އިންޑިއާއިން ތެލުގެ އަގު ހެޔޮ ކޮށްފި

އިންޑިއާ ސަރުކާރުން ދުވަހުން ދުވަހަށް ގެންނަ ތަކެތީގެ އަގުގެ ނިޒާމްގެ ދަށުން ތެލުގެ އަގު ހެޔޮކޮށްފިއެވެ. އެގޮތުން އެކްސައިޒް ޑިއުޓީ ކަނޑާލުމާއެކު ޕެޓްރޯލް އަދި ޑީސަލް ލީޓަރަކުން ދެ ރުޕީސް ވަނީ އަންގާރަ ދުވަހު ހެޔޮވެފައެވެ.

އިންޑިއާގެ ޕެޓްރޯލިއަމް އެންޑް ނެޗުރަލް ގޭސް މިނިސްޓަރު ދަރުމެންދުރާ ޕްރަދާން ވިދާޅުވީ ދިވާލީ އަންނަންވާއިރަށް ޕެޓްރޯލްގެ އަގުތައް ހަމައަކަށް އެޅި ދަށަށް ދާން ފަށާނެ ކަމަށެވެ.

އިންޑިއާގައި ޕެޓްރޯލާއި ޑީސަލްގެ އަގު މިފަހަކަށް އައިސް އުފުލިގެން އައިސްފައި ވަނީ މި އަހަރުގެ ކުރީކޮޅު އެ ދެ ބާވަތުގެ އަގަށް ކޮންމެ ދުވަހަކު ބަދަލުގެންނަށް ފެށި ހިސާބުންނެވެ.

އަންގާރަ ދުވަހު ޕެޓްރޯލް ލީޓަރެއްގެ އަގު ދިއްލީގައި 70.83 ރުޕީސްގައި ހުރިއިރު މުމްބާއީގައި ޕެޓްރޯލް ލިޓަރެއްގެ އަގު ހުރީ 79.99 ރުޕީސްގަ އެވެ. ނަމަވެސް ސަރުކާރުން އަލަށް ގެނައި ބަދަލާ އެކު ދިއްލީގައި ޕެޓްރޯލް ލީޓަރެއްގެ އަގު 68.83 ރުޕީސް އަށް ވަނީ ވެއްޓިފަ އެވެ.

އިންޑިއާގެ ފައިނޭންސް މިނިސްޓްރީން ވިދާޅުވި ގޮތުގައި އެ ފިޔަވަޅު އަޅައިފައި ވަނީ ދުނިޔޭގެ ބާޒާރުގައި ތެލުގެ އަގު މައްޗަށް ދާތީއާއެކު އަދި އާންމުންނަށް ލުއި ދިނުމުގެ މަގްސަދުގަ އެވެ.

2015 ވަނަ އަހަރު ނޮވެމްބަރު މަހާއި 2016 ވަނަ އަހަރާ ދެމެދު އިންޑިއާ އިން ވަނީ އެކްސައިޒް ޑިއުޓީ ފަސް ފަހަރު ބޮޑުކޮށްފަ އެވެ. އެއީ ދުނިޔޭގެ މާކެޓްގައި ވެސް އެންމެ ބޮޑަށް ތެލުގެ އަގު ވެއްޓުނު ދުވަސްވަރެވެ.