އެމްނެސްޓީ އިން އަންގ ސަން ސޫކީ އަށް ދީފައިވާ އެވޯޑު އަތުލަނީ

އެމްނެސްޓީ އިންޓަނޭޝަނަލް އިން މިޔަންމާގެ ލީޑަރު އަންގ ސަން ސޫކީ އަށް އަރުވާފައިވާ އިންސާނީ ހައްގުތަކަށް މަސައްކަތް ކުރާ "އެމްބެސެޑަރ އޮފް ކޮންސައިން އެވޯޑް" އަނބުރާ އަތުލުމަށް ނިންމާފައިވާ ކަމަށް އެ ޖަމާއަތުން ހާމަކޮށްފިއެވެ.

ނޮވެމްބަރު މަހު 12 ވަނަ ދުވަހު އެމްނެސްޓީން އަނބުރާ ގެންދާނެ ކަމަށް އިއުލާނުކުރި އެ އެވޯޑަކީ 2009 ވަނަ އަހަރު ސޫކީ ގޭ ބަންދުގައި ހުންނެވި ދުވަސްވަރު އަރުވާފައިވާ އެވޯޑެެކެވެ.

އެމްނެސްޓީގެ ސެކެރެޓަރީ ޖެނެރަލް ހޯމަ ދުވަހު ނެރުއްވި ބަޔާނުގައި ވާގޮތުގައި އެވޯޑް އަނބުރާ ގެންދަން ނިންމާފައި ވަނީ މިޔަންމާގައި ހިގަމުންދާ ލާއިންސާނީ ކަންތައްތައް ހުއްޓުވަމަށްޓަކައި އެކަމަނާ އެދެވޭ މަސައްކަތްތަކެއް ކުރައްވާފައި ނުވާތީއެވެ. އެމްނެސްޓީއިން ބުނެފައިވަނީ އެ ޖަމާއަތުން އުއްމީދު ކޮށްގެން ތިބީ އެ ޖަމާއަތުގެ މެދުވެރިއެއްގެ ގޮތުގައި ސޫކީ މަސައްކަތް ކުރައްވާނެ ކަމަށެވެ. ނަމަވެސް އެ ކަމަނާގެ ފަރާތްޕުޅުން ފެނިގެންދިޔައީ ލަދުވެތި އަމަލުތަކެއް ކަމަށް އެމްނެސްޓީން ވަނީ ބުނެފައެވެ.

ފަހަކަށް އައިސް މިޔަންމާގެގައި ހިގަމުންދާ ކަންތައްތަކުގައި އަން ސަން ސޫކީ ހަނު ހުންނަވާތީ އެ ކަަމަނާއަށް ވަނީ އދ. އާއި ދުނިޔޭގެ ފާޑު ކިޔުން އަމާޒުވެފައެވެ. ސޫކީ އަށް އަރުވާފައިވާ ނޮބެލް ސުލްހައިގެ އިނާމު ވެސް އަތުލުމަށް ގޮވާލައި ދުނިޔޭގެ އެކިކަންކޮޅުތަކުގައި ވަނީ މުޒަހަރާ ކޮށްފައެވެ.

ސޫ ކީއަށް ކެނެޑާ އިން ދީފައިވާ ރަމްޒީ ރައްވެހިކަން އަތުލުމަށް ކެނެޑާގެ ގާނޫނު ހަދާ މަޖިލީހުގެ އިއްތިފާގުން ފާސްކޮށް އެ ގައުމުން ވަނީ 2007 ވަނަ އަހަރު ސޫކީއަށް ދީފައިވާ އެ ޝަރަފު އަނބުރާ ގެންގޮސްފައެވެ.

މިޔަންމާގައި ދިރިއުޅޭ ރޮހިންޖާ މުސްލިމުންނާ ދެކޮޅަށް ހިންގި ގަތުލުއާންމުތަކާ ގުޅިގެން އެ ގައުމު ދޫކޮށް 700،000 އެއްހާ މީހުން ވަނީ އަވަށްޓެރި ބަންގްލަދޭޝްއަށް ވަދެ ރައްކާތެރިކަން ހޯދާފައެވެ.