ރައީސް ޔާމީންއާއެކު މަސައްކަތް ކުރެވުނީތީ ފަހުރުވެރިވަން، ގައުމު ދޫކޮށް ފިލަން ޖެހޭ ސަބަބެއް ނެތް: ޝައިނީ
17 އޮކްޓޯބަރު 2018 | ބުދަ 17:59މިވަގުތު ޝައިނީ ހުންނެވީ ސްރީލަންކާގައި
މިނިސްޓަރު ޑރ. މުހައްމަދު ޝައިނީ
ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި މަސައްކަތް ކުރެވުނީތީ ފަހުރުވެވަޑައިގަންނަވާ ކަމަށާއި ގައުމު ދޫކޮށް ފިލަން ޖެހޭ ސަބަބެއް ނެތް ކަމަށް ފިޝަރީޒް އެންޑް އެގްރިކަލްޗަރ މިނިސްޓަރު ޑރ. މުހައްމަދު ޝައިނީ ވިދާޅުވެއްޖެ އެވެ.
މިނިސްޓަރު ޝައިނީ ރާއްޖެ ދޫކުރައްވާ ފިއްލެވި ކަމަށް ބުނެ ސޯސަލް މީޑިއާގައި ވާހަކަތައް ފެތުރިފައިވަނިކޮށް، ޝައިނީ ބުދަ ދުވަހު ކުރެއްވި ޓްވީޓެއްގައި ވިދާޅުވީ ރައީސް ޔާމީންގެ ޓީމާއެކު މަސައްކަތް ކުރެވުނީތީ ފަހުރުވެރިވެވަޑައިގަންނަވާ ކަމަށާއި، އެ ޓީމުގައި ހާސިލު ކުރެވުނު ކަންތައްތަކާއި، ރައްޔިތުންނަށް ކޮށްދެވުނު ހިދުމަތާ މެދު އުފާ ކުރައްވާ ކަމަށެވެ. ގައުމު ދޫކޮށް ފިލަން ޖެހޭ އެއްވެސް ސަބަބެއް ނެތް ކަމަށާއި، ގައުމަށް ހިދުމަތް ކުރަން ލިބޭ ކޮންމެ ފުރުސަތެއްގެ ބޭނުން ހިއްޕަވާނެ ކަމަށް ވެސް ޝައިނީ ވިދާޅުވެފައި ވެއެވެ.
މިނިސްޓަރ ޝައިނީ ރާއްޖެ ދޫކޮށް ފިއްލެވީ ކަމަށް ސޯސަލް މީޑިއާގައި ވާހަކަ ދެކެވިފައިވަނީ އަންގާރަ ދުވަހު އޭނާ އާއިލާއާއެކު އަވައްޓެރި ސްރީލަންކާއަށް ވަޑައިގެންނެވުމުން ނެވެ.
މިނިސްޓަރ ޝައިނީ ފުރީ އަންގާރަ ދުވަހުގެ ހަވީރު 16:20ގައި، EK652 ފްލައިޓުންނެވެ. ޝައިނީއާ އެކު ވަޑައިގެންނެވީ އޭނާގެ އަނބިކަނބަލުންނާއި ދެ ކުދިންނެވެ.
މިނިސްޓަރު ޝައިނީ ރާއްޖެ އިން ބޭރަށް ފުރާވަޑައިގަންނަވާފައިވާއިރު، ސަރުކާރުގެ އިސްވެރިން ފައިސާ ރައްކާކުރުމުގެ ގޮތުން ރާއްޖޭގައި ހުރި ފައިސާތައް ރާއްޖެއިން ބޭރަށް ގެންދަމުންދާކަމުގެ އަޑުތައް ވަނީ ފެތުރިފައެވެ. އަދި ވަރަށް އަވަހަށް ސަރުކާރުގެ އިސް ފަރާތްތައް ރާއްޖެ ދޫކޮށް ވަޑައިގަންނަވާނެ ކަމުގެ އަޑުތަކެއް ދަނީ ސޯޝަލް މީޑިއާގައި ފެތުރެމުންނެވެ. އަދި އެކަން ތަހުގީގު ކޮށްދިނުމަށް ކެންދޫ ދާއިރާގެ މެންބަރު އަލީ ހުސައިން ފޮލިހަށް ވެސް ހުށަހަޅުއްވާފައި ވެއެވެ.
އިންތިހާބީ ރައީސް އިބްރާހީމް މުހައްމަދު ސޯލިހު އާ ވެރިކަން ހަވާލު ކުރުމުގެ ކަންކަން ކުރިއަށްދާއިރު، ސަރުކާރުގެ އިދާރާތަކުގެ ތެރެއިން ޑައިރެކްޓަރ ޖެނެރަލް އޮފް ޓްރާންސިޝަންގެ އޮފީހަށް އެއްބާރުލުން ދެއްވުމަށް ފިޝަރީޒް އެންޑް އެގްރިކަލްޗަރ މިނިސްޓަރު ޝައިނީ މީގެ ކުރިން ދެކޮޅު ހައްދަވާފައިވެއެވެ. ނަމަވެސް ފަހުން ވަނީ އެއްބާރުލުން ދެއްވާނެ ކަމަށް ވިދާޅުވެފައެވެ.
