ހޮސްޕިޓަލުގައި އެޑްމިޓްކޮށްފައިވާ މަންމަ ގާތު އިނުމަށް ފަހު، އުމުރުން 25 އަހަރުގެ ހައްވާ ޝައުލާ ގެއަށް އައީ ނިދުމަށްޓަކައެވެ. އެޑްމިޓްކޮށްފައިވާ މަންމަ ކައިރީގައި ފިރިހެން ކޮއްކޮ މަޑުކުރަން ބުނެފައި، ގެއަށް އައީ ހެނދުނު ޑިއުޓީއަށް ދާންޖެހޭތީއެވެ. އައި ގޮތަށް އޭނާ ވަނީ ކޮޓަރިއަށެވެ. ހެދުން ބަދަލު ކޮށްގެން ނިދާ އެނދަށް އަރާ އޮތީ ފޯނާ ކުޅެންށެވެ. ނިދި ނައިސްގެން ފޯނާ ކުޅެލަ ކުޅެލާ އޮއްވާ ކުއްލިއަކަށް ވަރަށް ބާރު އަޑެއް އިވުނެވެ. ބަޔަކު ގޭތެރެ އަށް ވަދެގެން އުޅޭ ކަހަލަ އަޑެކެވެ. ކޮން ބައެއްތޯ ބެލުމަށް ކޮޓަރިން ނުކުން އިރު ގޭގެ މައި ދޮރު ފަޅާލުމަށް ފަހު މޫނު ނިވާކޮށްގެން ތިބި ތިން މީހުން ގޭތެރެއަށް ދުވަމުން ވަދެގެން އަންނަ މަންޒަރު ފެނުނެވެ.

ގަތް ބިރާއެކު ހުރި ބާރެއް ލާފައި ގޮސް ކޮޓަރިއަށް ވަދެ ތަޅުލިއެވެ. ކޮޓަރީގައި ވެސް ހުންނަން ނުކެރިގެން ވަނީ ފާހާނާއަށެވެ. ފާހާނާއަށް ވަދެ، ދޮރު ތަޅުލިއެވެ. ޝައުލާގެ ފުރާނައަށް ބަޔަކު ގެންލުންދޭން ގެއަށް ވަނީ ކަމަށް ހީކޮށް އޭނާ އަށް ރޮއިގަނެވުނެވެ. ފޯނުން އެއްބަނޑު އެއްބަފާ ކޮއްކޮއަށް ގުޅިއެވެ. އަދި މޫނު ނިވާކޮށްގެން ތިބި ބަޔަކު ގެއަށް ވަދެގެން އުޅޭ ވާހަކަ ޝައުލާ ބުންޏެވެ. މީހާ ތުރުތުރު އަޅާހާލު ފާހަނާ ތެރޭގައި ހާސްކަމާ އެކު ހުރި އިރު ކުއްލިއަކަށް އެއްޗެއް އަނދާ ވަސް ދުވަން ފެށިއެވެ. ވަރަށް ބޮޑަށް އަނދާ ވަސް ގަދަވެ، ފާހާނާގެ ދޮރުގެ ތިރިން ކޮންމެ ވެސް ވަރަކަށް ދުން ވެސް ވަންނަން ފެށިއެވެ. ކިހިނެތް ވަނީތޯ ބަލަން ދޮރު ހުޅުވީ، ގެއަށް ވަން މީހުންގެ އަޑު ވެސް ކެނޑުމުންނެވެ.

ޝައުލާ ލިބުނީ އިތުރު ޝޮކެވެ. ހަދާނެ ގޮތް ހުސްވިއެވެ. އޭރު ކޮޓަރީގެ ދޮރާ ދިމާލުން ކޮންމެވެސް ވަރަކަށް އަލިފާންގަނޑު ހިފައިފާވާ މަންޒަރު ފެނުނެވެ. ގަތް ބިރުން ހަޅޭލަވައިގަތެވެ. މީހެއްގެ އެހީއެއް ލިބޭތޯ ބާރަށް ހުއްޓުމެއް ނެތި ޝައުލާ ދިޔައީ އެހީއަށް އެދި ގޮވަމުންނެވެ. މުޅި ކޮޓަރީގައި އޭރު ދުންތައް ވަނީ ފެތުރިފައެވެ. އަލިފާންގަނޑު ބާރަށް ކޮޓަރީގެ ތެރެއަށް ވެސް ދިޔައީ ފެތުރެމުންނެވެ.

