ވެރިކަންކުރާ ޕްރޮގެރްސިވް ޕާޓީ އޮފް މޯލްޑިވްސް (ޕީޕީއެމް) އިން ޤައުމީ އެއަރލައިން މޯލްޑިވިއަން ހިންގާ އައިލެންޑް އޭވިއޭޝަނަށް އެތައް މިލިއަން ރުފިޔާއެއް ނުދައްކާ އޮތްކަން ފަޅާއަރާފައިވަނިކޮށް، އެޕާޓީގެ ނައިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަޙީމް އަބްދުﷲގެ ދަރިފުޅު އިބްރާހިމް ފައިސަލް ވެސް މޯލްޑިވިއަންއަށް ފައިސާ ނުދައްކާ އޮތްކަމުގެ އަޑުތައް ފެތުރިއްޖެއެވެ.

އެގޮތުން މޯލްޑިވިއަންގެ ސަބްސިޑަރީ ކުންފުންޏެއް ކަމަށްވާ މޯލްޑިވިއަން ހޮލިޑޭސްއިން ބޭރުގެ ޤައުމުތަކަކަށް ފައިސަލް އާއި އޭނާގެ އަނބިކަނބަލުން ދަތުރު ކުރެއްވުމަށް ޓިކެޓް ބައްލަވައިގެންފައިވަނީ ފަހުން ފައިސާ ދައްކާ ގޮތަށް ކަމަށާއި، މިިދިޔަ އަހަރުގެ ފެބްރުއަރީ މަހުގެ 20 ވަނަ ދުވަހު ދޫކުރި އެޓިކެޓްތަކަށް އަދިވެސް ފައިސާ ދައްކާފައި ނުވާ ކަމަށް މައުލޫމާތު ލިބިފައިވެއެވެ. 

ޓިކެޓްތައް ދޫކޮށްފައިވަނީ ލަންކާގެ ވެރިރަށް ކޮޅުނބަށާއި، ޔޫއޭއީގެ ވެރިރަށް އަބޫދާބީއާއި ޖަރުމަންވިލާތުގެ ފްރެންކްފަރޓް އަދި މެލޭޝިއާގެ ވެރިރަށް ކުއާލަލަމްޕޫރަށް ދަތުރުކުރުމަށް ކަމަށް މައުލޫމާތު ލިބިފައިވެއެވެ. އިތުބާރުހުރި ފަރާތަކުން މައުލޫމާތު ލިބިފައިވާ ގޮތުގައި މި ޓިކެޓްތަކުގެ ޖުމްލަ އަގު އެއްލައްކަ ބާރަ ހާހަށް ވުރެ މައްޗަށް އަރައެވެ. 15 ދުވަސްތެރޭ ފައިސާ ދައްކާ ގޮތަށް ދޫކޮށްފައިވާ މިޓިކެޓްތަކަށް ފައިސާ ނުދެއްކުމުގެ ސަބަބުން ޖޫރިމަނާގެ ގޮތުގައި 45 ހާހެއްހާ ރުފިޔާ އަރާފައިވާކަމަށް ވެސް ވެއެވެ. ފައިސަލްއަށް ޓިކެޓް ދޫކުރުމުގައި ޓޫރިޒަމް މިނިސްޓްރީއިން ދައުރެއް ކުޅެފައިވާކަމަށް ވެސް މައުލޫމާތު ލިބިފައިވެއެވެ.

ފައިސަލް ހުންނެވީ ފޮރިން މިނިސްޓްރީގެ އެޑިޝަނަލް ސެކްރެޓެރީގެ މަޤާމުގައެވެ. އެއީ ވަޒީރުންގެ ނައިބު ފެންވަރުގެ މަޤާމެކެވެ.