ލަންކާއަށް ތެލުގެ ތާށިކަން ކުރިމަތިވެއްޖެ

ސަޕްލައި މެދުކެނޑި، ސްރީލަންކާގައި ތެޔޮ ވިއްކުން ކޮންޓްރޯލްކޮށްފިއެވެ.

ސްރީލަންކާގެ ސަރުކާރުގެ ތަރުޖަމާނު ރަޖިތާ ސެނަރަތުނަ ވިދާޅުވީ ތެޔޮ ލިބުމުގައި ދަތިތަކެއް ދިމާވީ ސަރުކާރުގެ ތެޔޮ ކުންފުނި ސިލޯން ޕެޓްރޯލިއަމް ކޯޕަރޭޝަން (ސިޕެޓްކޯ) އިން ތެޔޮ ސަޕްލައިކުރުމުގައި ލަސްތަކެއް ދިމާވެގެންކަމަށެވެ. ތެޔޮ ވިއްކުން ކޮންޓްރޯލްކުރުމާއި ގުޅިގެން ޕެޓްރޯލް ޝެޑްތައް ދޮށުގައި ވަރަށް ބޮޑަށް ކިޔޫ ޖެހިފައިވެއެވެ. ސިޕެޓްކޯއިން ގެންނަ ތެޔޮ ޝިޕްމަންޓް ލަސްވެފައިވަނިކޮށް މައްސަލަ އިތުރަށް ގޯސްވީ ލަންކާގައި ތެލުގެ ވިޔަފާރިކުރާ މައި އަނެއް ކުންފުނިކަމަށްވާ ލަންކާ އިންޑިއަން އޮއިލް ކޯޕަރޭޝަން (ލަންކާ އައިއޯސީ)އިން ގެނައި ތެޔޮ ޝިޕްމަންޓެއްގެ ސްޕެސިފިކޭޝަން މައްސަލަތަކެއް ދިމާވީ، އެޝިޕްމަންޓް އަނބުރާ ފޮނުވާލަން ޖެހުމާއި ގުޅިގެންނެވެ. އަނބުރާ ފޮނުވާލި ތެޔޮ ޝިޕްމަންޓްގެ ބަދަލުގައި އަންނަ ޝިޕްމަންޓް އަންނާނީ 2 ހަފްތާއެއްހާ ދުވަސްފަހުންކަމަށް ލަންކާ އައިއޯސީއިން ބުނެއެވެ.

ލަންކާ ސަރުކާރުގެ ތެޔޮ ކުންފުނިން ބުނީ އެކުންފުނިން ގެންނަ ތެޔޮ ޝިޕްމަންޓް ހޯމަ ދުވަހު އަންނާނެކަމަށާއި، އަންގާރަދުވަހުން ފެށިގެން ތެލުގެ ތާށިކަން ހައްލުވާނެކަމަށް ލަންކާގެ ސަރުކާރުން ބުނެ އެވެ. ލަންކާ އައިއޯސީއިން ބުނީ އެކުންފުނީގެ ޓޭންކްތަކުގައި ތެޔޮ އެބަހުރިކަމަށާއި، އަނބުރާ ފޮނުވާލި ޝިޕްމަންޓްގެ ސަބަބުން ސަޕްލައިއަށް ހަޤީގަތުގައި އަސަރުނުކުރާނެކަމަށެވެ. ސިޕެޓްކޯގެ ޝިޕްމަންޓް އައުމުން ދެކުންފުނީގެ ތެޔޮ ސަޕްލައިވެސް ހަމަޔަކަށްއެޅި، ލަންކާއަށް ދިމާވެފައިވާ ތެލުގެ މައްސަލަ ހައްލުވާނެކަމަށް ދެކުންފުނީގެ ވެރިން ބުނެއެވެ.