ދައީޝްއަށް އަމާޒުކޮށް، އިރާގުން ސީރިއާއަށް ވައިގެ ހަމަލާ ދޭން ފަށައިފި

ސީރިއާގައި ހަރަކާތްތެރިވަމުންދާ ދައީޝް ޖަމާއަތުގެ ހަނގުރާމަވެރިންނަށް އަމާޒުކޮށް އިރާގުގެ ސިފައިން ވައިގެ ހަމަލާތަކެއް ދީފިއެވެ.

އިސްލާމިކް ސްޓޭޓް (އައިސިސް)ގެ ނަމުގައި ހަރަކާތްތެރިވާ ދައީޝް ޖަމާއަތަށް އަމާޒުކޮށް އިރާގު ސިފައިން ދިން މި ހަމަލާތައް ދީފައިވަނީ ދެ އިމާރާތަކަށެވެ. އިރާގު ސިފައިން ހާމަކޮށްފައިވާ ގޮތުގައި މި ހަނގުރާމަވެރިން ހަތިޔާރު ރައްކާކުރުމަށްވެސް ބޭނުންކުރާ މި ދެ އިމާރާތަށް ހަމަލާ ދިންއިރު، އެ ދެ އިމާރާތުގެ ތެރޭގައި 40 ހަނގުރާމަވެރިން ތިއްބެވެ. މި ދެ އިމާރާތުގެ ތެރެއިން ފުރަތަމަ ހަމަލާ އަމާޒުކުރި އިމާރާތުގައި ފިލާ ތިބި 10 ހަނގުރާމަވެރިން މަރުވެފައިވާކަން އިރާގުގެ އަސްކަރިއްޔާއިން ހާމަކުރި ނަމަވެސް، އަނެއް އިމާރާތުގައި ތިބި 30 ހަނގުރާމަވެރިން މަރުވިކަން އިރާގު ސިފައިން ކަށަވަރު ކޮށްދީފައެއް ނުވެއެވެ.

އިރާގު ސިފައިން މި ހަމަލާ ދީފައިވަނީ F-16 ފައިޓަރ ޖެޓު ބޭނުންކޮށްގެންނެވެ.

މީގެ އަހަރުތަކެއް ކުރިން އިރާގުގެ ތިންބައިކުޅަ އެއްބައި ދައީޝް ޖަމާއަތުގެ ބާރުގެ ދަށުގައި އޮތް ނަމަވެސް މިހާރު އެ ޖަމާއަތުގެ ބާރު އިރާގުގެ އެތެރޭގައި ވަނީ ވަރަށް ބޮޑަށް ކަނޑުވާލެވިފައެވެ. އެ ޖަމާއަތުން އަދިވެސް މަދުމަދުން އިރާގުގެ އެތެރޭގައި އެކި ކަހަލަ ހަމަލާތައް ދިން ނަމަވެސް، މައިގަނޑު ގޮތެއްގައި އެ ޖަމާއަތުގެ ހަރަކާތްތައް ހިންގަމުންދަނީ އިރާގާއި ސީރިއާ ގުޅޭ ސަރަހައްދީ ރޮނގު ކައިރީގަ އާއި ސީރިއާގެ އެތެރޭގައެވެ.

ވައިގެ ހަމަލާއެއްދީ ދައީޝް ޖަމާއަތުގެ ހަތިޔާރު ފޮރުވާ އިމާރާތެއް ނައްތާލާފައިވާއިރު، 2017 ވަނަ އަހަރުން ފެށިގެން އިރާގުގެ ސިފައިން ދަނީ އެ ޖަމާއަތާއި ދެކޮޅަށް ވައިގެ ހަމަލާތައް ދެމުންނެވެ.

އިރާގާއި ސީރިއާގެ ބިންތައް ހިފައި، ޚިލާފަތެއް ޤާއިމް ކުރުމަށް ދައީޝް ޖަމާއަތުން ގެންގުޅުނު ވިސްނުން ނާކާމިޔާބުވެ، އެ ޖަމާއަތަށް ނިސްބަތްވާ ގިނަ ހަނގުރާމަވެރިންތަކެއް މަރުވުމާއި ގުޅިގެން އެ ޖަމާއަތް މިހާރު ހިންގަމުންދަނީ ހަތިޔާރު އެޅި ގެރިއްލާ ގްރޫޕެއްގެ ގޮތުގައެވެ.