ގިނަ ދުވަސްތަކަކަށްފަހު ނޮވެމްބަރު ފުރަތަމަ ދުވަހު ރާއްޖެ ވަޑައިގަންނަވާނެކަން އިއުލާންކުރައްވާފައިވާ ކުރީގެ ރައީސް އަދި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް މުހައްމަދު ނަޝީދު އިނގިރޭސިވިލާތަށް ވަޑައިގެން އެޤައުމުގެ އިސް ބައެއް ބޭފުޅުންނާއި ބައްދަލުކުރައްވައިފިއެވެ.
އިދިކޮޅު ފަރާތްތަކަށް ރާއްޖެއިން ބޭރުގައި ތިބެ އިންތިޚާބުގެ ކުރިން ގިނަ މަސައްކަތްތަކެއް ކުރުމަށް މަގުފަހިކޮށްދިނުމުގައި އިނގިރޭސިވިލާތުން، އަދި ވަކިން ޚާއްސަކޮށް އިނގިރޭސިވިލާތުގެ ވެރިކަންކުރަމުން އަންނަ ކޮންޒަވޭޓިވް ޕާޓީގެ ފަރާތުން އިސް ރޯލެއް ވަނީ އަދާކޮށްފައެވެ. ރައީސް ނަޝީދު ލަންކާގައި ގިނަ ދުވަސްތަކެއް ވަންދެން އުޅުއްވުމަށްފަހު އަލުން އަނބުރާ ލަންޑަނަށް ވަޑައިގެންފައިވާއިރު، ކޮންޒަވޭޓިވް ޕާޓީގެ އިސް ބައެއް ބޭފުޅުންނާއި ގެންދަވަނީ ބައްދަލުކުރައްވަމުންނެވެ.
އެގޮތުން އިނގިރޭސިވިލާތުގެ ކުރީގެ ބޮޑުވަޒީރު ޑޭވިޑް ކެމަރަން އާއި އެމަނިކުފާނު ބައްދަލުރައްވާފައިވާއިރު، އެމަނިކުފާނަށް ސިޔާސީ ޙިމާޔަތް ހޯއްދަވައިދެއްވުމުގައި ކެމަރަން އަދާކުރެއްވި ދައުރަށް ޝުކުރު އަދާކުރެއްވިއެވެ. އަދި ކެމަރަން ވިދާޅުވީ ރާއްޖޭގެ ޑިމޮކްރަސީއަށްޓަކައި އަދި ކޮރަޕްޝަނާއި ދެކޮޅަށް އިނގިރޭސިވިލާތް އަބަދުވެސް އޮންނާނެކަމަށެވެ.
Great to see @MohamedNasheed. We first met over a decade ago. UK has always stood up for democracy and against corruption in the Maldives. https://t.co/prd5lRrkyZ
— David Cameron (@David_Cameron) October 9, 2018
މީގެ އިތުރުން އިނގިރޭސި ޤާނޫނު ހަދާ މަޖިލީހުގެ ކޮންޒަވޭޓިވް ޕާޓީގެ އިސް މެމްބަރެއްކަމަށްވާ ޒެކް ގޯލްޑްސްމިތު އާއިވެސް ރައީސް ނަޝީދު ވަނީ ބައްދަލުކުރައްވާފައެވެ. ގޯލްޑްސްމިތު ރައީސް ނަޝީދު ސިފަކުރައްވާފައިވަނީ ހިތްވަރުގަދަ ލީޑަރެއް، އަދި ސިޔާސީ އަދި ތިމާވެށީގެ ހީރޯއެއްގެ ގޮތުގައެވެ.
Honoured to spend time today with @MohamedNasheed - a brave and brilliant leader, a political and environmental hero. pic.twitter.com/75AhIK7w9j
— Zac Goldsmith (@ZacGoldsmith) October 9, 2018
ކޮންޒަވޭޓިވް ޕާޓީގެ އިސް ބައެއް ފަރާތްތަކާއި ރައީސް ނަޝީދު ބައްދަލުކުރެއްވިއިރު، އިނގިރޭސި ސަރުކާރުގެ އިސް ބައެއް ބޭފުޅުން ރާއްޖެ ވަޑައިގެން، އިންތިޚާބީ ރައީސްއާއި، ސިޔާސީ ޕާޓީތަކާއި ވަނީ ބައްދަލުކުރައްވާފައެވެ.
ރައީސް ނަޝީދުގެ މައްޗަށް 13 އަހަރުގެ ޖަލު ހުކުމެއް ކޮށް، އެމަނިކުފާނު ޖަލަށް ލުމާއި ގުޅިގެން ދުވަސްތަކެއް ޖަލުގައި ހޭދަކުރެއްވުމަށްފަހު، 2015 ވަނަ އަހަރު ބޭސް ފަރުވާއަށް ވަޑައިގަތްފަހުން ރައީސް ނަޝީދު ދިރިއުޅުއްވަނީ އިނގިރޭސިވިލާތުގެ ސިޔާސީ ޙިމާޔަތުގައެވެ. އަދި އޭގެ ފަހުން ލަންޑަނުގައި ހުންނަވައިގެން އިދިކޮޅު ސިޔާސީ ޙަރަކާތް ވަރުގަދަކުރެއްވިއެވެ. މި މަސައްކަތްޕުޅުގައި ވަރަށް ގިނަ ފަހަރަކު އީޔޫގެ ބޭފުޅުންނާއި ބައްދަލުކުރެއްވުމަށް ބްރަސަލްސް އަށް އަދި އެހެނިހެން ސިޔާސީ ކަންކަމުގައި ކޮޅުނބަށް ރައީސް ނަޝީދު ވަޑައިގަތެވެ.
