ސައުދީގެ ތެލުގެ އެކްސްޕޯޓް ދަށްކުރަނީ

ތެލުގެ އަގު ދަށަށް ދިއުން ހުއްޓުވުމަށް ތެޔޮ އެކްސްޕޯޓްކުރާ މައި ގައުމުތަކުން އެއްބަސްވި ގޮތަށް، އަންނަ ޑިސެމްބަރު މަހުން ފެށިގެން ސައުދީ އަރަބިއްޔާއިން ތެޔޮ އެކްސްޕޯޓްކުރާ މިންވަރު ދުވާލަކަށް 500،000 ފީފާއަށް ދަށްކުރާނެ ކަމަށް އެ ގައުމުން ބުނެފިއެވެ.

ސައުދީއިން އެކަން އިއުލާނުކުރައްވާފައިވަނީ ޔޫއޭއީގެ އަބޫދާބީގައި ބޭއްވި ބައްދަލުވުމެއްގައި ނޫސްވެރިންނަށް ޖަވާބުދެއްވަމުން ސައުދީގެ މިނިސްޓަރ އޮފް އެނަރޖީ، އިންޑަސްޓްރީ އެންޑް މިނެރަލް ރިސޯސަސް އަދި ސައުދީ އަރަމްކޯގެ ޗެއަރމަން ޚާލިދް އަލް ފާލިހްއެވެ.

ދުނިޔޭގެ އެންމެ ގިނައިން ތެޔޮ އެކްސްޕޯޓްކުރާ ގައުމުކަމަށް ސައުދީ އަރަބިއްޔާއިން، އޮކްޓޯބަރު މަހުންފެށިގެން ދުވާލަކަށް 10.7 މިލިއަން ފީފާ ތެޔޮ އެކްސްޕޯޓް ކުރާކަމަށް ފާލިހް ވިދާޅުވިއެވެ.

ތެޔޮ އުފައްދާ މިންވަރު ދަށްކުރަން ސައުދީއިން ނިންމި ނަމަވެސް އެގޮތަށް އެކަން ކުރުމަށް އެހެން ގައުމުތަކަށް ނުފެނުުނުކަމަށް ފާލިހް ވިދާޅުވިއެވެ.

ސައުދީ އިސްވެ އުފައްދާފައިވާ ތެޔޮ އެކްސްޕޯޓްކުރާ ގައުމުތަކުގެ ޖަމްއިއްޔާ، އޯގަނައިޒޭޝަން އޮފް ދި ޕެޓްރޯލިއަމް އެކްސްޕޯޓިންގ ކަންޓްރީސް(އޯޕެކް)އާއި ރަޝިއާ އިސްވެ އުފައްދާފައިވާ ޕެޓްރޯލިއަމް އުފައްދާ ގައުމުތައް ހިމެނޭ 10 މެމްބަރުންގެ ބްލޮކުން ޖޫންމަހުވަނީ މުޅިދުނިޔޭގެ ތެލުގެ ސަޕްލައި ދުވާލަކަށް އިތުރު އެއް މިލިއަން ފީފާ އިތުރުކުރުމަށް އެއްބަސްވެފައެެވެ.

އޭގެ ކުރިން މެއިމަހުން ފެށިގެން އޯޕެކުން ތެޔޮ އުފައްދާ މިންވަރު ދުވާލަކަށް 820،000 ފީފާ އިތުރުކޮށްފައިވާކަމަށް އެސް އެންޑްޕީ ގްލޯބަލް ޕްލެޓްސް އޯޕްކް ސަރވޭއިން ދައްކައެވެ.

ރަޝިއާއިން ނޮވެމްބަރު މަހު ބުނީ ވޭތުވެ ދިޔަ 30 އަހަރުގެ ތެރޭ އެންމެ ގިނައިން ތެޔޮ އުފެއްދި އަހަރަށް މި އަަހަރު ވެފައިވާކަމަށާއި އޮކްޓޯބަރ މަހުން ފެށިގެން ދުވާލަކަށް 11.41 މިލިއަން ފީފާ ތެޔޮ އުފައްދާފައި ވާއިރު މެއި މަހުން ފެށިގެން 440،000 ފީފާ އިތުރުކޮށްފައިވާކަމަށެވެ.