ރައީސް އަބްދުﷲ ޔާމިން ވެރިކަމުގައި ހުންނަވައިގެން ދެކިލައްވަން ބޭނުންފުޅުނުވި މަންޒަރުތައް މަސްރަހަށް އަޔަ ނުދިނުމަށްޓަކައި ބޮޑެތި މަސައްކަތްތަކެއް ކުރެއްވި އެވެ. ގާނޫނާ ހިލާފުވިޔަސް ނުވިޔަސް އެމަނިކުފާނު މިދުވަސް އަޔަ ނުދިނުމަށްޓަކައި ކުރެވުނު ހުރިހާ ކަމެއް ކުރެއްވި އެވެ. ނަމަވެސް މިއަދު އައިސްފައިވަނީ އެމަނިކުފާނު ވެރިކަމުގައި ހުންނަވަނިކޮށް އެކަން ބައްލަވަން މަޖުބޫރުކުރުވި ހާލަތެކެވެ. އެމަނިކުފާނު ދައުލަތުގެ އެންމެ މަތީ ވެރިޔަކަށް ހުންނެވިއެއް ކަމަކު ފެންނަނީ ރަމްޒީ މަގާމެއްގައި ހުންނަވާ ބޭފުޅެއްގެ ގޮތުގައި އެވެ.
ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާ އުފުލީ އޭގެ ކުރިން އެމަނިކުފާނުގެ މައްޗަށް ކޮށްފައި އޮތް ދައުވާ އަނބުރާ ގެނެސް ބޮޑު ދައުވާއެއްގެ ގޮތުގައި އެވެ. ފަޓާސްބަރިއެއްހެން އަވަސް އަރުވައިލައިގެން ޝަރީއަތްކޮށް ނިންމާލުމުގައި ރައީސް ޔާމިންގެ ނުފޫޒު އޮތް ކަމަށް ދެކެވޭ ވާހަކައަކީ މީހުނަށް އެކަން ގަބޫލު ކުރެވޭ މިންވަރަށް ކުރެވޭ ތުހުމަތެކެވެ. ރައީސުލްޖުމްހޫރިއްޔާގެ މަގާމަށް ވަޑައިގެންނެވުމަށްފަހު ރައީސް ނަޝީދަކީ މިނިވަނެއްގެ ގޮތުގައި އުޅޭ ސިޔާސީ ބޭފުޅަކަށް ވާން ރައީސް ޔާމިން ބޭނުންފުޅު ނުވިކަމަށް ގަބޫލުކުރަން ޖެހޭ ސަބަބަކީ އެކެއް ފެބްރުއަރީ ގައި ސުޕްރީމް ކޯޓުން ނެރުނު އަމުރުގައި ރައީސް ނަޝީދު މިނިވަން ކުރުމަށް އޮތުމުން އެކަން ތަންފީޒު ނުކުރައްވަން އެ އުޅުއްވި ގޮތެވެ. އަދި އެ ނޫންވެސް ހާލަތްތަކުގައި ރައީސް ނަޝީދު މިނިވަންކުރުމަށް އެމްޑީޕީން ކުރި މަސައްކަތައް ރައީސް ޔާމިންގެ މި ސަރުކާރުން ހުރަސް އެޅުވި އެވެ. މިހުރިހާ ކަމެއް ކުރެއްވި ނަމަވެސް އެންމެ ފަހުން ރައީސް ޔާމިން ވެރިކަމުގައި ހުންނަވަނިކޮށް ސުޕްރީމް ކޯޓުން ނެރުނު ވަގުތީ އަމުރަކާއެކު ރައީސް ނަޝީދު ރާއްޖެއިން ބޭރުގައި ހުންނެވުމަށްފަހު ވަޑައިގެންނެނެވީ މިނިވަނެއްގެ ގޮތުގައި އެވެ.
