނި މޫސުމެއްގެ ފިންޏެއް އިހުސާސެއް ނުކުރެވެއެވެ. ޑިސެމްބަރުގައި އެތަން ނިންމާނެ ކަމަށް ބުނިއިރު، އެތަނުގައި ކުރެވުނު މަސައްކަތަށް ވުރެ ނުކޮށް ހުރި މަސައްކަތް ގިނައެވެ.

އަހަރު ނިމިގެން ހިނގައްޖެ އެވެ. 2017 ނިމިގެން މި ދިޔައީ އެ ވިދާޅުވި ޑިސެމްބަރު މަސް ރާއްޖެއާ ބައްދަލުނުކޮށެވެ. ދިވެހިންނަށް އަހަރު ނިންމާލަން މިޖެހުނީ 11 މަހުންނެވެ. އަހަރެއްގައި 365 ދުވަސް އޮންނައިރު، 2017 ވަނަ އަހަރުގައި ދިވެހިންނާ ބައްދަލުކުރީ 334 ދުވަހެވެ. ޑިސެމްބަރު ނައީ އެވެ. ގައިމު ޑިސެމްބަރު މަސް އައިނަމަ، ޔޫރަޕަށް ފިނި މޫސުން އަންނަ ގޮތަށް ރާއްޖެއަށް ވެސް ފިނި މޫސުން އައީހެވެ.