ޔަމަނުގެ ހޫޘީންގެ ދެ ލީޑަރަކާއެކު އެ ޖަމާއަތުގެ 20 ހަނގުރާމަވެރިން މަރާލައިފި
މަރުވި އެއް ލީޑަރަކީ ހޫޘީންގެ އެންމެ އިސް އެކަކު
ހޫޘީންގެ ދެ ލީޑަރުން މަރާލީ ކުއްލިއަކަށް ދިން ހަމަލާ ތަކެއްގައި
ޔަމަނުގެ ހޫޘީންގެ ދެ ލީޑަރަކާ އެކު އެ ޖަމާއަތުގެ 20 ހަނގުރާމަވެރިން މަރާލާފައިވާ ކަމަށް ޔަމަނުގެ ސިފައިން ބުނެފިއެވެ.
ޔަމަނުގެ ސިފައިން ބުނީ ހޫޘީންގެ ދެ ލީޑަރުން މަރާލީ އެ ގައުމުގެ އެންމެ ބޮޑު ސިޓީ، ސާދާގެ ދެކުނުގައި އޮންނަ ބާގިމް ޑިސްޓްރިކްޓްގައި ކަމަށެވެ. އެ ވާހަކަ އެ ސަރަހައްދުގެ ނޫސް އިދާރާތަކުން ވެސް ވަނީ އެކަން ކަށަވަރުކޮށްދީފައެވެ. އެ މީހުން ބުނާގޮތުން މަރުވެފައިވާ ހޫޘީންގެ ދެ ލީޑަރުންނަކީ ކޮމާންޑަރ އަބްދުﷲ ޔޫސުފް ހުސެއިން ތައުރާއި އަބޫ އަލީ އަލް ނަވާރިއެވެ.
ނޫސް ރިޕޯޓްތައް ބުނާގޮތުން ކޮމާންޑަރ އަބްދުﷲ އަކީ ހޫޘީންގެ އެންމެ އިސް އެކަކު އަދި ސާނާގައި ކުރިއަށްދާ ހަނގުރާމަތަކުގައި އެންމެ އިސް ސަފުގައި އުޅޭ މީހެކެވެ. އޭނާ މަރާލީ ބާގިމް ޑިސްޓްރިކްޓްގެ ދެކުނު ހުޅަނގުގައި ހުންނަ އުދައިދާ ފަރުބަދައިގެ ފަހަތުގައި އުޅެނިކޮށް ކަމަށް އެ ނޫސް ރިޕޯޓްތައް ބުނެއެވެ
ދެވަނައަށް މަރުވި ކޮމާންޑަރ ނަވާރީ އަކީ 'ކޮމާންޑަރެއް'ގެ މަގާމަށް އަލަށް އިސް ކުރެވުނު މީހެއްކަމަށާއި އޭނާއަށް އެ މާގާމުގައި ހޭދަ ކުރެވުނީ އެންމެ 10 ދުވަހު ކަމަށް ވެސް އެ ނޫސްތަކުން ވަނީ ރިޕޯޓްކޮށްފައެވެ.
އުދައިދާ ފަރުބަދައިގެ ބިއްދޮށުގައިވާ ހޫޘީންގެ މަންޒިލްތަކަށް ހޯމަ ދުވަހު ޔަމަނުގެ ސިފައިން ހަމަލާދީފައި ވަނީ ކުއްލިއަކަށެވެ. އެ ހަމަލާގައި އެ ހަނގުރާމަވެރިންގެ އަތުގައިވާ ގިނަ ބަރުހަތިޔާރުތައް ވަނީ ހަލާކުކޮށް ނެތިކޮށްލާފައެވެ.
ޔަމަނުގައި 2014 އިން ފެށިގެން ދާހިލީ ހަނގުރާމަ ހިނގަމުންދާއިރު، އެ ހަނގުރާމަ ފެށެން ދިމާވީ ހޫޘީންގެ ޝީއީ ހަނގުރާމަވެރިން ވެރިރަށް ސަންޢާ އަށް އަރައި، ބައިނަލްއަގްވާމީ މުޖުތަމައު އިން ބަލައިގެންފައިވާ ރައީސް އަބްދުއް-ރައްބޫ މަންސޫރު ހާދީގެ ސަރުކާރު ވެރިކަމުން ވައްޓާލުމާ ގުޅިގެންނެވެ.
