ޖަމާލް ޚަޝޯގީގެ މަރާ ގުޅިގެން ތުހުމަތުކުރެވޭ 18 މީހަކު އެކްސްޓްރެޑިޝަންގެ ދަށުން ހޯދުމަށް ތުރުކީގެ ޕްރޮސިކިއުޓަރުން ޕްލޭންކޮށްފިއެވެ.

އަނަދޮލޫ ނޫސް އެޖެންސީން ހުކުރުދުވަހު ބުނެފައި ވަނީ އިސްތަންބޫލްގެ ޗީފް ޕްރޮސިކިއުޓަރ އެކަމަށް އެދި ތުރުކީގެ ޖަސްޓިސް މިނިސްޓްރީއަށް ހުށަހަޅާފައިވާ ކަމަށާއި ފޮރިން މިނިސްޓްރީއިން ރަސްމީކޮށް އެކްސްޓްރެޑިޝަން އަށް އެދޭނެ ކަމަށެވެ.

"އެކްސްޓްރެޑިޝަން އަށް އެދުމުގެ ފަހަތުގައިވަނީ ޚަޝޯގީ މަރާލާފައިވަނީ ތުރުކީގައި ތުރުކީއަށް އެކަމަށްޓަކައި ދަތުރުކުރި ސައުދީގެ ރައްޔިތުންތަކެއް ކަމަށް ވާތީ" ތުރުކީގެ އިސް އޮފިޝަލަކު ވިދާޅުވިއެވެ.

މި މައްސަލަގައި އެންމެ ރަނގަޅަށް އިންސާފު ގާއިމްކޮށްދެވޭނީ ތުރުކީގެ ޝަރުއީ ނިޒާމްގެ ތެރެއިން ކަމަށް އޮފިޝަލް ވިދާޅުވިއެވެ.

"ދެެފުށް ފެނުމުގެ އެންމެ މަތީ ދަރަޖައަށް ދިއުމަށްޓަކައި ތުރުކީގައި ކޯޓުގެ މަރުހަލާ ގެންދެވޭނީ ބައިނަލްއަގްވާމީ އޮބްޒަރވަރުންނަށް ފުރުސަތު ހުޅުވާލެވިގެން،"

ތުރުކީގެ ރައީސް ރަޖަބް ތައްޔިބު އޮރްދޮޣާން ވިދާޅުވީ އިތުރު އެތައް މައުލޫމާތެއް އަންކާރާގައި އެބަހުރި ކަމަށާއި "ރަނގަޅު ވަގުތު ޖެހުމުން ހާމަކުރާނެ،" ކަމަށެވެ.

އޭކޭ ޕާޓީގެ ޕްރޮވިންޝަލް މެމްބަރުންނާ މުޚާތަބުކުރައްވަމުން ވެރިރަށް އަންކާރާގައި އޮރްދޮޣާން ވަނީ ނޫސްވެރިޔާ މަރާލަން އަމުުރުކުރި މީހެއް ހާމަކުރުމަށް ސައުދީ އަރަބިއާއަށް ގޮވާލައްވާފައެވެ.

މީގެ އިތުރުން ހަޝޯގީގެ މަރުގެ މައްސަލަ ތަހުގީގުގައި އިސްކޮށް ހުންްނެވި ތުރުކީގެ ޕްރޮސިކިއުޓަރާ ބައްދަލުކުރެއްވުމަށް ސައުދީގެ ޗީފް ޕްރޮސިކިއުޓަރ އާދީއްތަ ދުވަހު އިސްތަންބޫލަށް ވަޑައިގަންނަވާނެ ކަމަށް އިއުލާނުކުރައްވާފައެވެ.

އޮރްދޮޣާން ވަނީ ސައުދީން ހައްޔަރުކުރި 18 މީހުންގެ ތެރޭގައި ޚަޝޯގީ މަރާލި މީހާ ވުމުގެ ފުރުސަތު ބޮޑު ކަމަށް ވިދާޅުވެފައެވެ.

"މި ކަމަކަށް އިތުރު ތަފްސީލެއް ބޭނުމެއްނުވޭ، ޖަރީމާ ހިންގި މީހާ 18 މީހުންގެ ތެރޭ ހިމެނޭ ދެން އެތާ ނުހިމެނޭކަމަށްވަންޏާ ބުނެދީ ކާކުކަން މިކަމުގައި ބައިވެރި މި ގައުމުގެ މީހަކީ،" އޭނާ ވިދާޅުވިއެވެ.

ޚަޝޯގީ ގެއްލިފައި ވަނީ އޮކްޓޯބަރ މަހުގެ 2 ވަނަ ދުވަހު ސައުދީގެ ކޮންސިއުލޭޓަށް ލިއުމެއް ބަލާ ދިއުމަށް ފަހުއެވެ. އޭގެ ފަހުން ކޮންސިއުލޭޓުން ނުކުމެފައި ނުވާއިރު އޭނާ މަރާލާފައިވާ ކަމަށް ތުރުކީގެ ތަހުގީގު ޓީމުން ތަކުރާރުކޮށް ބުނަމުންދިއައިރު ސައުދީން ވަނީ އޮކްޓޯބަރު މަހުގެ 20 ވަނަ ދުަވަހާ ޖެެހެންދެން ވެސް އެ ތުހުމަތުތައް ދޮގުކޮށްފައެވެ.