ސައުދީއާއި ޔޫއޭއީގެ ބޯޓުތަކަށް ވައިގެ ތެރޭ އޮވެ ތެޔޮ އަޅައިދިނުން އެމެރިކާ ހުޢްޓާލައިފި

ސައުދީ އަރަބިއާއާއި ޔުނައިޓެޑް އަރަބް އެމިރޭޓްސް އިސްވެ އުފައްދާފައިވާ ކޯލިޝަނުގެ ހަނގުރާމަމަތީ ބޯޓުތަކަށް ވައިގެތެރޭގައި އުދުހެމުން ތެޔޮއަޅައިދިނުން ހުއްޓާލުމަށް އެމެރިކާގެ ކިބައިން އެދިފައިވާނެކަމަށް ސައުދީ އަރަބިއާއިން ބުނެފިއެވެ.

ސައުދީގެ ރަސްމީ ނޫސް އޭޖެންސީ، ސައުދީ ޕްރެސް އޭޖެންސީ(އެސްޕީއޭ)އިން ހޮނިހިރު ދުވަހު ނެރުނު ބަޔާނެއްގައި ބުނީ އެގޮތަށް އެ ފިޔަވަޅު އަޅަން ނިންމީ އެމެރިކާއާއެކު މަޝްވަރާ ކުރުމަށްފަހު ކަމަށެވެ.

ދާދިފަހުން ސައުދީން އަދި ކޯލިޝަނުން ވާނީ ޔަމަނާ ދެކޮޅަށް ކުރަމުންދާ ހަނގުރާމައިގައި ބޭނުންކުރަމުންދާ ބޯޓުތަކަށް ތެޔޮއެޅުމުގެ ގާބިލްކަން އިތުރުކޮށްފައިކަމަށް ބަޔާނުގައި ބުނެފައިވެއެވެ.

އެމެރިކާގެ ޑިފެންސް ސެކްރެޓަރީ ޖިމް މެޓިސްވަނީ އެމެރިކާއިން ސައުދީގެ ނިންމުމަށް ތާއީދުކުރާކަން ހާމަކޮށް ޔަމަނުގައި ދޭ ހަމަލާތަކުގައި އާއްމުންނަށް ލިބޭ ގެެއްލުން ކުޑަކުރުމަށާއި އިންސާނީ އެހީތެރިކަން ފޯރުކޮށްދިނުމުގައި އެމެރިކާއިން އަދާކުރަމުންދާ ދައުރު ކުރިޔަށް ގެންދާނެކަން ހާމަކޮށްފައެވެ.

ސައުދީ ކޯލިޝަނުން 2015 ވަނަ އަހަރުގެ މާޗް މަހު ހަނގުރާމައިގެ ތެރެއަށް ވަން ފަހުން މިހާތަނަށް މަދުވެގެން 10،000 މީހުންވަނީ މަރުވެފައިވާކަމަށް އދގެ ހިސާބުތަކުން ދައްކައެވެ.

މަރުވި މީހުންގެ އަދަދު އަޕްޑޭޓް ނުކުރެވޭތާވެސް އަހަރުވެގެން ގޮސްފައިވާއިރު އެ އަދަދު އެއަށްވުރެ މާ މަތިވުން ގާތެވެ.

މިނިވަން އޮބަޒާވަރެއްކަމަށްވާ އާމްޑް ކޮންފްލިކްޓް ލޮކޭޝަން އެންޑް އިވެންޓް ޑޭޓާ ޕްރޮޖެކްޓުން ދާދިފަހުން ބުނެފައިވަނީ ހަނގުރާމައިގައި ޔަމަނުގެ 56،000އެއްހާ މީހުން މަރާލެވިފައިވާކަމަށެވެ.