އުތުރުކޮރެއާ ކޮންޓްރޯލް ކުރެވޭކަން ދައްކައިދިނުމަށް އެމެރިކާގެ ކިބައިން ފިލިޕީންސްގެ ރައީސް ރޮޑްރިގޯ ޑުޓާޓެ އެދިވަޑައިގެންފިއެވެ.
ޑުޓާޓެ ސިފަކުރައްވާފައި ވަނީ އުތުރު ކޮރެއާގެ ލީޑަރު ކިމް ޖޮން އުންއަކީ "ދުނިޔެ ނިމުމަކަށް ގެންދަން" ބޭނުންވާ ބޭފުޅެއްގެ ގޮތުގައެވެ.
އުތުރުކޮރެއާއާ އެމެރިކާއާ ދެމެދު މި ވޭތުވެދިއަ ހަފްތާތަކުގައި މަސްރަހު ހޫނުވަމުން ދިޔައީ އުތުރުކޮރެއާއިން މިސައިލް ޓެސްޓްތައް ކުރިޔަށް ގެންދިއުމާ އެކު ނިއުކްލިއަރ ހަތިޔާރު ޕްރޮގްރާމް ހުއްޓާލުމަށް ޑޮނަލްޑް ޓްރަމްޕްގެ ސަރުކާރުން އުތުރުކޮރެއާ އަށް ދެމުންދިޔަ އިންޒާރުތަކުގެ ސަބަބުންނެވެ.
އެމެރިކާގެ އޮފިޝަލުން ގެންދަވަނީ އުތުރުކޮރެއާއާ މެދު އެޅިދާނެ ހުރިހާ ފިޔަވަޅުތަކެއް ހުރީ މޭޒުމައްޗަށް ގެނެވިފައި ކަމަށާއި އޭގެ ތެރޭގައި އުތުރު ކޮރެއާގެ އަސްކަރީ ޕްރޮގްރާމް ހުއްޓުވާލުމަށް އަސްކަރީ ހަމަލާދިނުން ވެސް ހިމެނޭ ކަމަށްބުނެ އިންޒާރު ދެމުންނެވެ.
އެމެރިކާއިން ވަނީ އެ ގައުމުގެ އަސްކަރީ މަނަވަރު ޔޫއެސްއެސް ކާލް ވިންސަން ވެސް ކޮރެއަން ޕެނިންސިއުލާއަށް ފޮނުވާފައެވެ.
އުތުރު ކޮރެއާއިން ވަނީ މަތިންދާ ބޯޓް އުފުލާ އެ މަނަވަރު ފައްތާލާނެ ކަމަށް އިންޒާރުދީ އެ ސަރަހައްދުގައި އެމެރިކާގެ ބައިވެރިން ކަމަށްވާ ޖަޕާނާ ދެކުނުކޮރެއާއަށް ނިއުކްލިއަރ ހަމަލާއެއް ދޭނެ ކަމަށް އިންޒާރު ދީފައެވެ.
ރައީސް ޑުޓާޓެ ވިދާޅުވީ އެމެރިކާ އާއި ދެކުނުކޮރެއާއާ ދެމެދު އުފެދިފައިވާ ނުތަނަވަސްކަމުގެ ސަބަބުން ދެކުނު އޭޝިއާ ސަރަހައްދު އޮތީ އިންތިހާ ދަރަޖައިގެ ކަންބޮޑުވުމެއްގައި ކަމަށެވެ. އަދި ކައްޗަށް އެޅޭ އެންމެ ފިޔަވަޅެއް ވެސް މުސީބާތަކަށް ވެގެން ހިނގައިދާނެ ކަމަށާއި އަދި ނިއުކްލިއަރ ހަނގުރާމައިގައި ފުރަތަމަ އަސަރު ކުރާ ބަޔަކަށް ވެގެންދާނީ ދެކުނު އޭޝިއާ ކަމަށެވެ.
ޑުޓާޓެ ވިދާޅުވީ އެމެރިކާ އާއި، ޖަޕާނާއި، ދެކުނު ކޮރެއާ އާއި ޗައިނާއިން ގެންދަނީ މިސައިލެއް ފޮނުވާލުމުން ވާނެ ގޮތް ފެނިގެން އަންތަރީސްވެގެން އުޅޭ މީހަކު ގޮއްވަމުން ކަމަށެވެ.
ޑުޓާޓެ އަކީ އެސޯސިއޭޝަން އޮފް ސައުތު އީސްޓް އޭޝިއަން ނޭޝަންސް (އާސިއާން)ގެ މިހާރުގެ ޗެއާމަނެވެ.
އުތުރު ކޮރެއާއިން ހޮނިހިރު ދުވަހު ޓެސްޓްކުރި ބެލިސްޓިކް މިސައިލް ފެއިލް ވެފައިވާއިރު މިއީ މާޗް މަހުން ފެށިގެން ފެއިލްވި ހަތަރުވަނަ ފަހަރު ކަމަށް އެމެރިކާ އާއި ދެކުނު ކޮރެއާއިން ބުނެއެވެ.
މި ޓެސްޓް ފެއިލްވެފައިވާއިރު ކޮރެއަން ޕެނިންސިއުލާގައި އޮތް ޔޫއެސްއެސް ކާލް ވިންސަންއިން ވަނީ ދެކުނުކޮރެއާއާ އެކު އަސްކަރީ ފަރިތަކުރުންތައް ފަށާފައެވެ.
