ސައުދީގެ ކުރީގެ ވަލީއަހުދު ގައުމުން ބޭރަށް ވަޑައިގަތުން މަނާކޮށް ގަނޑުވަރުގައި ބަންދުކޮށްފައިވާ ކަމަށް ރިޕޯޓުތައް ބުނެފި
ނާއިފްއާ ބެހޭ ގޮތުން ދެކެވޭ ވާހަކަތައް ސައުދީގެ ފޮރިން މިނިސްޓްރީގެ އޮފިޝަލަކު ވަނީ ދޮގު ކުރައްވާފައި
ވަލީއަހުދު ކަމުން ވަކިކުރައްވާފައިވާ މުހަންމަދު ބިން ނާއިފް
ދާދިފަހުން ސައުދީގެ ވަލީއަހުދުކަމުން ވަކިކުރައްވާފައިވާ މުހަންމަދު ބިން ނާއިފް ސައުދީން ބޭރަށް ވަޑައިގަތުން މަނާ ކުރެވިފައިވާ ކަމަށާއި އަދި އެމަނިކުފާނުގެ ގަނޑުވަރުކޮޅުގައި ބަންދު ކުރެވިފައިވާ ކަމަށް އެމެރިކާގެ އޮފިޝަލުންނާއި އަދި ސައުދީ ޝާހީ އާއިލާއާ ގާތް ގުޅުމެއް އޮންނަ ސައުދީގެ ފަރާތްތަކުން ބުނެފިއެވެ.
މިހިނގާ ޖޫން މަހުގެ 21 ގައި ވަލީއަހުދު ކަމުން ނާއިފް ވަކިކުރެއްވުނު އިރު ނާއިފް ގެންދެވީ ގައުމުގެ އެތެރޭގެ ސަލާމަތީ ޚިދުމަތްތަކުގެ ވެރިޔާގެ މަގާމު ވެސް އަދާކުރައްވަމުންނެވެ.
ސައުދީގެ ކުރީގެ ވަލީއަހުދު މުހަންމަދު ބިން ނާއިފް ސައުދީން ބޭރަށް ވަޑައިގަތުން މަނާ ކުރެވިފައިވާ ކަމަށާއި އަދި އެމަނިކުފާނުގެ ގަނޑުވަރުކޮޅުގައި ބަންދު ކުރެވިފައިވާ ކަން އެމެރިކާގެ ނިޔު ޔޯކް ޓައިމްސް އިން ރިޕޯޓު ކުރާއިރު، އެ ނޫހުގެ މިކަމާ ގުޅޭ ޚަބަރުގައި ވަނީ ސައުދީ ފޮރިން މިނިސްޓްރީގެ ބަހެއް ހިމަނާފައެވެ.
ސައުދީގެ ފޮރިން މިނިސްޓްރީގެ އިސް އޮފިޝަލަކާ ހަވާލާދީ، އެ އޮފިޝަލް ބުދަދުވަހުގެ ރޭ ވިދާޅުވި ކަމަށް ނިއު ޔޯކް ޓައިމްސްގައި ބުނީ ނާއިފްއާ ބެހޭ ގޮތުން ދެކެވެނީ "އަސްލެއް ނެތް ދޮގު ވާހަކައެއް" ކަމަށެވެ.
ސަލްމާން ރަސްގެފާނަށް ފަހު ތަޚުތައް ވަޑައިގަންނަވާނެ ކަމަށް ބެލެވިފައި އޮތް އުމުރުފުޅުން 57 އަހަރުގެ މުހައްމަދު ބިން ނާއިފް ޝާހީ އަމުރުފުޅަކުން ވަލީ އަހުދުކަމުން ވަކި ކުރައްވާފައިވާއިރު، އާ ވަލީއަހުދުގެ މަގާމަަށް އައްޔަން ކުރައްވާފައި ވަނީ ރަސްގެފާނުގެ ދަރިކަލުން އަދި ކުރިން ވަލީއަހުދުގެ ނައިބަކަށް ހުންނެވި އުމުރުފުޅުން 31 އަހަރުގެ މުހައްމަދު ބިން ސަލްމާންއެވެ. ސައުދީ ރަސްމީ ނޫސް އޭޖެންސީން ބުނާ ގޮތުގައި ވަލީއަހުދުގެ އިތުރުން އެ މަނިކުފާނު ވަނީ ބަޮޑުވަޒީރުގެ ނައިބު ކަމަށް ވެސް އައްޔަން ކުރައްވާފައެވެ.
