އަވަސް އިންތިޚާބެއް ބޭއްވުމަށް އަރްމޭނިއާގެ ބޮޑުވަޒީރު އިސްތިއުފާދެއްވައިފި

ގާނޫނުހަދާ މަޖިލީސް އުވާލައްވައި އަވަސް އިންތިޚާބަކަށް މަގުފަހި ކުރެއްވުމަށް އަރްމޭނިއާގެ ބޮޑުވަޒީރު އަންގާރަ ދުވަހު މަގާމުން އިސްތިއުފާދެއްވައިފިއެވެ.

ބޮޑުވަޒީރު އިސްތިއުފާ އިއުލާނުކުރައްވާފައިވަނީ ލައިވް ޓީވީގައެވެ.

"އަޅުގަނޑުގެ އެކުވެރި ފަޚުރުވެރި ރައްޔިތުން، މިއަދު އަޅުގަނޑު މަގާމުން އިސްތިއުފާ ހުށަހަަޅައިފިން" ނިކޯލް ޕަޝިނިއަން ވިދާޅުވިކަމަށް އޭއެފްޕީގައި ބުނެފައިވެއެވެ.

މީގެ އިތުރުން އޭނާވަނީ އަވަސް އިންތިޚާބެއް ބާއްވާ މިނިވަންކަމާއެކު ރައްޔިތުން ގޮތް ނިންމެވުމަށް ފުރުސަތު ދެއްވާނެ ކަމަށް ވައުދުވެ ވަޑައިގެންފައެެވެ.

ނިކޯލް ޕަޝިނިއަން ބޮޑުވަޒީރުކަމަށް ވަޑައިގެންނެވީ މަގުތަކުގައި ރައްޔިތުން ކުރިޔަށް ގެންދިޔަ ބޮޑެތި މުޒާހަރާތަކަކަށް ފަހު އަރުމޭނިއާގެ ބޮޑުވަޒީރު ސުއަރޒް ސަރްގެޒިއަން އޭޕްރީލް މަހު މަގާމުން އިސްތިއުފާ ދެއްވުމުން މެއި މަހުއެވެ.

މަޖިލީހުގެ އަޣުލަބިއްޔަތު އޮތް ވާދަވެރި ސިޔާސީ ފަރާތްތަކުގެ އެ މަގާމުތަކުން ދުރުކުރުމަށްޓަކައި މިދިޔަ މަސްތަކުގައި ޕަޝިނިއަން ގެންދެވީ އަވަސް އިންތިޚާބަކަށް ބާރުއަޅުއްވަމުންނެވެ.

އާ ބޮޑުވަޒީރަކު ކަނޑައެޅުމަށް ގާނޫނުހަދާ މަޖިލީހުގެ މެމްބަރުންގެ މެދުގައި އެއްބަސްވުމަކަށް ނާދެވިއްޖެނަމަ އަވަސް އިންތިޚާބެއް ބާއްވަން ޖެހޭނެއެވެ.

މި މަހުގެ ކުރީކޮޅު ޕަޝިނިއަންވަނީ އޭނާއަށް ތާއިދުކުރާ އެތައް ހާސް ބަޔަކުނެރެ އަވަސް އިންތިޚާބަކަށް އިދިކޮޅު ފަރާތްތައް އެއްބަސްކުރުވުމަށް ބާރުއެޅުމަށް ގާނޫނުހަދާ މަޖިލީސް ހިސާރުކޮށް މުޒާހަރާކޮށްފައެވެ.

އޮކްޓޯބަރ މަހުގެ 10 ވަނަ ދުވަހު ފްރާންސް 24 ގައި ޕަޝިނިއަން ވިދާޅުވެފައިވަނީ އަވަސް އިންތިޚާބު، ޑިސެމްބަރ 9 ނޫނީ 10 ގައި ބޭއްވޭނެކަމަށެވެ. އަދި އެއީ އެކަމަށް ކަނޑައެޅިފައިވާ މުއްދަތު ކަމަށްވާއިރު އޮކްޓޯބަރ މަހުގެ 16ވަނަ ދުވަހު އިސްތިފާ ދެއްވަން ޖެހިވަޑައިގަންނަވާނެކަމަށެވެ.

ބޮޑުވަޒީރުކަމަށް މެއިމަހުގެ ތެރޭގައި ޕަޝިނިއަން ވަޑައިގެން ފަހުން ގާނޫނުހަދާ މަޖިލީހުގެ އިންތިޚާބެއް ބާއްވާފައި ނުވާއިރު އޭނާވިދާޅުވެފައިވަނީ މަޖިލީހުގެ ގޮނޑިތައް މިހާރު ތަމްސީލް ކުރައްވާ ފަރާތްތަކަށްބަލާއިރު ގައުމުގެ ސިޔާސީ ހަގީގަތް ދައްކުވައިނުދޭކަމަށެވެ.