އުތުރު ކޮރެއާގެ ލީޑަރު ކިމް ޖޮން އުންގެ އެއްބަފާ ބޭބެ ކިމް ޖޮން ނަމް ދާދި ފަހުން މެލޭޝިއާ އެއާޕޯޓެއްގައި މަރާލުމުގެ ހާދިސާއާ ގުޅިގެން ދެ ގައުމުގެ ގުޅުން ހީނަރުވެ މެލޭޝިއާ އިން އުތުރު ކޮރެއާ އަށް ކަނޑައަޅުއްވާފައިވާ އެމްބެސެޑަރު ގައުމު ދޫކޮށް ދާން އުތުރު ކޮރެއާ އިން އަންގައިފިއެވެ.

އުތުރު ކޮރެއާގެ ދައުލަތުގެ މީޑިއާ އިން ރިޕޯޓު ކުރާ ގޮތުން މެލޭޝިއާ އިން އުތުރު ކޮރެއާ އަށް ކަނޑައަޅުއްވާފައިވާ އެމްބެސެޑަރު، އުތުރު ކޮރެއާ ދޫކޮށް 48 ގަނޑިއިރުތެރޭ ގައުމަށް ވަޑައިގަންނަވާނެއެވެ.

މެލޭޝިއާ އިން އުތުރު ކޮރެއާ އަށް ކަނޑައަޅުއްވާފައިވާ އެމްބެސެޑަރު ގައުމު ދޫކޮށް ދާން އުތުރު ކޮރެއާ އިން އަންގައިފާވާއިރު، އުތުރު ކޮރެއާ އިން މެލޭޝިއާއަށް ކަނޑައަޅުއްވާފައިވާ އެމްބެސެޑަރު މެލޭޝިއާ ދޫކޮށް ދާން މީގެ ދެތިން ދުވަހެއްހާ ކުރިން މެލޭޝިއާ އިން ވަނީ އަންގާފައެވެ. މެލޭޝިއާ ދޫކޮށްދާން އުތުރު ކޮރެއާގެ އެމްބެސެޑަރަށް އެންގީ، ކިމް ޖޮން ނަމް ގެ މަރުގެ ތަހުގީގު މެލޭޝިއާ އިން ކުރާ ގޮތަށް އޭނާ ފާޑުވިދާޅުވެފައިވާތީ ކަމަށް ރިޕޯޓުތައް ބުނެއެވެ.

އުތުރު ކޮރެއާގެ ލީޑަރު ކިމް ޖޮން އުންގެ އެއްބަފާ ބޭބެ ކިމް ޖޮން ނަމް ދާދި ފަހުން މެލޭޝިއާ އެއާޕޯޓެއްގައި މަރާލީ ދެއަންހެނުން ވެގެން ވަރަށް ބާރުގަދަ ވިހައެއް ހާކައިގެންނެވެ. އެ ދެއަންހެނުންގެ މައްޗަށް މެލޭޝިއާ އިން ވަނީ ގަސްތުގައި މީހަކު މަރާލުމުގެ ކުށުގެ ދައުވާ އުފުލާފައެވެ.

އެއްވެސް އިރެއްގައި އުތުރު ކޮރެއާ އާއި މެލޭޝިއާއަކީ މާ ރަހުމަތްތެރި ދެ ގައުމެއް ނޫނެވެ. އެހެން ނަމަވެސް ގުޅުން ގޯހެކޭ ވެސް ދެންނެވޭކަށް ނެތެވެ. ދެ ގައުމުން ރަސްމީ ގުޅުން ބާއްވަން ފަށާފައިވަނީ ޖޫން 1973 ގައެވެ. އުތުރު ކޮރެއާގައި އެމްބަސީއެއް ހުންނަ 30 އަށް ވުރެ މަދު ގައުމު ތެރޭގައި، މެލޭޝިއާ ހިމެނެއެވެ.