ސައުދީގެ އަންހެން ޑްރައިވަރުންގެ ސަބަބުން އެކްސިޑެންޓްތައް މަދުވާނެ: ސައުދީގެ އިންޓީރިއާ މިނިސްޓަރު

ސައުދީ އަރަބިއްޔާގެ އަންހެނުންނަށް އެއްގަމު އުޅަނދު ދުއްވަން ހުއްދަ ކުރަން ނިންމުމުގެ ސަބަބުން ކާރު އެކްސިޑެންްޓްތައް ހިނގާ އަދަދު މަދުވެގެން ދާނެ ކަމަށް އެގައުމުގެ އިންޓީރިއާ މިނިސްޓަރު އަބްދުލްއަޒީޒް ބިން ސައުދު ބިން ނާއިފު ވިދާޅުވެއްޖެއެވެ.

ނާއިފު ކުރެއްވި ޓްވީޓްތަކެއްގައި ވިދާޅުވީ "އަންހެނުން ކާރު ދުއްވުމުގެ ސަބަބުން ޓްރެފިކް ސޭފްޓީ އިލްމީ ގޮތެއްގައި ބައްޓަންވާނެ ކަމަށާއި އެހެންކަމުން އެކްސިޑެންޓްތަކުގައި އިންސާނުން މަރުވުމާއި އަދި މާލީގޮތުން ލިބޭ ގެއްލުން ދަށްވެގެން ދާނެ ކަމަށެވެ."

ނާއިފު އިތުރަށް ވިދާޅުވީ ގައުމުގެ ސަލާމަތީ ބާރުތައް ތިބީ ޓްރެފިކް ގަވާއިދުތައް އަންހެނުންނަށާއި އަދި ފިރިހެނުންގެ މައްޗަށް ތަންފީޒު ކުރުމަށް ތައްޔާރަށް ކަމަށެވެ.

ސައުދީގައި އަންހެނުންނަށް އެއްގަމު އުޅަނދު ދުއްވަން ހުއްދަކުރިކަން އިއުލާން ކޮށްފައި ވަނީ މި ސެޕްޓެމްބަރުގައި، ސައުދީގެ ރަސްގެފާނު ސަލްމާންއެވެ.

އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ސައުދީގައި އަންހެނުންނަށް އުޅަނދު ދުއްވުމުގެ ހުއްދަ ދިނުމަށް އަޑުއުފުލަމުން އަންނަތާ އަހަރުތަކެއްވެފައިވާއިރު، އެ ހުއްދަ ނުދެނީސް ދުއްވި ބައެއް އަންހެނުން ވަނީ ސައުދީގައި ބަންދުވެސްކޮށްފައެވެ.

ސައުދީގެ ނިންމުމަށް އެމެރިކާ އިން ވަނީ މަރުހަބާ ކިޔާފައެވެ. އެމެރިކާގެ ސްޓޭޓް ޑިޕާޓްމެންޓުން ބުނީ އަންހެނުންނަށް އުޅަނދު ދުއްވުމުގެ ހުއްދަ ސައުދީން ދިނުމަކީ ރަނގަޅު މިސްރާބަށް ދިޔުމަށް އެޅުނު ފިޔަވަޅެއް ކަމަށެވެ.

ސައުދީގައި އަންހެންނުންނަށް އުޅަނދު ދުއްވުމުގެ ހުއްދަ ނޯންނައިރު، ބައެއް އާއިލާތަކަށް ވަނީ ދަތުރުފަތުރުކުރުމަށް ފިރިހެން ޑްރައިވަރުން ހަމަޖައްސަން މަޖުބޫރުވެފައެވެ. ސައުދީގެ ވެބްސައިޓެއް ކަމަށްވާ އަލް އަރަބިއްޔާ އިން ބުނީ ސައުދީގައި އަންހެނުންގެ ބޭނުންތަކަށް 8 ލައްކައެއްހާ ޑްރައިވަރުން ވަޒީފާ އަދާކުރާ ކަމަށެވެ.