އެއްވެސް ފަރާތަކަށް ރިޝްވަތު ދީފައެއް ނުވާނެ: ޕީޕީއެމް

ވޯޓުކަރުދާހާ ގުޅޭ ގޮތުން ހަގީގަތާ ޚިލާފު ބަޔާން ދިނުމަށް, ޕީޕީއެމުން، އެމް ސެވަންގެ މުވައްޒިފުންނަށް ރިޝްވަތު ހުށައަޅާފައިނުވާނެކަމަށް އެ ޕާޓީން ބުނެފިއެވެ.

ވަކި ގޮތަކަށް ބަޔާން ދިނުމަށް އެދި އެމް ސެވަންގެ މުވައްޒިފުންނަށް ރިޝްވަތު ހުށައެޅި މައްސަލައެއް ފުލުހުންގެ އިދާރާއަށް ހުށައަޅާފައިވާއިރު، ޕީޕީއެމުން އާންމުކުރި ބަޔާނެއްގައި ބުނީ، ޕީޕީއެމުން އެއްވެސް ފަރާތަކަށް ރިޝްވަތު ދީފައި ނުވާނެ ކަމަށާއި، އަދި އެއްވެސް ފަރާތަކަށް ބިރު ދައްކާފައިވެސް ނުވާނެ ކަމަށެވެ. އަދި މި ދަނޑިވަޅުގައި ރިޝްވަތުގެ ވާހަކަ ދައްކަނީ، އިންތިޚާބު ބާތިލްކުރުމަށް ކޯޓަށް ހުށަހަޅާފައިވާ މައްސަލައަށް ރައްޔިތުންގެ ސަމާލުކަން ގެއްލުވާލަން ކަމަށް ޕީޕީއެމުން ބުންޏެވެ.

ޕީޕީއެމުން ބުނީ، އިންތިހާބުގެ ވޯޓު ކަރުދާސްތައް ޗާޕްކުރި އެމް ސެވަންގެ އެއް ހިއްސާދާރަކީ ޖުމްހޫރީ ޕާޓީގެ ކައުންސިލް މެމްބަރެއް ކަމަށާއި އަދި މެޖޯރިޓީ ހިއްސާ އޮންނަ އެކްސިސް މޯލްޑިވްސް އަކީ ޖުމްހޫރީ ޕާޓީގެ ފައުންޑަރު އަދި އިދިކޮޅު ކޯލިޝަންގެ އެއް ލީޑަރު ގާސިމް އިބްރާހިމްގެ ދަރިކަނބަލުން ހަދީޖާ ސަނާ އާއި ދަރިކަލުން އިބްރާހިމް ސިޔާދު ގާސިމް ހިއްސާ އޮންނަ ކުންފުންޏެއް ކަމަށެވެ. އެހެންވެ އެއީ ނޮވެލްޓީ ޕްރިންޓާސް އެންޑް ޕަބްލިޝާސް އިން ކާމިޔާބު ކުރި ބިޑް ބާތިލްކޮށް، އަލުން ބިޑް ކުރުމަކާ ނުލައި ފަސް ގުނަ ބޮޑު އަގެއްގައި ދީފައި އޮތް މައްސަލަ އޮއްބާލަން އެމް ސެވަން އިން ކުރި ކަމެއް ކަމަށް ވެސް ޕީޕީއެމުން ބުންޏެވެ.

ޕީޕީއެމްގެ ބަޔާނުގައި ސިފަކޮށްފައިވާ ގޮތުގައި އެމް ސެވަންއިން ފުލުހުންގެ އިދާރާއަށް މައްސަލަ ހުށައަޅާފައިވަނީ ޕީޕީއެމްގެ އަގު ވައްޓާލުމުގެ ގޮތުން ކަމަށެވެ. އަދި ފުލުހުންގެ އިދާރާއަށް އެމް ސެވަން އިން ހުށައަޅާފައިވާ މައްސަލަ ސާބިތު ނުވެއްޖެނަމަ އަބުރުގެ ދައުވާކުރާނެކަމުގެ އިންޒާރުވެސް ޕީޕީއެމްގެ ބަޔާނުގައި ވަނީ ދީފައެވެ.

އެމް ސެވަންގެ މެނޭޖިންގ ޑިރެކްޓަރ މުހައްމަދު އަބްދުއްސައްތާރު ވިދާޅުވީ، އެތަނުގެ މުވައްޒަފުންތަކަކަށް ރިޝްވަތު ދިނުމަށް މަސައްކަތްކުރި ކަމަށާއި އެކަން ހިނގާފައި ވަނީ މިދިޔަ ހަފްތާގައި ކަމަށެވެ. ބައެއް މުވައްޒަފުންނަށް ބޮޑެތި އަދަދުތަކުން ފައިސާ ހުށަހަޅައި، ހަގީގަތާ ޚިލާފަށް ހެކިބަސް ދިނުމަށް އެދިފައިވާ ކަމަށް އޭނާ ވިދާޅުވިއެވެ.

ސައްތާރު ވިދާޅުވީ، މައްސަލަ ހުށަހަޅާފައިވާ ކަމަށާއި ބައެއް މުވައްޒަފުން އެ މައުލޫމާތުތައް ކުންފުނީގެ އިސްވެރިންނަށް އެންގުމުން ބިރު ދައްކާފައިވާ ކަމަށެވެ.

ޕީޕީއެމްގެ ފަރާތުން އިންތިހާބުގައި ވާދަކުރެއްވި އަބްދުﷲ ޔާމީންގެ ފަރާތުން އިންތިހާބައި ގުޅިގެން އޮންނަ އުސޫލުތަކުގެ ބޭރުން ދުސްތޫރީ މައްސަލައެއް ސުޕްރީމް ކޯޓަށް ހުށައަޅާފައިވާއިރު އެ މައްސަލަ ސުޕްރީމް ކޯޓުން ވަނީ ބަލައިގަނެ، އަންނަ އާދިއްތަ ދުވަހު މައްސަލައިގެ ފުރަތަމަ އަޑުއެހުން ބޭއްވުމަށް ތާވަލްކޮށްފައެވެ. އަދި އެ މައްސަލައިގައި ޖަވާބުދާރީވުމަށް އިލެކްޝަންސް ކޮމިޝަނަށް ސުޕްރީމް ކޯޓުން ވަނީ އަންގާފައެވެ.

އިންތިހަބުތަކާއިބެހޭ ޤާނޫނު ބުނާގޮތުން އިންތިހާބާއި ގުޅުންހުރި ޝަކުވާތައް ހުށައަޅަންޖެހޭނީ ފުރަތަމަ ހައި ކޯޓަށެވެ. އަދި އެއަށްފަހު ސުޕްރީމް ކޯޓަށެވެ. ނަމަވެސް ހައިކޯޓަށް ހުށައެޅުމެއް ނެތި އަބްދުﷲ ޔާމީން މައްސަލަ ސީދާ ހުށައަޅުއްވާފައިވަނީ ސުޕްރީމް ކޯޓަށެވެ. އަބްދުﷲ ޔާމީންގެ ފަރާތުން ހުށައެޅި އެ މައްސަލާގައި އެދިފައިވަނީ އިންތިހާބު ބާތިލްކޮށްދިނުމަށެވެ. އަދި އިލެކްޝަންސް ކޮމިޝަނާއި، އެމް ސެވަންގެ މައްޗަށް އެ މައްސަލާގައި ބޮޑެތި ތުހުމަތުތަކެއް ކޮށްފައިވެއެވެ.