ރައީސް މައުމޫން، އިންތިހާބީ ރައީސް ސޯލިހާ ބައްދަލުކުރައްވައިފި
23 އޮކްޓޯބަރު 2018 | އަންގާރަ 16:52ބައްދަލުވުމުގައި މަޝްވަރާކުރެވުނު ކަންކަމުގެ ތަފްސީލެއް ދެ ބޭފުޅުން ވެސް ހަމާއެއް ނުކުރައްވާ
އިންތިހާބީ ރައީސް ސޯލިހާ އެކު ރައީސް މައުމޫން ބޭއްވި ބައްދަލުކުރެއްވުމުގެ ތެރެއިން
ކުރީގެ ރައީސް މައުމޫން އަބްދުއްޤައްޔޫމް، އިންތިހާބީ ރައީސް އިބްރާހިމް މުހައްމަދު ސޯލިހާ ބައްދަލުކުރައްވައިފިއެވެ.
އިންތިހާބީ ރައީސާ ބައްދަލުކުރެއްވިކަން ހާމަކޮށް، ރައީސް މައުމޫން ކުރެއްވި ޓްވީޓެއްގައި ވިދާޅުވީ ރާއްޖޭގެ މަސްރަހުގައި ހިންގަމުންދާ ކަންކަމާއި ކުރިއަށް ހުރި ކަންތައްތަކާ ގުޅޭ ގޮތުން މަޝްވަރާކުރެއްވި ކަމަށެވެ. އޭގެ އިތުރުން އެއްވެސް ތަފްސީލެއް ހާމައެއް ނުކުރައްވައެވެ.
މިއީ ރައީސް މައުމޫން، ޖަލުން މިނިވަންވެވަޑައިގަތް ފަހުން ބޭއްވި މި ފަދަ ދެ ވަނަ ބައްދަލުވުމެވެ. މީގެ ކުރިން ވެސް ރައީސް މައުމޫނާއި، އިންތިހާބީ ރައީސާ ދެ ބޭފުޅުން ވަނީ ބައްދަލުކުރައްވާފައެވެ.
ރާއްޖޭގެ މަސްރަހުގައި ހިނގަމުންދާ ކަންކަމާ ގުޅޭ ގޮތުން ދެ ބޭފުޅުން މަޝްްވަރާކުރެއްވި އިރު، އިންތިހާބު ބަތިލްކުރަންޖެހޭ ސަބަބެއް ނެތް ކަމަށް ސުޕްރީމް ކޯޓުން ވަނީ ނިންމަވާފައެވެ. ނަމަވެސް ބަލި ގަބޫލުނުކޮށް ޕީޕީއެމުން މައްސަލަތައް ކަމާ ގުޅުން ހުރި މުއައްސަސާއަށް ހުށައަޅަމުން ގެންދާއިރު، ޕީޕީއެމްގެ ރައީސަކީ ރައީސް މައުމޫން ކަމަށް ކަނޑައަޅައިދިނުމަށް އެމަނިކުފާނުގެ ފަރާތްޕުޅުން އިލެކްޝަންސް ކޮމިޝަނަށް ވަނީ ހުށައަޅުއްވާފައެވެ.
