ގުޅިފައިވާ ޕާޓީތަކުގެ މެމްބަރުން ޖަލްސާގައި ބައިވެރިނުވުމުން ގިނަ ފާޑުކިޔުންތަކެއް!

އަންގާރަދުވަހުގެ ރައްޔިތުންގެ މަޖިލީހުގެ ޖަލްސާގައި ގުޅިފައިވާ ޕާޓީތަކުގެ މެމްބަރުން ބައިވެރިވެފައި ނުވާތީ، ޕީޕީއެމްއަށް ނިސްބަތްވާ، ރައީސް ޔާމީންގެ އަރިސް ބައެއް މެމްބަރުން ހިތްހަމަނުޖެހުން ފާޅުކުރައްވައިފިއެވެ.

ގިނަ ދުވަސްތަކުގެ މެދުކެނޑުމަކަށް ފަހު ރައްޔިތުންގެ މަޖިލީހުގެ ދެ ޖަލްސާއެއް އާދީއްތަ ދުވަހު ބާއްވާފައިވާއިރު، އެ ޖަލްސާގައި މަޖިލީހުގެ ގިނަ މެމްބަރުންތަކެއް ވަނީ ބައިވެރިވެފައެވެ.

ނަމަވެސް އަންގާރަދުވަހު މަޖިލިސް ޖަލްސާގައި ބައިވެރިވެފައިވަނީ ރައްޔިތުންގެ މަޖިލީހުގެ 85 މެމްބަރުންގެ ތެރެއިން 25 މެމްބަރުންނެވެ. އިދިކޮޅު މެންބަރުން ބައިވެރިއެއް ނުވެއެވެ. އަންގާރަދުވަހުގެ ޖަލްސާގައި ބައިވެރިވެފައި ވަނީ ޕީޕީއެމްގެ ބައެއް މެމްބަރުންނާއި، އެމްޑީއޭ އަދި މިނިވަން މެމްބަރުންނެވެ.

އަންގާރަދުވަހުގެ މަޖިލިސް ޖަލްސާއަށް އެޖެންޑާކޮށްފައި ވަނީ އޮޑިޓަރ ޖެނެރަލްގެ އޮފީހުގެ 2019 ވަނަ އަހަރުގެ ބަޖެޓް، މާލިއްޔަތު ކޮމިޓީން ދިރާސާ ކުރައްވައި ނިންމެވި ގޮތުގެ ރިޕޯޓް ހުށަހެޅުއްވުމާއި، ރައްޔިތުންގެ މަޖިލީހުގެ ގަވާއިދުގެ 71 ވަނަ މާއްދާގެ (ށ) އިޞްލާހު ކުރެއްވުމަށް ހުށަހަޅުއްވާފައިވާ އިޞްލާހު، އާންމު ކޮމިޓީން ދިރާސާ ކުރައްވައި ނިންމެވިގޮތުގެ ރިޕޯޓްއެވެ.

ރައީސް އަބްދުﷲ ޔާމީން އަބްދުލް ޤައްޔޫމްގެ ސަރުކާރުގެ ކޮރަޕްޝަނާއި، ވައްކަމުގެ ވާހަކަތަށް ދައްކަވަމުން ގެންދެވި މެމްބަރުން އެ ފަދަ މައްސަލަތަށް ބަލަން އޮންނަ އޮޑިޓަރ ޖެނެރަލް އޮފީހުގެ އަންނަ އަހަރަށް ލަފާކުރާ ބަޖެޓް ބަހުސްގައި ބައިވެރިވެފައިނުވާތީވެ، ސަރުކާރު މެމްބަރުންވަނީ ގުޅިފައިވާ ޕާޓީތަކުގެ މެމްބަރުންނަށް ޖަލްސާގައި ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ.

ވިލިމާލެ ދާއިރާގެ މެމްބަރު އަހްމަދު ނިހާން ހުސެއިން މަނިކު ވިދާޅުވީ މަޖިލީހުގައި ހިމެނިވަޑައިގަންނަވާ 85 މެމްބަރުންގެ ތެރެއިން މިފަދަ ކަންތައްތަކަށް އިސްކަންދެއްވާތަން ފެންނަނީ ސަރުކާރަށް ނިސްބަތްވެވަޑައިގަންނަވާ ޕީޕީއެމްގެ މެމްބަރުން ކަމަށެވެ. ގޮނޑިތައް ލިބިވަޑައިނުގެން ރެއާއި ދުވާލު މަގުމަތީގައި ހޭދަކުރެއްވި މެމްބަރުން ކޮބައިތޯ ނިހާން ވަނީ ސުވާލުއުފައްދަވާފައެވެ. ނިހާނުގެ އެ ވާހަކަފުޅު އަމާޒުކުރެއްވީ އިލެކްޝަނުން ގޮނޑި ގެއްލުނު ކަމަށް ބުނި މެންބަރުންގެ ތެރެއިން ގޮނޑި ނުގެއްލޭ ކަމަށް ސުޕްރީމް ކޯޓުން މިހާރު ކަނޑައަޅާފައިވާ މެންބަރުންނަށެވެ. އޭގެ ތެރެއިން ހަތަރު މެންބަރަކު އާދީއްތަ ދުވަހުގެ ޖަލްސާގައި ބައިވެރިވެ ވަޑައިގެންނެވި ނަމަވެސް މިއަދުގެ ޖަލްސާ އަށް ވަޑައެއް ނުގަންނަވައެވެ.

