ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އައްޑޫ ސިޓީއަށް ދެ ގޮނޑި އިތުރު ކުރުމަށް އައްޑޫ ސިޓީ ކައުންސިލުން އިލެކްޝަންސް ކޮމިޝަނުގައި އެދިފައިވާ ކަމަށް އެ ކޮމިޝަންގެ މެމްބަރު އަހުމަދު އަކްރަމު ވިދާޅުވެއްޖެއެވެ.
އަކްރަމް ވިދާޅުވީ އައްޑޫސިޓީގެ ހިތަދޫގެ އާބާދީއަށް އައިސްފައިވާ ބަދަލުތަކާއި ގުޅޭ ގޮތުން ކައުންސިލާއިއެކު ކުރެވުނު މަޝްވަރާތަކުގައި، ކައުންސިލުން ހުށަހަޅުއްވާފައިވަނީ އައްޑޫސިޓީއަށް ދެ ގޮނޑި އިތުރުކޮށްދެއްވުމަށް ކަމަށެވެ.
އެގޮތުން އައްޑޫސިޓީގެ މަރަދޫއާއި ފޭދޫއިން ބައެއް ހިމަނައިގެން އެއްގޮނޑި ހެދުމަށާއި މީދޫއާއި ހުޅުދޫ ތެރެއިން ބައެއް ހިމަނައިގެން ގޮނޑިއެއް އިތުރު ކޮށްދިނުމަށް ކައުންސިލުން އެދިފައިވާ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ ގާނޫނީ ބޭފުޅުންނާއި، އަދި ކޮމިޝަންގެ މެމްބަރުންގެ މެދުގައި ކައުންސިލްގެ ހުށަހެޅުމަށް މަޝްވަރާކުރެއްވުމަށްފަހު ކުރިއަށް އޮތް 2 ހަފްތާ ތެރޭގައި ގޮތެއް ނިންމަވާނެ ކަމަށެވެ.
"އަޅުގަނޑުމެން ގޮނޑި އިތުރުކުރަން ބޭނުން ވެގެން އުޅެނީއެއް ނޫން. އަޅުގަނޑުމެން ބައްދަލު ކުރީ ހިތަދޫގެ އާބާދީއަށް ބަދަލު އައިސްފައިވާތީ ދާއިރާތަކުގެ އިންތަކާ ބެހޭ ގޮތުން މަޝްވަރާ ކުރެވުނީ. އެ ބައްދަލުވުމުގައި ކައުންސިލުން އެބަ އޮތް ހުށަހަޅާފައި ދެ ގޮނޑި އިތުރުކުރަން.އެހެން ކަމުން އަޅުގަނޑުމެން ކޮމިޝަނުން އެކަމާ މެދު ކުރިއަށް އޮތް ދެ ހަފްތާތެރޭގައި ގޮތެއް ނިންމާނަން،" އަކްރަމް ވިދާޅުވިއެވެ.
އަކްރަމް ވިދާޅުވީ ގާނޫނީ ބޭފުޅުންނާއި، އަދި ކޮމިޝަންގެ މެމްބަރުންގެ މެދުގައި ކައުންސިލްގެ ހުށަހެޅުމަށް މަޝްވަރާކުރެއްވުމަށްފަހު ކުރިއަށް އޮތް 2 ހަފްތާ ތެރޭގައި ގޮތެއް ނިންމަވާނެ ކަމަށެވެ.
އައްޑޫސިޓީއަށް ކުރިއަށް އޮތް ރައްޔިތުންގެ މަޖިލީހުގައި ދެ ގޮނޑި އިތުރުވެއްޖެނަމަ މަޖިލީހުގައި އައްޑޫސިޓީއަށް ނުވަ ގޮނޑި ލިބިގެންދާނެއެވެ. ރައްޔިތުންގެ މަޖިލީހުގައި މިހާރުވެސް އައްޑޫސިޓީ ތަމްސީލްވެގެންދަނީ ހަތްދާއިރާގެ ގޮތުގައެވެ.
އަންނަ އަހަރުގެ މާރޗްމަހުގެ ފަހުކޮޅު ރައްޔިތުންގެ މަޖިލީހުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ.
