ރައީސް ނަޝީދު މިނިވަން ކުރުމަށް މަޖިލީހަށް ގަރާރެއް ހުށަހަޅަނީ
24 އޮކްޓޯބަރު 2018 | ބުދަ 03:31ގަރާރު ހުށަހަޅަނީ މިއަދު
ކުރީގެ ރައީސް މުހައްމަދު ނަޝީދު: އަންނަ މަހު މާލެ ވަޑައިގަންނަވާނެ
ތޭރަ އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް މުހައްމަދު ނަޝީދު މިނިވަން ކުރުމަށް ބުދަ ދުވަހު ރައްޔިތުންގެ މަޖިލީހަށް ގަރާރެއް ހުށަހެޅުމަށް އިދިކޮޅު ކޯލިޝަނުން ނިންމައިފިއެވެ.
މައުލޫމާތު ލިބިފައިވާ ގޮތުގައި ރައީސް ނަޝީދު މިނިވަން ކުރުމަށް މަޖިލީހަށް ގަރާރު ހުށަހަޅުއްވަނީ މަޖިލީހުގެ 45 މެމްބަރުންގެ ސޮޔާއި އެކުގައެވެ. އެ މެމްބަރުންގެ ތެރޭގައި ވެރިކަންކުރާ ޕީޕީއެމްގެ ބައެއް މެމްބަރުންވެސް ހިމެނޭ ކަމަށް މައުލޫމާތު ލިބެއެވެ.
ރައީސް ނަޝީދު މިނިވަން ކުރުމަށް މަޖިލީހަށް ގަރާރެއް ހުށަހެޅުމަށް އިދިކޮޅު ކޯލިޝަނުން ނިންމާފައިވާއިރު އަންނަ ނޮވެމްބަރު މަހުގެ އެއް ވަނަ ދުވަހު ރައީސް ނަޝީދު ރާއްޖެ ވަޑައިގެންނެވުމަށްވަނީ ނިންމަވާފައެވެ. ރައީސް ނަޝީދަށް މަރުހަބާ ދެންނެވުން ކުލަ ގަދަކޮށް ކުރިއަށް ގެންދިއުމަށް އެމްޑީޕީން އަންނަނީ ތައްޔާރު ވަމުންނެވެ.
ރައީސް ނަޝީދު މިނިވަން ކުރުމުގެ ގަރާރު ބުދަ ދުވަހު މަޖިލީހަށް ހުށަހަޅާއިރު ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަވެސް މަޖިލީހަށް ހުށަހަޅަންވަނީ ނިންމާފައެވެ.
މަސީހުގެ އިތުބާރު ނެތްކަމުގެ މައްސަލާގައި 51 މެމްބަރަކު ސޮއި ކުރައްވާފައިވާއިރު އެ މެމްބަރުންގެ ތެރޭގައި ޕީޕީއެމްއަށް ނިސްބަތްވެވަޑައިގަންނަވާ 11 މެމްބަރަކު ހިމެނޭކަމަށްވެސް މައުލޫމާތު ލިބެއެވެ.
ރައީސް ނަޝީދު މިނިވަންކުރުމަށް ހުށަހަޅުއްވާއިރު އަދާލަތު ޕާޓީގެ ރައީސް ޝައިޚް އިމްރާންގެ މައްސަލަ އަލުން މުރާޖައާ ކޮށްދިނުންއެދި ސުޕްރީމް ކޯޓަށް ހުށަހެޅުމަށްވެސް ވަނީ ނިންމާފައެވެ.