އިރުކޮޅަކުން ކޮޓަރި ބޭރުން ކޮއްކޮގެ އަޑު އިވުނެވެ. ކޮއްކޮ އައިސް ކޮޓަރީގެ ކުޑަދޮރު ފަޅާލިއެވެ. ބިއްލޫރިގަނޑު ހަލާކުކޮށްލުމަށް ފަހު އޭނާ ސަލާމަތްކުރިއެވެ.

ކޮއްކޮގެ ގައިގާ ބައްދައިގަނެ، ހިނގާ ދިޔަ ބިރުވެރިކަންތައްތަކާ ހުރެ ޝައުލާ އަށް ބާރަށް ރޮއި ގަނެވުނެވެ. އޭރު ވެސް ބޯކޮށް ދުންއަރަމުން ދިޔައެވެ. ލިބުނު ޝޮކެއްގެ ސަބަބުން ކޮއްކޮ ހޭނެތުނެވެ. އޭރު ފުލުހުންނާއި އެމްއެންޑީއެފް އިން ދިޔައީ ބޮޑުވެފައިވާ އަލިފާންގަނޑު ނިއްވާލުމަށް މަސައްކަތް ކުރަމުންނެވެ. އެމްބިއުލެންސް ވެސް އެ ސަރަހައްދަށް އައެވެ. ބަޔަކު ވެގެން ކޮއްކޮ ހޮސްޕިޓަލަށް ގެންދިޔައެވެ.

މިއީ ފެބްރުއަރީ މަހުގެ 11 ވަނަ ދުވަހު އައްޑޫ ސިޓީ ދޮންލަފަރު ގޭގައި ހިނގި އަލިފާނުގެ ހާދިސާ ތަޖުރިބާ ކުރި އަންހެން ކުއްޖާގެ ވާހަކައެވެ. މި މައްސަލައާ ގުޅިގެން ފުލުހުން ހަ މީހުން ހައްޔަރުކޮށްފައިވާ އިރު މިއީ ސިޔާސީ ކަމެއްގެ ގޮތުގައި ފުލުހުން ތުހުމަތު ކުރިއެވެ.

އެހެން ނަމަވެސް ޝައުލާ ވަނީ އެގޭގައި ރޯ ކޮށްލާފައި ވަނީ ސިޔާސީ ކަމެއްގައި ކަމަށް ގުބޫލު ނުކުރެވޭ ކަމަށް ބުނެފައެވެ. ހިތާމައަކީ މޫނު ނިވައިކޮށްގެން ތިބީ ކޮން ބައެއް ކަން އޭނާ އަށް ނޭނގޭތީއެވެ. އެ އާއިލާގެ އެންމެ ބޮޑު ކަންބޮޑުވުމަކީ ދިރިއުޅޭނެ ތަނެއް ނުލިބުމެވެ. ޝައުލާގެ ވެސް އަދި އޭނާގެ ދެ ކޮއްކޮ އާއި މަންމަގެ ހުރިހާ އަންނައުނާއި، ގެ އެއްކޮށް ވަނީ ބިމާ ހަމަވެފައެވެ. އެ އާއިލާއިން ބޭނުންވަނީ، އެހީތެރިވާނެ އަތެކެވެ. ޝައުލާ ބުނީ އެ އައިލާގައި ވަޒީފާއަކަށް ދަނީ ހަމައެކަނި އޭނާ ކަމަށާއި އޭނާއަށް ލިބޭ އެއްޗަކުން ގެ އިމާރާތް ކުރުމުގެ ގާބިލް ކަން ނެތް ކަމަށެވެ. މިހާރު އެ އާއިލާ ދިރިއުޅެމުންދަނީ އަވައްޓެރި ގެއެއްގެ ކޮޓަރިއެއްފައެވެ. ހަތަރު މީހުންގެ އެ އާއިލާ އެކޮޓަރީގައި ދިރިއުޅޭ އިރު ޝައުލާ ބުނީ ބޭނުން ވަނީ މިއަށްވުރެ ރަގަޅު ގޮތެއް އެ އާއިލާއަށް ވެގެން ދިއުން ކަމަށެވެ.