އެމެރިކާއަށް އެތެރެވުމަށް ފައި މަގުގައި ދަތުރު ކުރަމުންދާ އެތައް ހާސް ރެފިއުޖީން ހިމެނޭ ގާފިލާތަކުގެ ތެރެއިން ފުރަތަމަ ގާފިލާ އެމެރިކާގެ ސަރަހައްދީ ރޮނގުގެ ކައިރިއަށް ހިނގައްޖެއެވެ.

ގާފިލާގެ ޖުމްލަ މެމްބަރުންގެ އަދަދު 5،000 އާ ގާތްކުރާއިރު މިފަހަރު އެ ގައުމަށް ދިޔަ ގާފިލާގައި ހިމެނެނީ ގާތް ގަނޑަކަށް 400 އެއްހާ މީހުންނެވެ. މި ގާފިލާގައި ގިނައީ ފިރިހެނުންނާއި ފިރިހެން ކުދިންނެެވެ.

ކެރަވާންގެ ނަންދީފައިވާ މި ގާފިލާ އަކީ މީގެ ހަފްތާތަކެއް ކުރިން ހޮންޑިއުރަސްއިން ދަތުރުފެށި ގާފިލާއެކެވެ.

މި ގާފިލާ މިދިޔަ ހަފްތާގައި މަޑުކޮށްފައިވަނީ މެކްސިކޯގެ ވެރިރަށް މެކްސިކޯ ސިޓީގައެވެ.

އެމެރިކާގެ ޑިފެންސް ސެކްރެޓަރީ ޖޭމްސް މެޓިސްވަނީ ބުދަ ދުވަހުގެ ވަގުތެއްގައި ސަރަހައްދީ ރޮނގަށް ވަޑައިގަންނަވާނެކަމަށް ވިދާޅުވެފައެވެ.

މިއީ ރެފިއުޖީންގެ ގާފިލާ ހުއްޓުވުމަށް އެމެރިކާއާއި މެކްސިކޯ ގުޅޭ ސަރަހައްދީ ރޮނގު ކައިރިއަށް އެމެރިކާގެ 5،200 ސިފައިން ފޮނުވުމަށް އެ ގައުމުން ނިންމި ފަހުން މެޓިސް އެ ސަރަހައްދަށް ކުރައްވާ ފުރަތަމަ ދަތުރުފުޅެވެ.

އެމެރިކާއިން ހިމާޔަތް ހޯދުމަށް ދަތުރުކުރަމުންދާ ރެފިއުޖީންގެ ތެރޭގައި ގިނައިން ތިބީ ގުއަޓަމާލާ، ހޮންޑިއުރަސް އަދި އެލް ސެލްވަޑޯރ ފަދަ ޤައުމުތަކުގައި ހިނގަމުންދާ އެކިއެކި ހަމަނުޖެހުންތަކުން ސަލާމަތްވެ، ރައްކާތެރި ދިރިއުޅުމެއް ހޯދުމަށް އެމެރިކާއަށް މިސްރާބު ޖަހާފައިވާ މީހުންނެވެ.