ސްޓޭންޑަޑަށް ނުފެތޭތީ ލަންކާއަށް އެތެރެކުރަން އުޅުނު ތެޔޮ ޝިޕްމަންޓް ބަލައިނުގަތުމުން، އިންޑިއަން އޮއިލް ކޯޕަރޭޝަނުން އޭގެ ބަދަލުގައި ގެންނަން ބުނި ތެޔޮ ޝިޕްމަންޓް ނުގެނެވޭނެ ކަމަށް އެކުންފުނިން ބުނެފިއެވެ.

އަވަށްޓެރި ސްރީލަންކާއަށް ދިމާވެފައިވާ ތެޔޮ ނިލުބުމުގެ މައްސަލަ އިންތިހާއަށް ބޮޑުވެފައިވާއިރު، ލަންކާއަށް ތެޔޮ އެތެރެކުރާ އެއް ކުންފުނިކަމަށްވާ އިންޑިއަން އޮއިލް ކޯޕަރޭޝަނުން މިދިޔަ މަހު ގެނައި ތެޔޮ ޝިޕްމަންޓެއްގެ ކޮލިޓީ ދަށްވުމާއި ގުޅިގެން އެޝިޕްމަންޓް ބަލައިގަނެވެން ނެތްކަމަށް ސިލޯން ޕެޓްރޯލިއަމް ކޯޕަރޭޝަނުން ވަނީ ބުނެފައެވެ. އަދި މިދިޔަ މަހުގެ 31ގެ ކުރިން އެޝިޕްމަންޓް އައު ކުރާނެ ކަމަށް އެކުންފުނިން ބުނި ނަމަވެސް، މިހާރު އެނގިފައިވާ ގޮތުގައި އެޝިޕްމަންޓް ބަދަލުކުރެވެން ނެތްކަމަށް ވަނީ އަންގާފައެވެ. އަދި މިހާރު 30،000 މެޓްރިލް ޓަނުގެ އެޝިޕްމަންޓް ލަންކާގެ އުތުރުން ޓްރިންކޮމަލީގައި ބަނދަރުކޮށްފައިވާ ކަމަށް ލަންކާގެ ނޫސްތައް ބުނެއެވެ.

ތެލުގެ ތާށިކަން ބޮޑުވެ، ތެޔޮ ބޭނުންކުރުމުގަޔާއި، ޚާއްސަކޮށް ވެހިކަލްތައް ދުއްވުމުގައި ތެލުގެ ޚަރަދު ކުޑަވާނެހެން އަމަލުކުރުމަށް ލަންކާ ސަރުކާރުން ވަނީ ރައްޔިތުންނަށް އަންގާފައެވެ. ލަންކާއަށް ދެން އެންމެ އަވަހަށް އަންނަ ތެޔޮ ޝިޕްމަންޓެއް އަންނާނީ އަންނަ ބުދަ ދުވަހުއެވެ. ބުދަ ދުވަހު އަންނަ ޝިޕްމަންޓްގެ ތެޔޮ، ޕެޓްރޯލް ޝެޑްތަކަށް ފޯރާވަރު ވާނީ ބުރާސްފަތި ދުވަހުގެ ރޭގަނޑެއްހާ އިރުއެވެ.

ލަންކާގެ ޕެޓްރޯލިއަމް އިންޑަސްޓްރީގައި މަސައްކަތް ކުރާ ފަރާތްތަކުގެ ޔޫނިއަންއިން ބުނީ އައިއޯސީއިން މަސައްކަތް ކުރަނީ ބަލައިނުގަތް ތެޔޮ ޝިޕްމަންޓް ކޮންމެވެސް ގޮތަކުން ލަންކާގެ ބާޒާރަށް ނެރުމަށެވެ. އަދި އައިއޯސީގެ މެނޭޖްމަންޓްގެ ބޭފުޅުން ލަންކާގެ ޕެޓްރޯލިއަމް ރިސޯސަސް މިނިސްޓަރާއި ބައްދަލުކުރައްވާފައިވާކަމަށް ވެސް ބައެއް ރިޕޯޓްތައް ބުނެއެވެ.

ލަންކާގައި މިހާރު ރައްކާކުރަނީ 2 ހަފްތާގެ ތެޔޮ ސްޓޮކެވެ. އެހެންކަމުން ކުރިއަށް އޮތްތަނުގައި ތެޔޮ ރައްކާކުރުމުގެ ޤާބިލްކަން އިތުރުކޮށް، މަދުވެގެން އެއް މަސްދުވަހުގެ ސްޓޮކް ރައްކާކުރެވޭނެ އިންތިޒާމް ހަމަޖައްސަން ޖެހޭކަމަށް ތަޖުރިބާކާރުން ބުނެއެވެ.