"ކޮބައިތޯ އެމްޑީޕީގެ މެމްބަރުން. އަދި ޚާއްސަކޮށް ކޮބައިތޯ މި ގޮނޑިތަށް ނުލިބިގެން ރެއާއި ދުވާލު މަގުމަތީގައި ހޭދަކުރެއްވި އެ ބޭފުޅުން ވެސް ގޮނޑި ލިބިވަޑައިގަތީމައި ޗެމްބަރަށް ވަޑައިގަންނަވާކަށް ބޭނުންފުޅެއް ނުވޭ،" ނިހާން ވިދާޅުވިއެވެ.

ރައްޔިތުންގެ އަޑު މަޖިލީހުގައި ނީއްވޭތީވެ، ދެރަވެގެން އެކަމާއި މުޒާހަރާކުރެއްވި މެމްބަރުން މާލިއްޔަތު ކޮމިޓީއިން ފޮނުއްވި ރިޕޯރޓްގެ ބަހުސް މަރްހަލާގައި ބައިވެރިވެވަޑައިނުގެން ސައިކޮޓަރީގައި ތިއްބެވި ކަމަށް ކެލާ ދާއިރާގެ މެމްބަރު އަލީ އާރިފް ވަނީ ވިދާޅުވެފައެވެ.

" ތުލުސްދޫ ދާއިރާގެ މެމްބަރު ވެސް ދާދި މިދާކަށް ދުވަހާ ޖެހެންދެން ވެސް ހަޅޭލެވި މަޑުއްވަރީ ދާއިރާގެ މެމްބަރު ވެސް ހަޅޭލެވި ތިމަންނަމެންގެ ދާއިރާގެ ރައްޔިތުންގެ ހައްގޭ، އަޑެއް ނީއްވެވެޔޭ، ކެންދޫ ދާއިރާގެ މެމްބަރު ވެސް ހަމަ އެފަދަ،" އަލީ އާރިފް ވިދާޅުވިއެވެ.

އަލީ އާރިފް ވިދާޅުވީ ޖަލްސާގެ ކޯރަމް ހަމަކުރީ ވެސް އެބޭފުޅުން އެކި ގޮތްގޮތަށް މަސައްކަތްކުރައްވައި މެމްބަރުން ގެންނަވައިގެން ކަމަށެވެ.

ފޭދު ދާއިރާގެ މެންބަރު އިބްރާހީމް ދީދީ (އައިބީ) ވެސް ވިދާޅުވީ މި ސަރުކާރަށް ކޮރަޕްޝަންގެ ބޮޑެތި ތުހުމަތުތަކެއް އިދިކޮޅު މެންބަރުން ކުރާއިރު އެކަން ބަލައި ތަހްގީގުކުރުމަށް އޮތް އެންމެ މުހިންމު އިދާރާ ކަމަށްވާ އޮޑިޓާރ ޖެނެރަލް އޮފީހުން ބަޖެޓް 60 މިލިއަން ރުފިޔާ އަށް އެދުމުން 52 މިލިއަނަށް ކުޑަކުރުމަށް ވާހަކަ ދެއްކެވީ ވެސް އިދިކޮޅު މެންބަރުން ކަމަށެވެ. އޭގެ ތެރޭގައި ތަމްރީނުކުރުމަށް ބަޖެޓްގައި ހިމެނުމުން ވަޒީފާ ދެނީ ތަމްރީނާއި ގާބިލް ފަރާތްތަކަށް ކަމަށްވާތީ އެ މުވައްޒަފުންނަށް ކޮންމެހެން ތަމްރީންނު ދޭންނުޖެހޭ ކަމަށް އިދިކޮޅު ފަރާތްތަކުން ކޮމިޓީގައި ވާހަކަ ދެއްކެވި ކަމަށް އައިބީ ވިދާޅުވިއެވެ. އަދި ވިދާޅުވީ ކޮރަޕްޝަންގެ ތުހުމަތުތައް ކުރެވޭ އިރު ސަރުކަރުގެ ކޮންމެ އިދާރާއެއްގެ ވެރިން މަޖިލީހަށް ހާޒިރުކުރަން ތާއިދުކުރައްވާނެ ކަމަށާއި މިއަދު އިދިކޮޅުގައި މެޖޯރިޓީ އޮތް ނަމަވެސް އެކަން ކުރަން ނުކުރެނޭ ކަމަށެވެ. މިދުގެ ޖަލްސާ އަށް ގިނަ މެންބަރުން ވަޑައިނުގެންނެވީތީ ވެސް އޭނާ ވަނީ ފާޑު ވިދާޅުވެފައެވެ.

އިދިކޮޅު މެންބަރުން މަޖިލީހުގެ ޖަލްސާތައް ބޮއިކޮޓްކުރައްވަން ފެއްޓެވީ މިދިޔަ އަހަރުގެ ތެރޭގައި 45 މެންބަރުންގެ ސޮޔާއެކު މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލައެއް ހުށަހެޅުމަށް ފަހުއެވެ. ނަމަވެސް މިހާރު އަނެއްކާ ވެސް މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށަހެޅިފައިވާ އިރު ޖަލްސާތައް ކުރިއަށް ގެންދަވަނީ މަޖިލީހުގެ ނާއިބު ރައީސް މޫސާ މަނިކެވެ. އަދި މަސީހްގެ އިތުބާރު ނެތްކަމުގެ މައްސަލަ ނޮވެމްބަރު 8 ވަނަ ދުވަހަށް ތާވަލްކުރަން ނިންމާފައިވާ އިރު މި އަދުގެ ޖަލްސާ އަށް އިދިކޮޅު މެންބަރުން ވަޑައިމުގެންނެވި ސަބަބެއް ހާމައެއް ނުކުރައްވައެވެ.