ފުލުހުންނާއި ސިފައިންގެ ހިމާޔަތުގައި ރައީސް ނަޝީދު މާލޭގެ މަގުމަތީ ހިންގަވާފައި ވަޑައިގެންނެވީ ގައުމީ ބަތޮލެއްގެ ގޮތުގައި އެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމި އުޅެނިކޮށް ދައްކާލީ އެވެ. ޝެއިޚް އިމްރާން އަބްދުﷲ އާއި ގާސިމް އިބްރާހިމާއި ކުރީގެ ޑިފެންސް މިނިސްޓަރ ނާޒިމަކީ ރައީސް އަބްދުﷲ ޔާމިންގެ މައްޗަށް ބޮޑެތި ޖިނާއީ ތުހުމަތުތައް ކުރައްވަމުން ގެންދަވާ ބޭފުޅުންނެވެ. ބޭއިންސާފުން އަވަސް އަރުވަލައިގެން ހިންގުނު ޝަރީއަތްތަކަކާއެކު އެ ބޭފުޅުން ޖަލަށް ލެއްވި ނަމަވެސް ރައީސް ޔާމިންގެ ވެރިކަން ނުނިމި އުޅެނިކޮށް އެ ބޭފުޅުން މިނިވަންކަމާއެކު އެނިކުންނެވީ އެވެ. ކުރީގެ ޑިފެންސް މިނިސްޓަރ ނާޒިމް ފާޅުކަން ބޮޑުގޮތެއްގައި އެ ވިދާޅުވަމުން ގެންދަވަނީ އެމަނިކުފާނު ފްރޭމް ކުރުމުގެ އެއް ބައިވެރިޔަކީ ރައީސް ޔާމިން ކަމަށެވެ. ނަމަވެސް މިއަދު ރައީސް ޔާމިންގެ ކިބައިގައި އެ ވާހަކަތައް ހުއްޓުވާނެ ބާރެއްވެސް އަދި ތިޔަ ކިޔަނީ ކީކޭތޯ އަހާލަން ފުލުސް އޮފީހަށް ގެންދާނެ ބާރެއް ވެސް އޮތްތަނެއް ނުފެނެ އެވެ. މިނިވަންކަމާއެކު މި ބީދައިން އެ މަނިކުފާނަށް ފާޑުކިޔުމުގެ ފުރުސަތު މި ބޭފުޅުނަށް އަދި އަމުދުން ދޭން ބޭނުންފުޅު ނުވި ނަމަވެސް ހާލަތު ނިޔާކުރަނީ އެ އަޑުތައް އައްސަވާށެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމިއުޅެނިކޮށް ބައްލަވަން މަޖުބޫރުވީ އެވެ.
ދިއްގަރު ދާއިރާގެ ކުރީގެ މެމްބަރު އަހްމަދު ނާޒިމް ކުއްލި ގޮތަކަށް ޖަލަށްދާން ޖެހުނީ އަދި ކުރީގެ އޮޑިޓަރ ޖެނަރަލް ނިޔާޒް އިބްރާހިމް ކުއްލި ގޮތަކަށް މަގާމުން ވަކިކޮށްލީ ސަރުކާރުގެ ތެރޭގައި ހިނގައި ދިޔަ ކޮރަޕްޝަނުގެ އަމަލުތައް ރައީސް ޔާމިނާ ހިސާބަށް ގެންދިއުމުން އެ އަޑުތައް އެހެން ބަޔަކަށް އިވިދާނެތީ ކަމަށް ބެލެވިދާނެ އެވެ. ރައީސް ޔާމިން ވެރިކަމުގައި އެއިން ބޭފުޅަކު ފެނިވަޑައިގަންނަވަންވެސް ބޭނުންފުޅު ނުވިކަން އެ ބޭފުޅުންނާ މެދު ކަންކަންވީ ގޮތުން އެނގެ އެވެ. ނަމަވެސް މިއަދު ނާޒިމް ވެސް ނިޔާޒް ވެސް މި ސަރުކާރުގެ ކޮރަޕްޝާނާ ރައީސް ޔާމިނާ ގުޅޭ ގޮތް އަމިއްލަ ތަޖުރިބާގެ އަލީގައި އެ ވިދާޅުވަމުން ގެންދަވަނީ ޖެހިލުމެއް ނެތި އެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމިއުޅެނިކޮށް ބައްލަވަން މަޖުބޫރުވީ އެވެ.
