އަފްޣާނިސްތާނުގެ އަސްކަރީ މަރުކަޒެއްގެ މިސްކިތެއް ގޮއްވާލައި 26 މީހަކު މަރާލައިފި
25 ނޮވެމްބަރު 2018 | އާދީއްތަ 03:47މަލާގެ ޒިންމާ އެއްވެސް ޖަމާއަތަކުން އަދި އުފުލާފައެއް ނުވޭ
ޚޮސްޓް ޕްރޮވިންސްގައި ދިން މި ހަމަލާ އަމާޒުކޮށްފައިވަނީ ހުކުރު ނަމާދުވަގުތަށް
އަފްޣާނިސްތާނުގެ އަސްކަރީ މަރުކަޒެއްގައި ހުންނަ މިސްކިތެއްގައި އެއްޗެއް ގޮއްވާލައި މަދުވެގެން ސިފައިންގެ 26 މީހުން މަރާލައި އެތައް ބަޔަކު ޒަޚަމްކޮށްލައިފިއެވެ.
އަފްޣާނިސްތާނުގެ ޚޮސްޓް ޕްރޮވިންސްގައި ދިން މި ހަމަލާ އަމާޒުކޮށްފައި ވަނީ އަސްކަރީ ބޭސްގައި ހުކުރު ދުވަހު ހުކުރު ނަމާދަށް ތިބި ސިފައިންނަށެވެ.
އަފްޣާނިސްތާނުގެ އަސްކަރިއްޔާގެ ތަރުޖަމާނެއް ކަމަށްވާ އަބްދުﷲ އެސޯސިއޭޓްޑް ޕްރެސްގައި ބުނެފައި ވަނީ ހަމަލާގައި މަރުވި މީހުންގެ އަދަދު 27 އަށް އަރާފައިވާ ކަމަށެވެ. މީގެ އިތުރުން 57 މީހުން ޒަޚަމްވެފައިވާ ކަމަށް އޭނާވަނީ ބުނެފައެވެ.
ސަލާމަތީ ޚިދުމަތްތަކުގައި މަސައްކަތް ކުރާ އޮފިޝަލަކު ރޮއިޓަރސްގައި ބުނެފައި ވަނީ މަދުވެގެން 26 މީހުން މަރާލާފައިވާ ކަމަށާއި އަދި 50 މީހުން ޒަޚަމްވެފައިވާ ކަމަށެވެ.
ބޮން ގޮއްވާލާފައި ވަނީ ރިމޯޓުން ކަމަށް ބުނެވޭއިރު މިއީ ޖާނުން ފިދާވެގެން ދިން ހަމަލާއެއް ކަމަށް ވެސް ބައެއް ރިޕޯޓްތައް ބުނެއެވެ.
މި ހަމަލާގެ ޒިންމާ އެއްވެސް ޖަމާއަތަކުން އަދި އުފުލާފައެއް ނުވެއެވެ.
