މަރުގެ މައްސަލަތަކާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަންގެ މެންބަރުންނާއި ރައީސް އިބްރާހިމް ސޯލިހު، ބައްދަލު ކުރައްވައިފިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކޮމިޝަންގެ މެންބަރުންނާއި މަގާމުގެ ލިޔުން ވެސް ހަވާލުކުރައްވައިފައެވެ.
ކޮމިޝަންގެ މެންބަރުންގެ ގޮތުގައި ޢައްޔަން ކުރެވިފައިވަނީ:
- އަލްއުސްތާޛު ޙުސްނުއްސުޢޫދު، ހަސަންކާރިގެ، ސ.މީދޫ (ކޮމިޝަންގެ ރައީސް)
- އަލްފާޟިލް ޢަބްދުﷲ މުނާޒް، ހ. މާފިޔަ
- އަލްފާޟިލް އާދަމް އިބްރާހީމް، ގ.ޑިމްލައިޓް
- އަލްއުސްތާޛާ ފަރީޝާ ޢަބްދުﷲ، މާތޮޑާއަވަށް. ބަގީޗާގެ، ގދ. ފަރެސްމާތޮޑާ
- އަލްފާޟިލް މިޞްބާޙް ޢައްބާސް، ބަހާރީވިލާ، ގދ. ރަތަފަންދޫ
ކޮމިޝަންގެ މެންބަރުންނާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ފުރިހަމަ އެއްބާރުލުމާއި އެހީތެރިކަން އެ ކޮމިޝަންގެ މަސައްކަތް ކުރުމަށް ފޯރުކޮށް ދެއްވާނެ ކަމަށެވެ. ބޭނުންވެއްޖެ ހާލަތެއްގައި ބޭރުގެ ފަންނީ އެހީ ވެސް ހޯދަން އެހީތެރިވެ ދެއްވާނެ ކަމަށް ވެސް ވިދާޅުވިއެވެ. އެބޭފުޅުންނާއި ހަވާލު ކުރެވިފައި ވަނީ ވަރަށް ބޮޑު ޒިންމާ އެއް ކަމަށާއި، ހުށައެޅޭ ހުރިހާ މައްސަލަ އެއް ވެސް ވަކި މީހަކަށް ބެލުމެއްނެތި، ނަޒާހާތްތެރި ކަމާއެކީ ކުރިއަށް ގެންދެވުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.
ރައީސުލްޖުމްހޫރިއްޔާ މި ކޮމިޝަން އުފެއްދެވީ، ޤާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާ އަށް ލިބިދޭ އިޚްތިޔާރުގެ ދަށުން، ޖަނަވަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތަކުގެ ތެރެއިން، އެކިއެކި ސަބަބުތައް މެދުވެރިވެގެން، އެކަށީގެންވާ މިންވަރަށް ތަޙުޤީޤު ނު ކުރެވި ހުރި މައްސަލަތަކުގައި މިނިވަން، މުސްތަޤިއްލު އަދި އިތުބާރު ހިފޭ ތަޙުޤީޤެއް ކޮށް، ޙަޤީޤަތް ހޯދައި، ޢާންމުކުރުމަކީ އިންސާފު ޤާއިމުކުރުމަށްޓަކައި ދައުލަތުން އުފުލަން ޖެހޭ ޒިންމާއެއް ކަމަށް ރައީސުލްޖުމްހޫރިއްޔާ ދެކި ވަޑައިގަންނަވާތީ އެވެ.