ރައްޔިތުންގެ މަޖިލީހުގެ ރައީސްގެ މަގާމުން އަބްދުﷲ މަސީހް ވަކިކުރުމަށް މަޖިލިސް މެމްބަރުން ކުރަން އުޅުނު މަސައްކަތްތައް ރައީސް ޔާމިން ހުރަސްއަޅުއްވަން ކުރެއްވި މަސައްކަތުގެ ތެރެއިން ފެނުން މަންޒަރުތައް ތަފްސީލް ކޮށްދިނުމަކީ ފަސޭހަ ކަމަކަށް ނުވާނެ އެވެ. މަޖިލީހުގެ ރައީސްގެ މަގާމު ބަދަލު ކުރުމާއި ރައީސް ޔާމިނާ ގުޅުމެއް ނެތް ނަމަވެސް އެމަނިކުފާނު އެކަމާ އެ އުޅުއްވީ އަމިއްލަ ގެދޮރާއި މުދާ ދުޝްމަނެއްގެ ކިބައިން ސަލާމަތްކުރުމަށް މީހަކު އުޅޭނެ ގޮތަށެވެ. އެ މަސައްކަތުގެ ތެރެއިން މަޖިލީހުގެ ބައެއް މެމްބަރުންގެ ގޮނޑި ގެއްލިއްޖެ ކަމަށްވެސް ކަނޑައަޅައިގެން ހިފަހައްޓާލީ އެވެ. ނަމަވެސް މިއަދު ބޮޑު އަގުލަބިއްޔަތަކުން މަޖިލީހުގެ ރިޔާސަތު ބަދަލުކޮށް ރައީސް ޔާމިންގެ ސިޔާސީ ދުޝްމަނެއްގެ ގޮތުގައި ދެކުނު ގާސިމް އިބްރާހިމް އެ އިންނެވީ ރިޔާސަތުގައި އެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމިއުޅެނިކޮށް ބައްލަވަން މަޖުބޫރުވީ އެވެ.
ސުޕްރީމް ކޯޓުން އެކެއް ފެބްރުއަރީގައި ނެރުނު ހުކުމާހެދި ރައީސް ޔާމިނަށް ވެވަޑައިގެންނެވި އުނދަގޫފުޅުތައް ފެނުނު ނަމަވެސް އޭގެ ފަހުން އެކި ބައި ބަޔަށް ބަހައިލައިގެން އެކެއް ފެބްރުއަރީގައި ނެރުނު އަމުރުގެ ނަތީޖާ މިހާރު އޮތް ސުޕްރީމް ކޯޓުން ނެރުނީ އެވެ. މިއަދަކު އެ އަމުރު ތަންފީޒު ނުކުރައްވަން ދެއްކޭނެ ހުއްޖަތެއްވެސް ނެތެވެ. އެކަމު މިއަދުވެސް އޮތީ އެ ފުލުހުންނާއި ސިފައިންނެވެ. ތަންފީޒު އެ ކުރެއްވީ އެ މީހުން ލައްވަ އެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމިއުޅެނިކޮށް ބައްލަވަން މަޖުބޫރުވީ އެވެ.
މަޖިލީހުން އަވަސް އަރުވާލައިގެން ފާސްކުރި ގާނޫނުތައް ވެސް އެއޮތް އަނެއް ކޮޅަށް ފާސްކުރަން ފެށީ އެވެ. އެންޓި ޑިފެކްޝަން ގާނޫނާއި އަބުރުގެ ގާނޫނު ފަދަ ކިތަންމެ ގާނޫނެއް އުވާލަން މިއަދު ފާސް ކުރަނީ އެއީ ރައީސް ޔާމިނަށްޓަކައި އުފެއްދި ގާނޫނުތައް ކަމަށް ޕީޕީއެމްގެ މެމްބަރުންވެސް ގަބޫލުކޮށްގެންނެވެ. ރައީސް ޔާމިން ބައްލަވަން ބޭނުންފުޅު ނުވި މަންޒަރު އެމަނިކުފާނުގެ ވެރިކަން ނުނިމިއުޅެނިކޮށް ބައްލަވަން މަޖުބޫރުވީ އެވެ.
މިއަދު ރައީސް ޔާމިން މިދުވަސް ދެކުމަށް ވުރެ އޭގެ ކުރިން ވެރިކަން ވެއްޓިގެން ދިއުންވެސް މާރަނގަޅުވީހޭ ހިތްޕުޅަށް އެމަނިކުފާނުގެ އަރާ ވަޑައިނުގަންނަވާނެ ބާ އެވެ. އަދި މުވައްސަސާތަކުން އެދުވަހުވެސް ބޭނުންވި ގޮތައް ނިންމަން ދޫދެވުނު ނަމަ ބަލިވި ވަގުތު މިހާ ބޮޑު ލަދަކާ ކުރިމަތިލާން ޖެހިވަޑައިއެއްވެސް ނުގަންނާނެ އެވެ.
