ކެންސަރު ޖެހުނު މުވައްޒަފުންގެ ކިބައިން ސެމްސަންގުން މާފަށް އެދެފި

ދުނިޔޭގެ އެންމެ ބޮޑު އިލެކްޓްރޯނިކްސް އުފައްދާ ސެމްސަންގް ކުންފުނީގެ ސެމީ ކޮންޑަކްޓަރ ފެކްޓްރީގައި މަސައްކަތް ކުރުމުގެ ސަބަބުން ކެންސަރު ޖެހުނު މީހުންގެ ފަރާތުން އެ ކުންފުނިން މާފަށް އެދިއްޖެ އެވެ.

ހުކުރުދުވަހު އެ ކުންފުނީގެ ކޯ ޕްރެޒިޑެންޓް ކިމް ކީ ނަމް ވިދާޅުވީ ސެމްސަންގްގެ ފެކްޓްރީތަކުގައި މަސައްކަތް ކުރުމުގެ ސަބަބުން ކެންސަރު ޖެހުނު މީހުންނާއި މަރުވެފައިވާ މީހުންގެ އާއިލާތަގެ ފަރާތުން މާފަށް އެދިފައެވެ. ކިމް އިތުރަށް ވިދާޅުވީ އެ ގޮތަށް ދިމާވަން މެދުވެރިވި ސަބަބަކީ ސެމީ ކޮންޑަކްޓަރުގެ އިތުރުން އެލްސީޑި ފެކްޓްރީގައި ސިއްހީ ގޮތުން ނުރައްކާތެރިކަން އެކަށީގެންވާ ވަރަށް ބެލިފައި ނުވާތީ ކަމަށާއި އެކަމުގެ ޒިންމާ ސެމްސަންގްއިން ނަގާ ކަމަށެވެ. ކިމް ވަނީ މީގެ ކުރިން ވެސް ފެކްޓްރީގެ މުވައްޒަފަކަށް ކެންސަރު ޖެހުމުން މާފަށް އެދިފައިއެވެ. ކިމް މިހެން ވިދާޅުވެފައި ވަނީ މި މަހު އެ ކުންފުނީގެ އިސްވެރިންނާއި ކުންފުނީގެ އިހުމާލުން ބަލިޖެހިފައިވާ ކަމަށް ބުނާ މުވައްޒަފުންނާ މަޝްވަރާ ކުރުމަށްފަހު އެވެ. ކުންފުނީގެ ފެކްޓްރީ ތަކުގައި މަސައްކަތް ކުރުމުގެ ސަބަބުން ބަލި ޖެހުނު މީހުންނަށް ބަދަލުގެ ގޮތުގައި 150 މިލިއަން ކޮރިއަން ވޮން ( 133000 ޑޮލަރު ) ދޭން ނިންމާފައިވާ ކަން ސެމްސަންގް އިން ވަނީ މި މަހު ކުރީކޮޅު ނިންމާފައިއެވެ.

ސެމްސަންގްގެ ފެކްޓްރީގައި މަސައްކަތް ކުރަމުން ދިޔަ އުމުރުން 22 އަހަރުގެ މުވައްޒަފަކު ވަނީ ކެންސަރު ޖެހިގެން 2007 ވަނަ އަހަރު މަރުވެފައިއެވެ.

ދެކުނު ކޮރެއާގެ ސެމްސަންގް ކުންފުންޏަކީ އެ ގައުމުގެ އިގްތިސާދުގެ އެންމެ ބޮޑު ރޯލެއް ކުޅެމުން އަންނަ ކުންފުންޏެކެވެ. ސެމްސަންގް ކުންފުނީގެ ފެކްޓްރީ ތަކުގައި މަސައްކަތް ކުރުމުގެ ސަބަބުން 320 މީހުންނަށް އެކިކަހަލަ ބަލިތައް ޖެހި 118 މީހަކު މަރުވެފައިވާ ކަމަށް ރިޕޯޓްތައް ބުނޭއެވެ.